Македонија
Турската демократска партија во земјава одбележа 30 години

Турската демократска партија (ТДП) со свечена програма ја прослави својата 30-годишнина од основањето, а на свеченоста присуствуваа техничкиот премиер, Оливер Спасовски, претседателот на ТДП, Бејџан Илјас, почесниот претседател на ТДП, Кенан Хасип, потпретседателите, членовите на партијата, високи функционери и многу други гости.
Во својот говор, Спасовски упати честитки по повод 30-годишнината на ТДП и посака долги години да останат на политичката сцена.
„ Затоа што е создадена кога се создаде и независна и суверена Република Македонија. И во темелот се вградени многу кадри на Демократската партија на Турците, коишто од првиот момент се вложија да имаме држава ваква каква што е денеска – држава независна, суверена, држава на сите граѓани без разлика на националната, верската, етничката припадност. Држава која што е дел од НАТО и ЕУ, рече Спасовски, истакнувајќи дека ТДП е вградена во темелот на оваа држава.
Спасовски упати благодарност до турскиот претседател Реџеп Таип Ердоган и Владата за испратената помош за борба против вирусот Ковид-19.
„ Посебно сакам да се заблагодарам на сите Турци во Северна Македонија не само на членовите на вашата политичка партија, заради тоа што не само што се најлојални граѓани на оваа држава, туку се граѓани коишто ја основаа, коишто ја поддржуваат, коишто заеднички се трудат да ја развиваме државата. Второ, се граѓани коишто се директен мост на нашето пријателство и братство со Република Турција, истакна Спасовски.
„ Ние ја одбележуваме 30-годишнината на Демократскиот сојуз на Турците, која е основана во јули 1990 година, која порасна во политичко движење. Потоа, Демократскиот сојуз на Турците во 1992 година се трансформира во Демократска партија на Турците, рече претседателот на ТДП, Бејџан Илјас.
Истакнувајќи дека организирале програма за оние кои вложиле големи напори во партијата, Илјас нагласи дека е важно што заедно на едно место се собрани и возрасните и младите за да го одбележат, како што рече, овој важен датум.
„ Ние се залагаме за развој на нашата мултикултурна и мултиетничка држава и секако за унапредување на правата на Турците во Северна Македонија кои биле и ќе останат најлојални граѓани. Ние како најголема и најсилна Турска етничка партија ја одбележуваме 30-годишнината од своето постоење на политичката сцена во Северна Македонија и уверени сме дека заедно со вас можеме уште повеќе, уште подобро и подготвени сме на 15 јули да ја славиме заедничката победа која ќе ни даде можност да продолжиме да ги остваруваме заедничките цели, рече Енвер Хусеин, генералниот секретар на ТДП и кандидат за пратеник.
Поради новиот вид коронавирус, програмата се организираше на отворено со почитување на мерките за социјална дистанца. Исто така, прикажано беше и видео со активностите на ТДП во изминатите 30 години.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Седи Боби, кец!“, му рече Арсовска на Стефковски за проблемот со водата, па доби одговор

Градоначалничката на Град Скопје, Данела Арсовска, преку објава на својот официјален профил на Фејсбук, му возврати на градоначалникот на општина Гази Баба, Бобан Стефковски, кој претходно ги прозва Градот и ЈП „Водовод и канализација“ – Скопје, за прекините во водоснабдувањето во неколку скопски населби. Тој побара итна интервенција од Градот, предупредувајќи на можни протести ако состојбата не се реши веднаш.
Арсовска му одговори на Стефковски дека и по три години на функција сè уште не прави разлика што е во надлежност на Градот, а што на Општина Гази Баба. Таа појасни дека жителите на Црешево и Смилковци не се корисници на ЈП „Водовод и канализација“, туку на ЈКП „Гази Баба“ – претпријатие под општинска надлежност.
„Ова по три години ќе го знаеше ако паузираше еден ден од сликање по фолклорни манифестации за да сработиш нешто“, напиша Арсовска, посочувајќи дека со средствата добиени од владите на Ковачевски и Мицкоски, Стефковски можел да изгради нова водоводна мрежа за тие населби.
Во продолжение, Арсовска рече дека Град Скопје во изминатите три години не добил ниту еден денар од централната власт, а дека Владата ѝ должи на ЈСП Скопје осум милиони евра.
Градоначалничката ја заврши објавата со саркастичен тон: „Седи Боби, кец!“
Ситуацијата дополнително ја заостри реториката меѓу градоначалниците на Скопје и Гази Баба, отворајќи нова рунда меѓусебни обвинувања. По објавата на Арсовска, повторно се огласи Стефковски кој и’ одговори дека надлежноста за Смилковци и Црешево ја знае многу добро, па ја повика да каже зошто жителите од Автокоманда, Железара, Триангла, Маџари и Ченто немаат вода? За крај по однос на делењето оценки, Стефковски на социјалните мрежи напиша дека граѓаните и’ дале оценка на парламентарните избори на Арсовска. Тогаш таа освои вкупно 3.438 гласови.
Македонија
Гори кај Прилеп, Македонски Брод, Чашка и Велес – пресек на состојбата со пожарите

На територијата на државата се евидентирани вкупно осум пожари на отворен простор, од кои активни се четири, соопшти Центарот за управување со кризи.
Во Општина Прилеп, гори кај селото Бешиште. Се работи за приземен пожар во квалитетна мешана шума. Активен е пожарот и кај Општина Македонски Брод, с. Црешнево, м.в. Церо Поле – пожар во деградирана дабова шума и грмушки. Во Општина Чашка беснее шумски пожар под Солунска Глава, помеѓу местата викани Изворите на Бабуна и Бабина Дупка (моментално нема активен пламен, само чад на карпест дел). Во Општина Велес пожарот избувна во ниска вегетација.
Изгаснати се 4 пожари: Општина Врапчиште, с. Врањовци – ниска вегетација, ѓубриште; Општина Липково, с. Лојане – ниска вегетација и стрниште; Општина Карбинци, с. Радање – блок (површина) посеана со жито и ниска вегетација и ОпштинаАрачиново, с. Орланци – ниска вегетација и отпаден материјал.
Македонија
(Видео) Според СДСМ, надворешната политика доживува дебакл

Андреј Жерновски од СДСМ, на денешната прес-конференција ја оцени надворешната политика на Владата предводена од ВМРО-ДПМНЕ како дебакл без ниту еден успех.
Жерновски изјави дека, по една година владеење, Македонија се соочува со „сериозно влошена меѓународна позиција“, без напредок на европскиот пат, без нови инвестиции и со зголемена царина од страна на САД. Според него, министерот за надворешни работи Тимчо Муцунски не остварил ниту еден договор или резултат на дипломатски план.
СДСМ ја критикува и состојбата со дипломатската мрежа, која, како што рече Жерновски, е „разурната, партизирана и нефункционална“, а Македонија се наоѓа „на периферијата на демократскиот свет“.
Како посебно загрижувачка точка беше истакната и заканата, како што наведуваат од СДСМ, за можно бришење на македонскиот јазик од Извештајот на Европскиот парламент, што партијата го поврзува со актуелната надворешна политика на МНР.
Жерновски рече дека за време на владеењето на СДСМ бил обезбеден македонскиот јазик во официјални документи на ЕУ, вклучително и договорот со ФРОНТЕКС, без фусноти и дополнителни објаснувања.
„Тој успех денес е доведен во прашање поради вазалската политика на Муцунски и неговиот шеф Мицкоски“, рече Жерновски.
На крајот, порача дека СДСМ ќе продолжи да се бори за враќање на Македонија на патот на меѓународни успеси, европска иднина и заштитен идентитет и јазик.