Македонија
Тренчевска: Институциите, граѓанскиот и меѓународниот сектор заедно може да направат многу повеќе во борбата против насилството

Министерката за труд и социјална политика, Јованка Тренчевска, заедно со амбасадорот на Британија во Република Северна Македонија, Метју Лосон, градоначалникот на општина Струмица, Костадин Костадинов, претставничката на УНФПА, Афродита Плавјанска-Шалја, го посети здружението на граѓани „Скај плус“, Струмица, кое, покрај засолниште, има воспоставено и советувалиште за жени жртви на семејно насилство и нивните деца во општина Струмица.
Владата на Република Северна Македонија, со поддршка од британската амбасада, презеде цврсти чекори во заштитата на жртвите на семејно насилство и родово базирано насилство и овозможување соодветни услуги за заштита и поддршка на жртвите на насилство и нивните деца.
„Скај плус“ како засолниште за жртви од насилство е пример за модел на соработка кој ги вклучува сите клучни фактори – Министерството за труд и социјална политика, локалната самоуправа, полицијата, граѓанското општество и приватниот сектор“, истакна министерката за труд и социјална политика, Јованка Тренчевска.
Таа посочи дека потребно е следење на текот на живот на жртвата со цел повторно интегрирање во општеството.
„Животот на жените што се жртви на семејно насилство е исполнет со предизвици и затоа ние како општество, пред сѐ, треба да работиме на градење на нивната самодоверба преку креирање можности за развој и напредок. Токму тоа го промовираме со кампањата што ја спроведуваме како Министерство за труд и социјална политика – „Гласна и храбра“, целта ни е жените жртви на семејно и родово базирано насилство економски да се зајакнуваат и да ја разберат важноста на менталното здравје во повторно интегрирање во општеството и да ја разберат силата што ја имаат во себе, а која им е клучна кон градењето комплетна благосостојба. Затоа што за нас е важно секој еден во нашата држава да има достоинствен живот, како и еднакво да ги ужива сите права. И кога жените го користат својот максимален потенцијал, тогаш ние влијаеме на искористување на потенцијалот на нивните деца, а со тоа трансгенерациски ги искоренуваме повторените однесувања,“ рече Тренчевска.
Амбасадорот Метју Лосон го истакна значењето на поддршката на жените и девојките што претрпеле семејно насилство.
„Тоа е неверојатно важно прашање и навистина мислам дека фактот да се биде во Струмица заедно со граѓанскиот сектор, заедно со локалната самоуправа е навистина добар пример за соработка помеѓу партнерите во оваа земја и меѓународните партнери изаедничката поддршка насочена кон жените и девојките и ова прашање останува да биде приоритет за британската влада преку нашата работа во оваа земја“, истакна амбасадорот Лосон.
„Како УНФПА, се гордееме што го препознавме моделот на соработка со сите локални фактори кои успешно го применуваат шелтер-центарот ‘Скај плус’ од Струмица и со поддршка на британската амабасада помагаме овој модел да се примени и во други општини.
Заедно со нашите партнерски институции и организации работиме на неколку полиња во унапредување на сервисите за жртвите и преживеаните. Помогнавме да се заокружи законската рамка преку сите подзаконски акти, да се изработи протоколот за мултисекторско постапување и соработка и да се дизајнира модел на интегрирано собирање и анализа на податоци за родово базирано и семејно насилство. Преку заедничките кампањи и локални средби, интензивно работиме услугите да бидат достапни, особено до ранливите категории жени и девојки. Не застануваме тука бидејќи само заеднички можеме да ги подобриме услугите, а воедно и да му ставиме крај на насилството“, порача Афродита Плавјанска-Шаља пред присутните.
Градоначалникот на општина Струмица, Костадин Костадинов, ја изрази поддршката на Општината во борбата против родово базираното насилство и заштита на жените од семејно насилство.
„Општина Струмица го држи врвот и нема намера да се симне од него. Така е во многу области, така е и во областа на згрижување на жените – жртви на семејно насилство и нивните деца. Струмичкиот шелтер-центар како позитивен пример за соработка на здружението на граѓаните ‘Скај плус’ и Општина Струмица е вистински доказ за тоа“, порача Костадинов.
Стојне Митева од здружението „Скај плус“ изрази огромна благодарност и од име на „Скај плус“ и од Општина Струмица кон бртанската амбасада и УНФПА.
„Навистина, без нивната поддршка немаше ниту да се создадат услови за напредок на организацијата и сите внатрешни документи што и се потребни на организацијата со цел комплетна заштита на жртвите на семејното насилство, но и изработката на прирачникот, секако повторно под капата на УНФПА и британската амбасада. Јас сум бескрајно благодарна за тоа што амбасадата дозволи прирачникот да се појави и да биде достапен и онлајн, па така букварот како до шелтер-центар, односно до реплицирање на моделот, во кој ќе бидат вклучени сите фактири во општеството зашто само така можеме да се избориме со болката што ја чувствуваат, за жал, многу жени во Струмица, во земјата, во регионот“, истакна Митева.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Груевски за Антонијо Милошоски: Пред секој нов лидер го напаѓа претходниот за да се истакне – таков бил и ќе остане

Експремиерот Никола Груевски се огласи со коментар по вчерашната прес-конференција на пратеникот од редовите на ВМРО-ДПМНЕ, Антонијо Милошоски кој рече дека Ковачевски и Ахмети преговарале амнестија, со цел поделби во партијата и уставни измени.
Груевски по повод обвинувањата од оваа прес-конференција рече дека Милошоски е политичар кој за да се истакне пред новиот лидер, секогаш го напаѓа претходниот.
„За Антонио Милошевски кој вчера држеше прес конференција против мене имам многу што да кажам, но засега ќе се воздржам. Само ќе кажам дека многу добро го запознав неговиот карактер и минато. Тој при секоја смена на лидер со сопствена иницијатива бара начини да го нападне претходниот, за да се истакне кај новиот. Така ќе биде и кога Мицковски ќе си замине од челната позиција на партијата еден ден. Антонио ќе држи прес конференција, а на интерни состаноци најжестоко ќе зборува против него како да му е прв душман, од првиот ден, за да ги добие симпатиите на новиот водач. Така функционира тој човек. Таков бил, таков е сега, таков и ќе си остане“, вели Груевски.
Македонија
Груевски до членството: Тргнете се од ботовите и платените пропагатори

Експремиерот Никола Груевски порача до членството да се оддалечат од ботовите и платените пропагатори, коментирајќи дека има многу начини да се изрази лојалноста кон партијата.
Груевски го обвини актуелниот претседател на ВМРО-ДПМНЕ, Христијан Мицкоски дека сурово, жестоко и неочекувано го нападнале и обвиниле, а од денес, како што вели, е јасно дека водат однапред подготвена кампања против него, дека наводно подготвувал соработка со власта на штета на партијата и нацијата.
„Тоа го направија во време кога континуирано и без исклучок речиси секојдневно жестоко ја напаѓам власта со сите сили и аргументи, и ги бранам националните позиции со аргументи и со историски факти како ниту еден од раководството на партијата, на чело со Мицковски. И во време кога Мицковски и Заев повеќе од половина година не ги негираа објавите на медиумите за нивна блиска соработка и заеднички планови. А националните позиции на Заев добро ни се познати…не сум изненаден Заев да не ме посакува во ист табор со него.
Со оглед дека нивните напади не се вистина, заради што не можат да ги поткрепат ниту со најмал доказ, зборуваат дека некои други луѓе нешто зборувале и планирале, се договарале, се фалеле или слично, но никаде ме нема мене, па така останува дека тие, пред се водени од Мицковски кој се обидува да ги инволвира сите други, свесно, со намера, подолго подготвувано, со план и стратегија, маркетинг кампања и однапред програмирани чекори започнаа не само напад, туку и валкана кампања против мене, токму со цел да ме направат нивни противник и да ни направат штета. Многу долго време сум бил на таа позиција на која е Мицковски сега, за да не сфатам кои му се намерите и мотивите.
Има повеќе можни причини за тоа, тргнувајки од страв заради крајно нечовечкото однесување кон мене на Мицковски и на овие поединци во раководството на партијата во последните 6-7 години, кои дел ги донесов а дел растеа покрај мене во политиката, па до влијанија од надвор, докажувања некаде, скриени агенди, тајни планови за важни прашања, не чесни планови и нечесен однос, нервоза и незадоволство од некои анкети, лични амбиции и длабоки комплекси на поединци итн.
Со оглед дека од денес ми е јасно дека планот е да водат кампања против мене, ќе морам подетално да ги анализирам овие работи.
На членовите на партијата, активистите и сите во раководството им порачувам да не наседнуваат на вакви погубни стратегии, да размислуваат со своја глава, да бараат цврсти докази кога ги тераат некого да осудат на невидено, за да не се еден ден во ситиација да се извинуваат и да се правдаат, дека биле прелажани, дека слепо некому верувале, дека сега им е криво, не ги знаеле добро работите или слично.
Ова очигледно е голема игра во која сакаат да ве повлечат сите. Да не речете потоа: па што не ни кажа? Па одкаде ние да знаеме сѐ? Тргнете се од ботовите и платените пропагатори. Имате многу начини да ја изразите лојаноста кон партијата без да станете дел од нечесни игри. Толку од постот“, напиша Груевски на социјалните мрежи.
Македонија
(Видео) Кузеска: Мицкоски е бледа копија на Груевски, ДПМНЕ се распаѓа, внатрешниот раскол Мицкоски да не му го товари на СДСМ

ДПМНЕ се распаѓа. Очигледно големи се внатрепартиските проблеми во белата палата и анти-ЕУ кампусот. Јавноста е сведок дека повторно внатрешниот раздор, кавгите и поделбите во ДПМНЕ, кои кулминираат овие денови, Мицкоски се обидува да му ги натовари на СДСМ, истакна на денешната прес-конференција Богданка Кузеска, портпаролка на СДСМ.
„Обидите за создавање конфузија во јавноста и очајната потреба да ја вмеша и СДСМ во внатрешните поделби и кавги во ДПМНЕ нема да му помогнат на Мицкоски. Очајниот Мицкоски воопшто да не ја меша СДСМ во меѓусебната пресметка и сам да си ги решава кавгите. Впрочем јавноста се уште чека одговори од Мицкоски за диловите со Груевски. Дали со тоа ги прикрива барањата за амнестија на негови сопартијци, заради незадоволство токму од него внатре во неговата партија?“, прашува Кузеска.
Мицкоски, додава таа, е бледа копија на Груевски. Оценува дека политиката на блокада на Мицковски е исто така само копија на оригиналот и очигледно дека има структури во ДПМНЕ што не се задоволни од него.
„СДСМ ќе направи се и нема да дозволи Мицковски или кој било повторно да ни ја земе државата како заложник.
Заедно со граѓаните и со проевропските политички партии ќе продолжиме да се бориме за европска Македонија додека не ја достигнеме државната цел за членство во ЕУ“, нагласи Кузеска.