Македонија
Филипче: Зголемен е бројот на лекови и биолошка терапија за пациентите со малигни заболувања

Министерот за здравство, Венко Филипче, денеска имаше средба со претставници на здружението „Борка – за секој нов ден“, во кое членуваат пациенти со малигни заболувања. На средбата разговараа за досегашните и за идните активности, како и за предизвиците со кои се соочува оваа група пациенти во услови на корона-кризата.
„Овој изминат период од повеќе од две и пол години навистина имавме многу успешна соработка, ги слушнавме барањата на пациентите, предизвиците и проблемите со кои се соочуваат во целокупниот процес на добивање здравствена услуга од оваа сфера. Во таа смисла, со една огромна инвестиција значајно се зголеми бројот на лекови и биолошка терапија, над 30 молекули во последните две години им се достапни на нашите пациенти и нема ниту еден пациент што сега, за разлика од порано, се упатува во странство за да ја прими оваа терапија. Не постои пациентка со карцином на дојката за која нема лекови, што често беше случај претходно, како и огромен број нови лекови за пациентите со карцином на белите дробови, карцином на кожата итн.“, рече Филипче.
Тој посочи дека оваа криза предизвикана од коронавирусот наметна и други предизвици со кои се соочуваат овие пациенти и кои бараат начини за да се решат. Во таа смисла, рече Филипче, почна дисперзија на терапијата во центрите во државата.
„Засега тој систем функционира во Клиничката болница во Битола, почнува во болницата во Штип и треба да се имплементира во Клиничката болница Тетово, а тоа значи дека во овие центри пациентите од овие региони ќе ја добиваат терапијата наместо да патуваат во Скопје. Уште еден проблем што дополнително треба да се реши е добивањето здравствена услуга во делот на контролните прегледи, рентген-прегледи, мамографија, ЕХО, за што разговаравме за начините на кои може тоа да се надмине во најбрз временски рок, а притоа да не биде дополнително загрозено здравјето на овие пациенти имајќи предвид дека тоа се имунокомпромитирани пациенти и не треба да се мешаат со другите пациенти во чекалниците и во амбулантите“, истакна министерот Филипче и додаде дека овој дел дополнително ќе се разработи во следните денови и ќе може да се имплементира.
Претседателката на Здружението „Борка“, Биба Додева, информира дека пандемијата, како и секаде, така и кај нас, особено на пациентите со малигни заболувања им предизвика проблеми.
„Она што го увидовме заедно во текот на овие неколку месеци е дека може да се дисперзира терапијата, особено таблетарната терапија, и дури и супкутаната терапија, и не само во центрите, туку заедно со помош на Клиниката за онкологија и Црвениот крст се дистрибуира таблетарната терапија до секое место во државата. Значи, им се носи лично на пациентите и тоа нѐ научи дека можеме на поинаков начин да функционираме и ќе изнајдеме решение тоа да биде и практика, т.е. таквото децентрализирано добивање на терапијата да стане дел од програмата. Третата работа со која се соочивме, за жал, сè уште не можеме да ја решиме, а веќе станува проблем, е одложувањето на контролните прегледи и следењето на терапијата. Денеска имавме навистина продуктивен состанок за што дојдоа голем број „борки“, заедно дојдовме до едно решение за кое се надевам дека набргу ќе биде спроведено бидејќи овие пациенти не смее да имаат поголем период од 3-4 месеци прекин во контролата“, рече Додева.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Задутре времен застој на ГП „Делчево“ заради градежни работи

Регионалниот центар за гранични работи „Исток“ ја информира јавноста дека задутре ГП и ГН „Делчево“, односно од бугарска страна ГКПП „Станке Лисичково“ целосно ќе бидат затворени за секаков сообраќај во периодот од 08:00 до 14:00 часот.
Причина за тоа, според официјалното известување добиено од бугарските гранични полициски служби, се градежните работи на патната делница кај ГКПП „Станке Лисичково“. По завршувањето на работите сообраќајот и функционирањето на граничните премини ќе продолжи непречено да се одвива.
Македонија
Апел за поддршка: Помогнете на ранливите граѓани да аплицираат за субвенција за струја

Инженери на Република Македонија упатија апел до јавноста за помош на ранливите категории граѓани во процесот на аплицирање за финансиска поддршка од Министерството за енергетика. Станува збор за јавен оглас за субвенција од 1.000 денари месечно на сметката за електрична енергија, кој важи 12 месеци.
Апелот е насочен кон инженери, техничари, информатичари и сите граѓани што се снаоѓаат со институционални постапки, да им помогнат на лица со интелектуална или телесна попреченост, целосна слепост или глувост, лица во социјален ризик и сиромаштија, кои се соочуваат со бариери при собирање на документи, пополнување формулари и поднесување на пријави.
Постапката за аплицирање вклучува преземање формулари од www.energy.gov.mk, фотокопирање документи, обезбедување на нотарска изјава и испраќање на пријавата по пошта во затворен плик. Рокот за пријавување е 30 дена од денот на објавата на јавниот оглас.
Според Државниот завод за статистика, над 38.000 домаќинства примаат гарантирана минимална помош, но само околу 4.000 домаќинства ја користат оваа субвенција. Останатите над 90 отсто не аплицираат, најчесто поради технички пречки, а не поради неисполнување на условите.
Македонија
ВМРО-ДПМНЕ: Матните времиња во енергетскиот сектор завршија со заминувањето на СДС во опозиција, а доказ за тоа е бегството на Васко Ковачевски заради милионски криминал

Матните времиња во енергетскиот сектор завршија со заминувањето на СДС и ДУИ во опозиција.СДС никако да се помири со фактот дека веќе се опозиција и дека не можат да местат матни тендери во енергетиката, од кои длабоко профитираа, реагира ВМРО-ДПМНЕ на прес-конференцијата на СДСМ.
„Ако заборавиле, да ги потсетиме, нивниот директор на ЕСМ, Васко Ковачевски е во бегство за сторен милионски криминал, токму од такви матни тендери договорени во четири очи.
СДС се тие коишто ЕСМ го наследиле со 20 милиони евра на сметка, а за седум години, токму поради нивните матни тендери наместени во четири очи, го оставија со минус од 80 милиони.
Договарањата зад затворени врати за лични интереси на СДС и на нив блиските, го доведе енергетскиот сектор до фаза на целосно уништување, додека нивните профитирале милиони.
Додека сега, Владата предводена од ВМРО-ДПМНЕ посветено работи Македонија да ја на направи енергетски независна и земја раскрсница за набавка и транзит на енергенси.
Дел од реализацијата на тој план е и инвестицијата на ветерниот парк на компанијата „Алказар Енерџи“ во вредност од 500 милиони долари, која претставува една од најголемите енергетски инвестиции од независноста“, се вели во партиската реакција.