Во текот на денешниот ден ЈП Водовод и Канализација – Скопје заедно со комунални инспектори од Град Скопје спроведуваат акција за исклучување на диви приклучоци на територијата на општина Сарај.

„Покрај многубројните апели за разумно и рационалното користење на водата во периоди на високи температури како и информациите за зголемена потрошувачка на водата упатени до граѓаните, ЈП Водовод и Канализација – Скопје регистрираше голем број на диви приклучоци кои дополнително ја оптеретуваат мрежата и вршат злоупотреба на истата. Акцијата ќе продолжи и во наредниот период се до целосно нормализирање на состојбата“, велат од Водовод.

Оттука апелираат за разумно користење на водата од страна на сите граѓани на целата територија на град Скопје.

Во првите три месеци од спроведувањето на социјалната реформа детски додаток им се исплаќа на 20.230 деца, што е трипати повеќе од претходно. Оваа бројка очекуваме да расте и ги повикуваме родителите корисници на гарантиран минимален приход или имаат минимална плата да аплицираат во меснонадлежните центри за социјална работа за користење на ова право.

„Со социјалната реформа Министерството за труд и социјална политика ја прошири достапноста на детскиот и образованиот додаток за неколку категории семејства. Освен примателите на социјална помош, сега овие два надоместока може да ги користат и тричлените семејства со приходи до 11.400 денари, четиричлените семејства со приходи до 13.800 денари и петочлените семејства со приходи до 15.000 денари.

Со социјалната реформа обезбедивме поправедна распределба на додатоците наменети за децата, со што директно влијаеме на намалување на сиромаштијата, особено на детската сиромаштија. На овој начин се овозможува еднаков почеток во животот за сите деца“, соопшти Министерството за труд и социјална политика.

Претседателот на собраниската Комисија за избори и именување, Илија Димовски, вели дека и изборот и разрешувањето на СЈО е регулирано со специјалниот закон и не може и не смее да се применува друг закон.

„И изборот (член 3) и разрешувањето (член 18) на СЈО е регулирано со специјалниот закон и не може и не смее да се применува друг закон. Постапката е строга зашто и институцијата е значајна. Во двете постапки (и избор и назначување) Собранието на Република Македонија и Комисијата за прашања на изборите и именувањата не може, ниту смее да се прескокнат, односно ниту да се разреши СЈО ниту да се назначи вршител на функцијата СЈО, без овие две инстанци во постапката.

Советот на јавните обвинители во постапката за избор и назначување на СЈО може да постапува само по предлог на Собранието, претходно утврден од Комисијата за избори и именувања, а изгласан со двотретинско и Бадинтерово мнозинство.

Советот и на јавните обвинители во постапката за разрешување може да постапува само како предлагач, односно да достави извештај до Собранието за утврдено незаконито, нестручно и несовесно вршење на функцијата СЈО. Конечната одлука во оваа постапка ја носи Собранието на Република Македонија. Сè друго е надвор од законите“, напиша Димовски на „Фејсбук“.