Љубителите на планинарскиот велосипедизам од утре ќе може да возат по новата нагорна пионерска патека на Водно, која е дел од проектот „Велосипедски парк Водно“.

Официјалното отворање на патеката ќе биде во 12 часот на Средно Водно, а претходно сите велосипедисти се поканети да учествуваат на натпревар во организација на „Прв до врв“. Натпреварот ќе почне во 10 часот од Полициската станица Водно и секој натпреварувач ќе стартува на 20 секунди, а учеството е бесплатно.

Со изградбата на велосипедската патека на Водно се отвора ново поглавје во туристичката понуда на Скопје, но и на Република Северна Македонија.

Тргнувајќи од фактот дека велосипедскиот туризам се реализира преку програмата за развој и промоција на туризмот во шест држави од Западен Балкан, и Град Скопје ја изгради оваа сертифицирана велопатека, која ги исполнува условите за организација на меѓународни натпревари на северните падини на Водно.

Новата планинска велосипедска патека е со променлива широчина (најмногу до 3 метри), со вкупна должина од 3.432 метра и се протега од Полициската станица сè до Средно Водно. За да се зголеми безбедноста на сите посетители на Водно, таа е посебна патека наменета исклучиво за велосипедистите, односно целосно одвоена од патеките на Водно наменети за пешаци и планинари.

Проектот за уредување на оваа планинска велопатека на Водно се реализира во соработка и е кофинансиран од Советот за регионална соработка (Regional Cooperation Council).