Македонија
(Фото) Отворен нов спортско-рекреативен центар во 11 Октомври – Бараки

Синоќа, во присуство на бројни граѓани и спортски ентузијасти, градоначалникот Орце Ѓорѓиевски свечено го отвори новиот спортско-рекреативен центар во населбата 11 Октомври – Бараки. Новиот парк претставува дел од поширокото парковско зеленило, заедно со уште два претходно изградени парка во околината, со што се заокружува вкупна зелена површина од 20.000 метри квадратни, само во оваа населба. На настанот, во употреба беше пуштено ново повеќенаменско игралиште, изградено со финансиска поддршка од компанијата ВЛТ, како и ново одбојкарско игралиште. Новото игралиште е посветено на прерано починатиот Драган Крстев , верен член на „Комити“, а теренот беше отворен симболично со натпревар помеѓу “Комити” од Драчево и од Кисела Вода.
– Вечерва заедно со жителите на населбата 11 Октомври – Бараки отвораме нов спортско-рекреативен центар, со што оваа урбана заедница добива ново зелено и мултифункционално јадро. Со овој парк, и со претходно изградените два парка во близина, општина Кисела Вода добива нови 20.000 квадратни метри парковска површина – инвестиција од огромно значење и за здравјето на жителите и за социјалната кохезија, бидејќи парковите се воедно и белите дробови на градот и простори за заедништво и активен живот.
Особено ми е драго што вечерва го отвораме и новото мултифункционално игралиште, изградено со поддршка од компанијата ВЛТ. Ним им упатувам голема благодарност за покажаната општествена одговорност и за вложувањето во заедницата. Ова игралиште го посветуваме на прерано починатиот Драган Крстев, како мал, но искрен симбол на сеќавање на него. Голема благодарност до неговото семејство што е вечерва со нас. Неговото име ќе живее преку детската игра, спортскиот дух и смеата што ќе одекнува од овде.
Дополнително, во непосредна близина изградивме и одбојкарско игралиште, со што се прошируваат можностите за спорт и рекреација за младите и сите жители.

default
Создавањето на вакви центри за спорт и рекреација, кои веќе ги имаме преку 20, е наша визија и заложба што ја реализираме веќе 3.5 години. Би потсетил дека во оваа населба, во рамки на мојот мандат, беа направени и 1450 метри фекална канализација, а целосно ги реконструиравме и улиците „Петар Драпшин“ со краците, „Ефтим Спространов”, “Лазар Димитров”, “Лав Tолстој“…
Голема благодарност до сите кои помогнаа проектот кој вечерва го промовираме да стане реалност, и посебно до комитите од Драчево и Кисела Вода кои ќе го отворат теренот со симболичен ревијален натпревар. Продолжуваме посветено, со уште поголема енергија-изјави градоначалникот Орце Ѓорѓиевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Минчев: Силна јавна администрација како основа за силна Македонија

Министерот за јавна администрација, Горан Минчев, учествуваше на свеченото отварање на 30-ти Јубилејни спортски игри и средби на Синдикатот на УПОЗ, кое се одржа во Охрид. Во своето обраќање, Минчев истакна дека овие игри не се само спортска манифестација, туку и симбол на заедништвото, солидарноста и силата што доаѓа од заедничката борба на јавниот сектор и синдикатите.
„Денес не отвораме само спортски игри. Денес отвораме едно поглавје на заедништво, истрајност и солидарност што трае веќе 30 години. Јубилејните игри на Синдикатот на УПОЗ се не само симбол на спортот и дружењето, туку и на борбата за правата и достоинството на трудот во јавниот сектор“, изјави Минчев.
Министерот потенцираше дека јавната администрација е срцето на државата и истакна дека само преку силна, обучена, мотивирана и заштитена јавна администрација може да се создаде држава која ќе му служи на граѓаните, а не на интересите. Тој истакна дека реформите во јавниот сектор треба да се темелат на човекот и на неговите права, а не на партиски интереси.
„Македонија не е само територија, Македонија сме ние, секој службеник, секоја медицинска сестра, наставник, полицаец, инспектор. Македонската администрација е основата на секоја модерна и успешна држава“, нагласи Минчев.
Министерот на крајот на своето обраќање им посака успех на учесниците на спортските игри и истакна дека вистинската сила лежи во заедништвото и поддршката на секој поединец во јавниот сектор.
„Нека овие игри бидат потсетник дека вистинската сила лежи во заедништвото. Нека вашата борба и денес биде борба за подобра иднина, не само на теренот, туку и во секоја канцеларија, на секој шалтер, на секое работно место кај што твори јавниот службеник“, заврши Минчев.
Македонија
СДСМ нема да му се извини на Љутков: „Сѐ што објавивме е вистина“

Од СДСМ велат дека нема да му се извинат на министерот за култура, Зоран Љутков, затоа што, како што велат од партијата, сѐ што објавиле за него е вистина, а имаат и документи кои го потврдуваат тоа.
„СДСМ не може позитивно да одговори на барањето за извинување на министерот за култура и туризам Зоран Љутков затоа што ја објавивме вистината. Зарем очекува Љутков да му се извинуваме за тоа што СДСМ, а не тој, зборувавме за не исплатените плати на културните работници за Велигден кои тој ги остави сами себе? Или очекува да му се извинуваме што ја соопштивме болната вистина за непочитување на колективниот договор, според кој платите се зголемија само за 5,5 %, а требаше многу повеќе? Дали Љутков очекува да му се извинуваме и затоа што го фативме жив на егзотичните патувања вредни над 50.000 евра, пари на граѓаните? Или за неговото незаконско работење со унапредувања на негови блиски?“, прашува СДСМ.
Од партијата го прашуваат министерот дали очекува извинување затоа што објавиле низа скандали со државната секретарка Ѓоргова или за плановите за продажба на културното наследство?
„Или мисли дека некој треба да му се извини затоа што Љутков нема објавено никаква стратегија или план за развој за културата и туризмот. Она што го говори СДСМ е апсолутна вистина и затоа ги објавуваме документите кои го потврдуваат кажаното“, велат од СДСМ.
Партијата очекува надлежните институции веднаш да преземат мерки за санкционирање.
„Ние ќе продолжиме да ги објавуваме сите незаконски постапки, сите аздисувања на Љутков и гласно ќе говориме за неговата неспособност“, велат од СДСМ.
Македонија
Николоски: Позицијата на Македонија станува афирмирана во Европа

Дали Извештајот за Македонија ќе се усвои оваа недела и следната во Европскиот Парламент не менува ништо. Ова се историски работи кои остануваат непроменети. Тоа е голем историски чекор, нашата позиција станува афирмирана и призната и тоа е нешто за поздравување иако имаме голем и долг пат пред себе, вели вицепремиерот Александар Николоски во однос на Предлог-извештајот за Македонија кој треба да биде усвоен во Европскиот Парламент.
„Од вистината не се бега, прашање на време е само кога ќе излезе, а во европските институции полека излегува. Извешатој е коректен, нема ништо што е надвор од вистината или што не соодејствува на реалноста и само го потврдува она што сите го знаеме, а тоа е дека Македонија и македонските гарѓани не се случајни, не се вештачки насадени на Балканот туку имаат долга и вековна традиција која што на сите ние е позната. Одредени други сакаат да ја негираат и да речат дека тоа не е така, но и оваа вистина излезе. Годините на претходната Влада, тоа беа години на национално понижување, години кој што никој не смее да ги заборави затоа што тие години треба да се потсетник и предупредување за да не ни се случат истите работи за годините пред нас, за да не ни се појават анационални ликови кои би имале клучни позици или би не воделе. Сега има Влада која е патриотски насочена и која ги брани националаните интереси”, истакна вицепремиерот Николоски.