Општина Карпош го објави јавниот оглас за субвенционирање на купување нови велосипеди за жителите од општината.

Акцијата започнува од денеска и ќе бидат доделени субвенции на граѓани кои ќе купат нов велосипед, не порано од денеска, 7 мај.

Субвенцијата подразбира покривање на дел од трошоците, во износ од 30% од сумата за платен велосипед, но најмногу до 3.000 денари.

За оваа намена, Општината издвои финансиски средства од својот Буџет во висина од 500.000 денари, а субвенционирањето ќе се одвива по принципот – „прв дојден, прв услужен“. Заинтересираните физички лица при аплицирање за субвенции за велосипеди, треба да ги достават следните документи:

– Барање за субвенција за нов велосипед;

– Фотокопија од лична карта;

– Фотокопија од трансакциска сметка;

– Фискална сметка со сметкопотврда или фактура за купен велосипед, кој е купен не порано од петок (07.05.2021);

– Изјава за согласност за обработка на лични податоци;

Жителите кои веќе оствариле право на субвенција за велосипед и за тоа добиле средства од Град Скопје, немаат право да учествуваат на огласот.

Аплицирањето ќе се врши преку пополнување на бараните документи, преку архивата на општина Карпош. Од понеделник (10.05.2021) аплицирањето ќе може да се врши и по електронски пат, преку мобилната апликација „мЗаедница“ (достапна за IOS и Android), како и на веб страната www.m-zaednica.mk при што е потребно, секој од горенаведените документи да биде скениран и прикачен на соодветното место.

Министерството за здравство соопшти дека вакцинацијата се одвива непречено на сите пунктови низ државата. Исто така се наведува дека интересот за вакцинација секојдневно се зголемува, а во моментов пријавени преку веб платформата vakcinacija.mk се над 256.346 граѓани.

„ На вакциналните пунктови во државата заклучно со вчера вакцинирани се вкупно 84.312 граѓани. Прва доза вакцина вчера примиле 10.135 граѓани, а вчера вкупно се вакцинирале 12.606 граѓани. Во државата вкупно вакцина и ревакцина примиле 104.962 граѓани, а две дози примиле 20.650 граѓани. Со последните бројки 28% од населението над 70 години имаат примено барем една доза вакцина“ соопшти министерството.

Вакцинацијата се спроведува согласно Националниот план за имунизација. Се вакцинираат возрасни лица, граѓани кои искажале интерес за вакцинација на веб страницата vakcinacija.mk а се вакцинираат и лица вработени во критична инфраструктура. Масовна вакцинација се одвива во неколку градови во државата и тоа во А1 СЦ Борис Трајковски во Скопје, во спортсите сали во Кавадарци, Куманово, Тетово, Штип, Битола и Охрид.

Министерството за здравство апелира до граѓаните масовно да се пријавуваат на vakcinacija.mk бидејќи тоа е најлесниот и најбрз пат да се вакцинираат.

Доколку продолжи бугарската блокада на Македонија, Брисел би можел да ги раздвои разговорите со Скопје и Тирана за членство во ЕУ и да ги продолжи пристапните преговори со Албанија, вели комесарот за проширување Оливер Вархели, во интервју за Еуроњуз.

Иако понудите за преговори за членство во ЕУ отсекогаш биле заедно за двете земји, сепак би можело да дојде до измени на процесите, додава Вархеји.

„ Ако повторно наидеме на тешкотии со Северна Македонија, што значи дека не сме успешни во убедувањето на Бугарија и Северна Македонија за заемно согласно решение, тогаш прашањето е дали можеме да одиме напред само со Албанија. И ќе мора да го разгледаме тоа прашање“, рече тој.

На прашањето дали формално „раздвојување“ е опција, тој одговори: „Можеби е опција, да“.

Оваа можност за раздвојување на преговорите со двете земји Вархеји ја најави и за време на посетата на Скопје.

За разлика од Вархеји, некои земји членки на ЕУ како Германија и Австрија се против можноста да се разделат преговорите, поради бугарската блокада кон Скопје.