Агенцијата што треба да се занимава со безбедноста на храната што се внесува и произведува во Република Македонија, Зоран Заев и Љупчо Николовски ја претвораат во партиско дувло, изјави Цветан Трипуновски од ВМРО-ДПМНЕ на прес-конференција.

Тој посочи дека, наместо професионалци, се вработуваат претседатели на партиски разграноци на СДСМ и истакнати нивни членови.

„Изминатиов период во неколку наврати обелоденивме дека Зоран Атанасов и луѓето околу него во АХВ со несериозниот и нестручен пристап го загрозуваат здравјето и животот како на добиточниот фонд во земјата така и на луѓето.
Скандалот со антраксот, несоодветното управување со проблемот со африканската свинска чума, како и пропустите во редовните проверки и испитувања се само и само поради партизацијата и политизацијата што се случува на големо во АХВ.

Агенцијата е искористена како институција за вработување на Александар Гиноски, поранешен претседател на ОО СДСМ Ѓорче Петров, партискиот активист Александар Јованчев, кој е во често друштво на генералниот секретар на СДСМ, Љупчо Николовски. СДСМ во Агенцијата го вработи и братот на градоначалникот на Пехчево, Драган Тренчовски, како и Никола Савовски, кандидат за советник во Општина Центар од редовите на СДСМ. Атанас Бојчев е еден од поранешните директори на Државниот студентски дом „Скопје“, кој е префрлен да работи и раководи во АХВ.

Ова се само дел од партиските вработувања што формираат мрежа на СДСМ во АХВ, институција што треба да биде симбол за врвен професионализам.

Сето ова се случува додека Димковски по диктат на Заев и Николовски шиканира професионалци и неистомисленици преместувајќи ги да работат надвор од своето место на живеење, а во меѓувреме во институциите прима партиски активисти.
Ваквиот однос со клучни институции мора да стане минато. Да ставиме крај на несоодветниот третман на проблемите што ги тангираат граѓаните на Република Македонија. Затоа, потребни се предвремени парламентарни избори што побргу“, рече Трипуновски.