Министерката за труд и социјална политика, Мила Царовска, се сретна со пензионерите од Тетово, со кои разговараше за најавеното зголемување на пензиите, но и за други актуелни прашања поврзани со повозрасната популација.

„Со пензиската реформа, само за една година направивме заштеда во Фондот за пензиско и инвалидско осигурување од 3 милијарди денари, а минималната плата порасна 15 отсто, што ни дава право да направиме трето усогласување на пензиите, кое ќе биде законско. Во јануари 2020 година сите пензии ќе пораснат 700 денари и дополнително ќе се усогласат со 160 до 200 денари, со што до крајот на 2020 покачувањето ќе изнесува приближно 900 денари“, рече Царовска.

Министерката истакна дека покачувањето се прави плански со издржани пресметки и во услови кога имаме стабилизација на пензискиот систем, но и кога имаме раст на економијата во државата.

Илија Ивановски, заменик-директорот на Фондот за пензиско и инвалидско осигурување, истакна дека пензиите се покачуваат во време кога приходите на Фондот за ПИО се зголемени 10 отсто.

Претседателката на Сојузот на здруженијата на пензионерите, Станка Трајкова, рече дека секој заслужува достоинствен живот и истакна дека дополнителните 700 денари, што ќе ги добијат сите пензионери, ќе значат најмногу токму за пензионерите со минималните пензии, а такви се 44 проценти од вкупниот број пензионери.

На средбата во Тетово присуствуваше и претседателот на тетовското Здружение на пензионерите, Селвер Амети.