Министерот за здравство Азир Алиу денес ги презентира реформските процеси на состанокот на секторската работна група за здравство, што се одржа во Владата.

„Здравството претставува темел на стабилно, просперитетно и демократско општество. Нашата заедничка цел е да изградиме модерен, одржлив и европски здравствен систем – систем што ќе биде ефикасен во превенцијата, навремен во дијагностиката, квалитетен во лекувањето и еднакво достапен за сите граѓани. Продолжува тековната имплементација на ИПА II и ИПА III-проектите, напредокот на националниот систем за трансплантација, како и реализацијата на инфраструктурните инвестиции во здравствениот сектор“, рече во обраќањето Алиу.

Тој посочи дека Министерството финализира и усвои повеќе стратешки документи со долгорочно значење за јавното здравје, меѓу кои стратегијата за ретки болести како прв системски документ што поставува јасни цели за дијагностика, третман и поддршка на пациентите и нивните семејства, стратегијата за сексуално и репродуктивно здравје, која го зајакнува пристапот до квалитетни, инклузивни и правично достапни услуги за сите категории население и акцискиот план за превенирање на последиците од топлотни бранови врз здравјето на населението 2025 – 2030, кој претставува современ, превентивен и интерсекторски документ подготвен во согласност со европските стандарди и препораките на ЕК и СЗО.

На состанокот учествуваа претставници од делегацијата на Европската Унија, Светската здравствена организација, УНИЦЕФ и Светската банка, чија поддршка е од исклучително значење за унапредување на здравствениот систем и за негово усогласување со стандардите на Унијата.

„Ова е јасен доказ за заедничката определба за системско унапредување на здравствениот сектор и за поддршка на реформските процеси што нашата држава ги спроведува на патот кон Европската Унија“, истакна Алиу.