Владата на ВМРО-ДПМНЕ за една година изгради и пушти во употреба 71.2 километри експресен пат и автопат, изјави денеска на прес-конференција пратеникот на ВМРО-ДПМНЕ, Бојан Стојановски.

Тој истакна дека Владата го завршила и пуштила во употреба експресниот пат Градско – Дреново, при што завршила две делници од 25.7 километри експресен пат, во крајно брз рок.

Додаде дека се завршени и пуштени во употреба се 25.5 километри од експресниот пат Куманово – Крива Паланка.

-Пред нецели два месеци пуштени се во употреба 20 километри од автопатот Кичево – Охрид, и дополнително се очекува наскоро да биде пуштена уште една делница, а до крајот на 2026 година ќе биде пуштен во употреба целиот пат. Засилено се гради низ цела Македонија, истакна Стојановски.

Тој додаде дека автопатот Тетово – Гостивар исто така треба да биде готов за две и пол години.

-Засилено се работи и на автопатот Прилеп-Битола кој се очекува да биде завршен и пуштен во употреба 2027 година. Во наредните три до четири години цела држава ќе биде испреплетена со автопатска мрежа и мрежа од експресни патишта. Македонија се трансформира. Промените на дело, истакна Стојановски.

Сообраќајот на државните патишта во Македонија денес се одвива без поголеми проблеми, по претежно влажни коловози. Интензитетот на возила е зголемен поради летните одмори, а најголема гужва има на граничниот премин Табановце, каде времето на чекање за влез и за излез од државата изнесува околу дваесет минути. На останатите гранични премини од македонска страна моментално нема подолги задржувања.

Автомото сојузот на Македонија (АМСМ) препорачува возачите да бидат особено внимателни и да ја прилагодат брзината според условите на патот. Од таму апелираат строго да се почитува поставената сообраќајна сигнализација, а управувањето со возилата да биде внимателно особено на делниците низ котлините, речните долини и клисурите, каде постои можност од одрони. Како критични се посочуваат патните правци Катланово – Велес, Маврово – Дебар – Струга, Виница – Берово и Кочани – Делчево.

АМСМ информира дека нивните екипи постојано ја следат состојбата и апелираат граѓаните навремено да се информираат пред поаѓање на пат, со цел да избегнат непријатности и доцнење.

Тврдењата на ВМРО-ДПМНЕ дека реалната плата е двојно зголемена за една година и дека инфлацијата е стабилизирана се „политичка манипулација и целосно игнорирање на реалноста во која живеат над половина милион работници“, соопшти Левица.

Од партијата посочуваат дека, иако власта ја користи тезата за раст на реалната плата од 6,7 проценти како доказ за подобар животен стандард, во реалноста 73,3 проценти од вработените во мај 2025 година примале плата под просечната. Дополнително, една третина од работниците, односно 169.082 лица, преживуваат со плата пониска од 30.000 денари, што е двојно помалку од синдикалната минимална кошница која во август достигна 65.507 денари.

„Ако растот на реалната плата е толку висок, како е можно една третина од работниците да се под прагот на сиромаштија? Овој парадокс ја разобличува суштината и го истакнува фактот дека статистиките на ДПМНЕ не го одразуваат секојдневието на мнозинството граѓани“, велат од Левица.

Партијата укажува и дека тврдењето за просечна инфлација од 3,6 проценти е вештачки измазнето и ги прикрива вистинските поскапувања на храната, енергенсите и кириите, кои во изминатите пет години пораснале за 30 до 40 проценти. „Стабилизирана инфлација постои само на хартија, додека народот се соочува со неизвесност, долгови и осиромашување“, стои во соопштението.

Како решенија, Левица бара итна контрола на цените на основните продукти, зголемување на минималната плата на 500 евра, подобрување на социјалните механизми за заштита, поголема транспарентност во монетарната и фискалната политика и воведување прогресивен и фер даночен систем.

Според Левица, економската политика на ДПМНЕ е насочена кон „одбрана на привилегиите на малцинството, наспроти интересите на мнозинството граѓани“.