Над 86 % од Бугарите се обединети за идејата дека не може да се откажат од историските корени и историскиот идентитет. Оваа идеја ја обединува речиси целата бугарска нација веќе 80 години, вели во интервју за бугарската БНТ, Кирил Топалов, член на Меѓусекторската комисија помеѓу Бугарија и Република Северна Македонија.

Тој истакнува дека во однос на надворешната политика Бугарите се ориентирани во две насоки – едната претпочита европска ориентација на Бугарија, другата ја претпочита руската ориентација, а како што објаснува, единственото нешто што ги обединува е македонската кауза.

Според него, залудни се надежите на политичарите во Република Северна Македонија македонската кауза да биде предадена поради актуелната политичка состојба во Бугарија.

„Никој не може да ја принуди Бугарија да ѝ попушти на земја што не се распадна со тоталитарно-комунистичка државотворна енергија и форма на управување, која се мачи и самата да изработи правила за да биде членка во ЕУ“, додаде Топалов.

Според него, Република Северна Македонија не ги исполнува своите обврски од договорот со соседната земја членка.

„Треба да заборавиме дека сме браќа, братучеди и слично, на нив треба да гледаме како на соседна земја кон која се однесуваме со симпатии, со доверба, но исто така и тие мора да ни возвратат на ист начин“, вели Топалов.