Македонија
Утре ден на жалост во Кисела Вода поради смртта на Беличанец
Со едноминутен молк членовите на Советот на Општина Кисела Вода ја почнаа денешната вонредна седница свикана по повод смртта на поранешната градоначалничка Билјана Беличанец.
Советниците едногласно донесоа одлука утрешниот ден да биде прогласен за ден на жалост на територијата на општината. Со одлуката, се откажуават сите културни, спортски, забавни и други манифестации.
„Лош, можам слободно да кажам и трагичен е поводот поради кој ја свикавме денешната вонредна седница на Советот на Општина Кисела Вода, но, за жал, животот секојдневно ја покажува својата суровост. Денес на дневниот ред имаме само една точка, а тоа е утрешниот ден да биде прогласен за ден на жалост во Општина Кисела Вода по повод прераната смрт на поранешната градоначалничка Билјана Беличанец. Искрено, како претседател на овој мандат на Советот на Општината, лично не ја познавав многу г-ѓата Билјана Беличанец. Неколку пати сме се сретнале, неколку пати сме поразговарале и мојот впечаток беше дека се работи за мошне интересна и харизматична личност, со пријателски однос, со многу идеи и со желба да ги направи работите подобри. За неа можеби повеќе можат да зборуваат колегите советници од претходниот состав од кои слушав за нејзиниот конструктивен и коректен однос, за нејзината хуманост секогаш кога некому му требало помош, за прифаќањето на добрите идеи и тогаш кога доаѓале од спротивниот политички табор. Таа беше и доказ дека политиката не е само за мажите. Храбро се залагаше за своите идеи и идеали, за своите убедувања. За неа можам да зборувам и како за актерка, бидејќи на сцената таа даваше смисол на она што сите го кажуваме – даските што живот значат. Врвна актерка, со богата биографија. Со нејзиното заминување загуби многу и македонскиот театар и нејзините колеги, актерите и публиката. Изгубивме сите ние. Но сепак, најмногу загуби нејзиното семејство. Нејзините деца, сопругот, родителите, сестрата. Од име на сите присутни тука, сакам до нив да упатам најдлабоко сочувство за нивната загуба“, кажа пред присутните претседателот на Советот на Општината, Дарио Шимиќ.
Градоначалникот Филип Темелковски во своето обраќање изрази жалење за смртта на Билјана Беличанец, која, како што кажа, беше успешен градоначалник. Темелковски најави иницијатива за преименување на новоизградениот Дом на културата КВК во „Билјана Беличанец“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Кумановци ќе се возат бесплатно во градските автобуси до крај на годинава
Кумановци ќе се возат бесплатно до крајот на годинава, одлучија советниците на последната седница. Мерката субвенциониран превоз кој опфаќа 26 линии ќе продолжи до крајот на декември 2025 година.
-Методологија за пресметка е 50 денари по изминат километар, секоја линија има возен ред, има број на поаѓања, секоја линија има утврдено точна километража така што прецизно е пресметано по број на поаѓање, односно утврдениот возен ред којшто го потпишува градоначалникот. Кога ќе се помножат изминати километри по релација и по број на поаѓање се доаѓа до цифра од 6,5 милиони денари за месец декември како и 650.000 мислам за овој меѓуопштински превоз помеѓу Куманово и Старо Нагоричане, рече раководителката на секторот за комунални дејности, Лидија Ланг Спасовска.
Одлуката беше изгласана со мнозинство советници. Опозицијата смета дека мерката е прескапа, во интерес на само дел од кумановци, предлагајќи мерките да важат за учениците и ранливите категории граѓани. Дел од советниците побараа и формирање на јавно претпријатие, некои и набавка на електрични автобуси. Надлежните потврдија дека општината аплицирала на повик на Владата за набавка на 25 електрични автобуси, што би требало да донесе долгорочно решение за јавниот превоз и да го намали товарот врз буџетот.
Од Општина Куманово потенцираат дека субвенционираниот превоз е социјална и еколошка мерка која има повеќекратни позитивни ефекти. Со мерката како што укажуваат се намалуваат трошоците во семејните буџети, се редуцира сообраќајниот метеж во централното градско подрачје и има придонес кон намалување на аерозагадувањето. Дополнително се наведува дека мерката најмногу им користи на жителите од приградските населби, кои во спротивно би имале значителен трошок за дневно патување. И граѓаните имаат различни коментари, додека едните ја поддржуваат, други реагираат дека има пренатрупаност на одредени линии, недоволна фреквенција на автобуси, злоупотреба од страна на поединци кои се возат без реална потреба, незадоволство кај ученици и работници поради недоволниот капацитет во одредени термини.
Македонија
Левица со остра реакција на најавените поскапувања на парното и струјата
Левица остро ја осудува одлуката за најновото зголемување на цената на парното за 5 проценти, како и најавениот раст на цената на електричната енергија од јануари. Од партијата сметаат дека овие одлуки не се само технички бројки во одлуките на Регулаторната комисија за енергетика, туку доказ за, како што наведуваат, хроничниот неуспех на Владата во енергетскиот сектор и за растечкиот удар врз стандардот на граѓаните.
Од партијата реагираат и на информациите дека ЕСМ ја нуди струјата по 65 евра за мегават-час, оценувајќи дека тоа ја демантира „владината приказна за стабилност во снабдувањето“.
Според Левица, граѓаните ја плаќаат струјата двапати – преку зголемените сметки и преку буџетски средства со кои се субвенционираат цените, со што, како што тврдат, Владата ја прикрива штетата од погрешните политики и скапи менаџерски одлуки.
Партијата дополнително обвинува дека РКЕ, наместо да го штити јавниот интерес, настапува како „сервис на монополските компании“, прифаќајќи ги нивните трошоци без реална проверка. Тоа, велат од Левица, резултира со повисоки тарифи на товар на граѓаните.
Во услови на инфлација и растечка енергетска сиромаштија, секое ново покачување претставува директен удар врз домаќинствата, реагираат од партијата. Наместо вложување во домашно производство, обновливи извори и енергетска ефикасност, според Левица, Владата дозволува стареење на мрежата, зависност од увоз и „одлив на профит кон приватен и странски капитал“.
Од таму бараат итно ревидирање на последните одлуки на РКЕ, јавно објавување на пресметките за поскапувањето, независна анализа на работењето на ЕСМ, промена на методологиите за пресметка на цени со заштита на стандардот на граѓаните, како и мерки за помош на енергетски сиромашните домаќинства.
Левица додава дека ќе продолжи да се спротивставува на политики кои, како што велат, го штитат профитот на монополите на штета на граѓаните и ќе се бори за враќање на клучните енергетски компании под државна контрола.
Македонија
Бесплатни уролошки прегледи денес во амбулантата на Специјализираната болница за геријатриска и палијативна медицина
По повод Месецот на машкото здравје – Мовембер, во амбулантата на Специјализираната болница за геријатриска и палијативна медицина „13 Ноември” – Скопје денеска со почеток во 10 часот ќе се вршат бесплатни уролошки прегледи, како и ехо прегледи на бубрези и простата.
Целта е подигнување на свесноста за значењето на навремената грижа за машкото здравје. Ова е одлична можност за навремена проверка, превенција и грижа за здравјето, информира болницата „13 Ноември” – Скопје.
Уролошки прегледи ќе врши Дарко Марковски, уролог од ГОБ „8-ми Септември“, а ехо на бубрези и простата докторките Марика Филипова и Марија Сековска – специјалисти интернисти во Специјализирана болница за геријатриска и палијативна медицина „13 Ноември“ .

