Денеска во текот на претпладневните часови времето ќе биде променливо облачно, во северните делови со слаб локален дожд, информираат од Управата за хидрометеоролошки работи.

Ќе дува умерен до засилен северен ветер, особено вдолж Повардарието. Во текот на денот облачноста ќе се намалува. Минималната температура ќе биде во интервал од 5 до 13, а максималната ќе достигне од 13 до 21 степен.

Во Скопје, претпладне променливо облачно со услови за слаб дожд. Ќе дува умерен до засилен северен ветер. Попладне облачноста ќе се намали. Минималната температура ќе се спушти до 8, а максималната ќе достигне до 16 Целзиусови степени.

Во наредните денови времето ќе биде сончево со мала до умерена, а на места, особено во северните и источните делови, повремено значителна облачност со услови за слаб дожд. Ќе дува слаб до умерен северен ветер, особено по должина на Повардарието.

ВМРО-ДПМНЕ вечерва одржа протест во Скопје, Струмица, Битола, Тетово и Куманово против, како што велат, неодговорната политика за најгорливото прашање – загадениот воздух. Тие апелираат, поради загадениот воздух, но и пандемијата на Ковид-19, да бидат ослободени од работа бремените жени и хронично болните и во државниот и во приватниот сектор.

Поради зголемениот број на заразени со Ковид-19 во земјава, од партијата одлучиле денешниот протест да го спроведат со намален број на присутни, почитувајќи ги законските мерки на присутност на протест. На протестот се обрати Јелена Жугиќ од ВМРО-ДПМНЕ, која порача дека на прагот на грејната сезона мерните станици за загаденост на воздухот мерат 5-6 пати зголемено количество на канцерогени ПМ-10 честички во воздухот во Скопје, така и во Битола, Тетово, Кичево и во други градови низ Македонија.

„Загадениот воздух убива кога власта е неспособна. Зоран Заев пред 4 години вети дека откако ќе дојде на власт веднаш ќе го подобри квалитетот на воздухот и ќе го намали загадувањето. Зоран Заев ветуваше дека државата ќе инвестира во подобрување на квалитетот на животната средина и атмосферскиот воздух. 4 години потоа Зоран Заев нема спроведено ниту една мерка во насока на намалување на загадувањето. Македонија секоја зима се гуши. Скопјани дишат отров наместо воздух. И ниту Заев, ниту Шилегов како градоначалник на Скопје не направија ништо конкретно за намалување на загадувањето.

Зоран Заев, човекот што на цел глас викаше, верувам се сеќавате „Ајро, Ајро, Ајро“ сега седи во премиерската фотелја во зградата зад нас, дели тендери на потесното семејство и воопшто не му е грижа за граѓаните кои се гушат во смог.

Воздухот никогаш не бил позагаден, а негрижата на власта за здравјето на сопствените граѓани никогаш не била поголема.

ВМРО-ДПМНЕ вечерва остави тегли со чист воздух од врвот на Водно пред Влада, бидејќи воздухот што го дишеме е сè само не е чист. Чистиот воздух станува привилегија. Граѓаните се осудени да се гушат во смог поради неспособната власт и нема да нè изненади ако некоја следна бизнис-идеја за која ќе бидат потрошени народните пари биде токму чист воздух во тегла. Иронично, но за жал крајно, крајно трагично!

Дека нема напредок воопшто и подобрување на полето на квалитетот на воздухот нотира и ЕК(Европската комисија) во нејзиниот најнов извештај за Македонија, каде тие кажуваат дека власта нема направено ништо за намалување на загадениот воздух, ниту централната, ниту локалната, иако се и двете под една партија.

Ова почитувани граѓани е црвен картон и за Заев и за Шилегов.

И сега кога светот е погоден од најголемата пандемија на новиот век загадениот воздух е опасен катализатор за вирусот, бидејќи тој служи како трансмитер на истиот. Се соочуваме со проблеми од невидени размери. Токму затоа побаравме власта најитно да ги ослободи од работа хронично болните и бремените жени, кои се под особена опасност како од пандемијата која галопира, така и од енормно загадениот воздух.

Бараме наместо милијардите дадени за поткуп, тендери и други проневери да се обезбедат пари за намалување на загадувањето, и тоа веднаш. Здравјето на граѓаните нема цена“, порача Жугиќ.

Министерката за труд и социјална политика, Јагода Шахпаска, учествуваше на онлајн панел-дискусија на 13. Национална конференција за рак на дојка на тема „Предизвиците во третманот и лекувањето и на ракот на дојка за време на Ковид-19″, организирана од Здружението за борба против рак „Борка – за секој нов ден“.

На конференцијата се дискутираше за тоа какви промени се потребни за да се подобри квалитетот на услугите, терапијата и третманот на пациентите со рак на дојка во време на Ковид-19.

„Розовиот месец октомври не треба да биде единствениот месец во годината кога разговараме за ова прашање, затоа што болеста не бира во кој период од годината и во која средина ќе се појави. А сведоци сме и на стросната граница која се менува и се појавува во пораните години на животот на секоја жена“, истакна Шахпаска.

Таа посочи дека секој момент треба да се искористи и да се зборува отворено за ракот како болест на денешницата и упати поздрав за секоја иницијатива за подигање на јавната свест по ова прашање. Но, упати и на важноста на поддршката која жените си ја даваат меѓусебно при соочување со овој предизвик.

Министерката ги истакна како особено значајни превенцијата, раното откривање и раниот третман како важен фактор во за зачувување на здравствената состојба на секоја жена.
Во однос на пристапот на лекови, таа посочи дека во нашата земја жените имаат пристап до современи лекови кои ги следат  светските трендови, што е голем исчекор напред во борбата со оваа болест.

Министерката Шахпаска зборуваше и за вклученоста на Министерството во финансиската поддршка која ја добиваат жените за време на терапија која се движи од 6 до 12 месеци, врз основа на степенот и видот на карциномот и паричен додаток за телесна оштетеност.

„Како Министерството за труд и социјална политика ги поддржуваме овие политики, остануваме партнери во подигнувањето на јавната свест преку разни облици на комуникација. Само заеднички можеме полесно да ги пребродиме сите предизвици, воведување нови современи третмани и приближување на европската пракса, но пред сè она што значи женска солидарност, поддршка и заедничка борба со оваа најчеста малигна болест“, истакна Шахпаска.