Првиот вицепремиер, Изет Меџити, вети дека ќе има правда не само за трагедијата со пожарот во Кочани, каде што загинаа 59 лица, а над 100 беа повредени, туку и за другите тешки случаи што ја потресоа земјата, како несреќата со „Беса Транс“, пожарот во модуларната болница во Тетово и трагичната несреќа во Ласкарци. Тој нагласи дека Северна Македонија доживеала многу трагедии со тешки последици, но правдата недостасувала, а државата повеќе нема да седи со скрстени раце.

„Додека се молиме за преживеаните и се подготвуваме да ги испратиме трагично загинатите на 16 март, како Влада ветуваме дека горчливата лекција од Кочани е научена, пораката е примена: државата нема да седи со вкрстени раце и нема да дозволи правдата да заталка и да се девалвира низ институционалните лавиринти изградени да ги штитат токму недопирливите!“, напиша Меџити.

Тој истакна дека Владата ќе работи на тоа правдата да не остане само концепт заробен од мафијата и ендемската корупција.

„Нашата борба за подобра Македонија ќе има смисла само тогаш кога оние кон кои системот бил неправеден ќе почувствуваат дека правдата, сепак, не е заробена од мафијата која ја контролира државата, како што за жал тоа било случај со години наназад, и дека нивните повици за правда ќе наидат на одговори и реакција.“

Според Меџити, трагедијата во Кочани треба да биде потсетник за институциите дека не смеат да дозволат повторување на вакви несреќи.

„Кочани е нашата совест која што повикува на дејствување. Кочани е нашиот непребол кој налага реакција. Кочани е катарза на скапаниот систем и ендемската корупција вкоренети длабоко низ институциите кои што ги уништуваат човечките животи.“

Тој ги увери граѓаните дека државата ќе преземе мерки и ќе има одговорност за сите случаи во кои животите на граѓаните биле загрозени поради негрижа и корупција.

„Но, државата ќе дејствува! Одговорност ќе има! Правда ќе има: за Кочани, за ‘Беса Транс’, за Тетовската болница, за Ласкарци, за сите трагедии предизвикани од корупција и неказнивост, а чии што последици се човечки животи!“

ССНМ го осудува неетичкото известување на некои од медиумите од денешните погреби на жртвите од трагедијата во Кочани

И покрај сите предупредувања и договорениот безбедносен протокол и насоките за етичко известување од погребот на жртвите од трагедијата во Кочани, денес е забележано нарушување на основниот кодекс за почитување на приватноста на погодените, што беше опфатено и во протоколот што со направија Владата на РСМ, ССНМ и ЗНМ.

Повеќето од домашните медиуми, со неколку отстапки, го почитуваа договорот и се придржуваа до насоките и информираа коректно, но неколку странски медиуми се обидоа да привлечат гледачи и читатели на најнепримерен начин.

Самостојниот синдикат на новинарите и медиумските работници ги осудува постапките на некои од медиумите и смета дека со начинот на информирање (преноси во живо) ги нарушија стандардите за етичко новинарство и дополнително ја зголемија болката кај погодените, но и кај публиката.

ССНМ уште еднаш ги замолува претставниците на медиумите и во следните денови на жалост да ја остваруваат својата основна улога – да информираат, но да бидат внимателни со чувствата на граѓаните и да ги почитуваат етичките кодекси.

Владата апелира медиумите да се придржуваат до етичките принципи.

„Во овие тешки моменти уште еднаш го повторуваме упатениот апел до медиумските екипи што присуствуваат на денешниот погреб на жртвите од трагичниот пожар, кој настана во кочанската дискотека, да се придржуваат до етичките принципи. Повеќето од медиумите не емитуваат и не шират фотографии и видеоматеријали од семејствата на настраданите, а оние што објавиле такви содржини – уште еднаш апелираме да се придржуваат до етичкото информирање“, посочуваат од Владата.

Чувствителноста на трагедијата и личната болка на семејствата во овој момент не треба да бидат цел на сензационализам, емотивни наративи, фотографии и видеа, додаваат од таму.

„Ги повикуваме медиумите да ги почитуваат приватноста и достоинството на семејствата и во никој случај со медиумското известување не треба да се предизвика лично вознемирување и вознемирување на јавноста. Уште еднаш упатуваме апел до медиумите да пренесуваат проверени факти, да избегнуваат шпекулации и дезинформации, да ја запазуваат приватноста на семејствата на жртвите. Во исто време им се заблагодаруваме на медиумите што известуваа професионално и ги почитуваа препораките за известување од погребот на жртвите од трагичниот настан“, завршуваат од Владата.