Македонија
Убиен братот на Камер Идризи, кој лани беше смртно застрелан во Чаир

Во пукање што се случи синоќа во скопски Чаир загина едно лице. Пукањето било на раскрсницата од булеварите Босна и Херцеговина и Христијан Тодоровски-Карпош. Полицијата вели дека две лица пукале од автоматско оружје во угостителски објект.
Убиениот е Јонуз Идризи, брат на Камер Идризи, кој во мај минатата година беше убиен на истата раскрсница. Во престрелката вчеравечер повредени се уште две лица.
„ Повреди добиле М. А. (43) и Л. Ш. (42) од Скопје, кои биле пренесени во Градската општа болница ‘Св. Наум Охридски’ за укажување лекарска помош. А во комплексот клиники ‘Мајка Тереза’ со повреди – расеченици на раката бил донесен А. И. (30) од Скопје. Увид на местото извршиле полициски екипи и се преземаат мерки за пронаоѓање на сторителите и за расчистување на случајот“, велат од МВР.
Јонуз Идризи е најстариот брат на Камер Идризи кон кого лани беа испукани 80 куршуми. Камер Идризи беше едно од лицата врз кое беше пукано во хотелот „Александар палас“ во 2019 година.
Извршителите на сите три престрелки не се пронајдени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Бројот на гости и ноќевања расте со историски 20% во однос на лани, целта ни е да стигнеме до четири милиони ноќевања, вели Мицкоски

Премиерот Христијан Мицкоски утрово при посетата на Машинскиот факултет историски успех го нарече зголемениот број регистрирани ноќевања и туристи во земјава по објавата на Државниот завод за статистика дека во споредба со лани, годинава, во период од јануари до април, бројот на странски туристи се зголемил за 21,6 отсто. Освен зголемувањето на бројот на туристи и ноќевања, премиерот Мицкоски вели дека се менува и структурата на туристите.
„Тоа е исклучително голем и квалитетен податок, посебно значаен за услужната и угостителската дејност. Можам да кажам дека во првите четири месеци бројот на гости и ноќевања расте со историски 20 % споредено со истиот период од лани, и во април но и во првите четири месеци. Се менува и структурата на туристите. Сега веќе гледаме туристи кои се од Германија, Франција и така натаму. Од она што го знам од туроператорите за следната година се планира најмалку половина милион ноќевања надвор од сезоната во Охрид што навистина ќе значи многу за нас како земја“, рече премиерот Мицкоски.
Владата веќе има поставено нова цел, кога се работи за бројот на туристи и ноќевања во земјава од кои очекува зголемен бруто домашен производ во вториот квартал.
„Минатата година имавме рекордни милион и двесте илјади регистрирани туристи со 3,5 милиони ноќевања. Оваа година целта ни е да стигнеме до четири милиони ноќевања, и до милион и пол туристи. Дали ќе успееме? Се надевам-да. Првите параметри се добри. Ме радува што зголемувањето продолжува во првиот месец од вториот квартал, во април скоро 21 % е зголемен процентот на странски гости, а скоро 20 % ноќевањето од странските гости. Тоа ќе биде добар инпут за бруто домашниот производ во вториот квартал“, рече премиерот Мицкоски.
Државниот завод за статистика објави дека во април 2025 година во Македонија престојувале 96.943 туристи. Од нив 78,6 отсто биле странци, а 21,4 отсто домашни гости. Регистрирани се 171.886 ноќевања, од кои 73,5 отсто се од странски туристи, додека 26,5 отсто на домашните. Во април најбројни гости ни бие Турците 21.124, зад нив се Германците со 11.097, Србите со 4.905 и Французите со 4.881 регистриран турист.
Во периодот јануари – април 2025 година, вкупниот број на туристи е зголемен за 13,4 отсто споредено со истиот период лани. Иако кај домашните туристи е забележано намалување од 4,2 отсто, кај странските гости има раст од 21,6 отсто. Бројот на ноќевања се зголемил за 10,5 отсто, со тоа што домашните ноќевања се намалиле за 4,7 отсто, а странците направиле 19,8 отсто повеќе ноќевања.
Македонија
Картел во фармацевтскиот бизнис – две веледрогерии го оштетиле буџетот за 1,1 милион евра

Вишиот управен суд со пресуда го потврди решението на Комисијата за заштита на конкуренцијата со кое утврди дека две големи веледрогерии АД Д-р Пановски и Фарма Трејд ДООЕЛ Скопје склучиле забранет договор – картел при учество во постапка за јавна набавка на инсулин, глукагон, инсулински игли и ленти за мерење шеќер и инсулински пумпи со потрошен материјал, соопшти Комисијата за заштита на конкуренцијата.
Од таму велат дека се работи за јавна набавка која во 2016 година е распишана од страна на Министерството за здравство на Република Македонија при што двете веледрогерии спротивно на Законот за заштита на конкуренцијата склучиле забранет договор-картел со кој свесно и со намера да се стекат со противправна имотна корист на штета на државата го замениле принципот на слободна конкуренција на пазарот со забрането договарање на продажните цени на лековите.
Комисијата за заштита на конкуренцијата при откривање и документирање на овој картел го имала во предвид домашното законодавство, но и судската пракса на Европската унија.
„За учество во предметниот картел Комисијата со решението изрече прекршочни санкции глоба и тоа на АД Д-р Пановски во износ од 1.061.000 евра и на Фарма Трејд ДООЕЛ 721.000 евра. Висината на наведената глоба е во корелација со штетата која е нанесена на буџетот на државата“, соопшти Комисијата.
Од таму велат дека за откриениот картел ќе поднесат соодветно известување до Управата за финансиска полиција и Јавното обвинителство заради натамошно постапување од нивна страна во соодветна кривична постапка.
Македонија
Николоски – Ле Риголер: Работиме на унапредување на економската соработка меѓу Македонија и Франција

Потпретседателот на Владата и министер за транспорт Александар Николоски, заедно со заменик министерката Калтрина Зеколи Шаќири, денеска остварија работна средба со амбасадорот на Француската Република, Кристоф Ле Риголер.
На средбата на која се потврдија добрите билатерални односи меѓу двете земји, беа разменети меѓусебни мислења и ставови за политичките и економски прашања во земјава и регионот.
Вицепремиерот Николоски го истакна пријателството меѓу Македонија и Франција и ја потенцира можноста за унапредување на билатералните односи, со посебен акцент на економската соработка и поддршка во делот на реализација на ифраструктурните проекти.
Притоа, вицепремиерот Николоски го запозна амбасадорот Ле Риголер со развојните планови на Владата и планираните инфраструктурни проекти, посебно проектите кои имаат регионално значење и со кои се придонесува за забрзан економски развој на земјите од регионот.
Исто така на средбата се разговараше и за реформскиот процес на земјата, интеграциите и членството во Европската Унија. Македонија е фокусирна на интегративниот процес, потенцира вицепремиерот Николоски а владините политики се насочени кон реформирање на земјата и борбата против корупцијата.
Двајцата говорници се согласија на интензивирање на меѓусебната соработка на двете земји.