Градоначалникот на Град Скопје, Орце Ѓорѓиевски оствари средба со британскиот амбасадор во Република Македонија, Метју Лосон, како и со делегација од Обединетото Кралство, на која беа разгледани можностите за унапредување на соработката меѓу Скопје и Обединетото Кралство.

На средбата се разговараше за развојните планови и стратешките приоритети на Град Скопје, со посебен акцент на образованието, културата, локалниот економски развој и креативните индустрии, како и за потенцијалната поддршка во рамки на проектот „Европска престолнина на културата 2028“.

„Во рамките на средбата го запознав амбасадорот Лосон со програмата и плановите за развој на Скопје, кои се темелат на јасна визија, конкретна стратегија и долгорочни, одржливи политики, насочени кон унапредување на квалитетот на живот на граѓаните.

Разговаравме и за можностите за понатамошно продлабочување на соработката преку заедничка реализација на проекти, програми и активности од заемен интерес, со посебен акцент на образованието и културата, како и преку размена на позитивни искуства и успешни практики во областа на локалниот економски развој и креативните индустрии.

На работниот состанок, беше отворено и прашањето за потенцијална соработка и поддршка во рамките на активностите поврзани со проектот „Европска престолнина на културата 2028“, вклучително и неговата меѓународна промоција и вмрежување со европските градови, како значаен чекор кон меѓународна афирмација на Скопје“, истакна Ѓорѓиевски.

Градоначалничката на Општина Кисела Вода, Бети Стаменкоска Трајкоска изврши увид во спортската сала „Независна Македонија“, која се наоѓа во кругот на ООУ „Невена Георгиева Дуња“, каде што се реализираа повеќе зафати за унапредување на условите во овој спортски објект.

Во рамки на извршените активности, набавени и монтирани се нови ЛЕД рефлектори со моќност од 200W и 400W, кои се енергетски ефикасни и еколошки, со што значително е подобрено осветлувањето во салата. Дополнително, извршена е замена на сигурносните вентили за висок притисок на топловодната инсталација, како и зајакнување на кровната конструкција.

Сите зафати се реализирани согласно актуелните потреби и важечките стандарди, со јасен фокус на безбедноста и подобрување на условите за учениците и корисниците на салата, соопштија од општината.

-Унапредувањето на спортската инфраструктура е наша обврска, но и искрена желба. Со овие инвестиции обезбедуваме побезбедни и поквалитетни услови за спорт и физичка активност на нашите деца. Верувам дека вложувањето во вакви објекти директно придонесува за здрав развој, спортски дух и позитивни навики кај младите. Ќе продолжиме посветено да работиме на создавање подобри услови за образование, спорт и развој на младите генерации- изјави градоначалничката Бети Стаменкоска Трајкоска.

Собраниска делегација оствари повеќе средби во Кнесетот на Израел. На средбата со Претседателот на Групата за пријателство со Собранието на РС Македонија, Хамад Амар и членовите на Групата Тсега Мелаку и Владимир Белијак, беше истакнато дека соработката меѓу двата парламента претставува важен и вокален дел на целокупната билатерална соработка. Пратеничката група за соработка со Кнесетот, која се формира во континуитет во сите парламентарни мандати, е само еден израз на интересот на Собранието да покаже цврста определба и интерес да одржува блиски контакти со Кнесетот.

На средбата пратениците разменија видувања за актуелната политичка и безбедносна ситуација во Израел и на Блискиот Исток, геостратешките влијанија врз безбедносната архитектура на глобално ниво, како и за визиите за траен мир. Чекорот напред кон траен мир во регионот на Блискиот Исток и кој стави крај на војната во Газа, што неодамна се постигна со посредство на американскиот претседател Трамп, влева надеж во остварување на вековните аспирации за мир, просперитет и соживот на овој дел од светот.

Делегацијата беше примена од спикерот на Кнесетот, Амир Охана, при што на средбата беше особено истакната вредноста и значењето на парламентарната дипломатија, која дава посебен печат во севкупните односи меѓу Република Северна Македонија и Државата Израел. Соговорниците се согласија дека парламентарната соработка треба да продолжи и во иднина што несомнено ќе придонесе за подобра и конструктивна соработка на билатерален план. Ефективните придобивки од градењето на блиски релации меѓу двата парламента претставуваат додадена вредност на севкупните билатерални односи. Спикерот Охана изрази голема благодарност што РС Македонија го поддржува Израел во одбрана на својот суверенитет и дава поддршка и во меѓународните организации и форуми.

Делегацијата оствари средба со претседателот на Комитетот за одбрана и надворешни работи на Кнесетот, Боаз Бизмут. Се разговараше за актуелните случувања на Блискиот Исток, тензиите во Иран и демилитаризацијата на Хамас како втора фаза од Планот на Трамп за Газа. Притоа, беше истакната важноста на соработката со други земји и потребата од силна одбрана на една држава како нејзин витален и стратешки интерес.

Делегацијата ги поздрави одличните тридецениски дипломатски односи меѓу РС Македонија и Државата Израел и се заложи за искористување на нивниот потенцијал во многу области каде Израел остварува извонредни резултати. Особено беше истакнато дека добар пример од Израел што треба да го примениме во нашата земја е враќање на дијаспората, како да се задржат младите во земјата и да се подигне наталитетот, за што беше побарана стручна помош во креирање на акциски план за ова прашање, по примерот на Израел. Во однос на сличните политички и општествени предизвици кои постојат во Израел и во земјите од регионот на Западен Балкан како сензитивен регион, соговорниците ја потенцираа важната улога на парламентарците во одржување на дијалог и релаксирани мултикултурни општествени односи.

Во Министерството за надворешни работи на Државата Израел, делегацијата оствари одделни средби со Министерот за надворешни работи Гидеон Сар, и со заменик-директорката на МАШАВ (MASHAV), официјална Израелска агенција за меѓународна развојна соработка, Ирит Савион-Вајдергорн.

Со министерот Сар, Делегацијата оствари продуктивни разговори за надворешно-политичките односи меѓу РС Македонија и Државата Израел, при што беше истакната важноста на овие релации и позитивната соработка во мултилатералните форуми. Особено се цени ставот на нашата земја во ситуации кога има обиди за делегитимирање на Израел на меѓународен план, со што се демонстрира високото ниво на одлични билатерални односи.

Делегацијата се заблагодари за ургентната медицинска и стручна докторска помош за настраданите граѓани од трагичниот пожар во дискотеката „Пулс“ минатата година како гест на Влада на наша блиска и пријателска земја.

Домаќините изразија подготвеност да споделат искуства и да ја развијат меѓусебната соработка во земјоделието, управувањето со водата, нови технологии, кибербезбедност, вештачка интелигенција, здравство и сл.

На средбата во МАШАВ (MASHAV), официјална Израелска агенција за меѓународна развојна соработка, основана во 1958 г. и функционира во рамки на Министерството за надворешни работи на Израел, делегацијата оствари средба со заменик-директорката Ирит Савион-Видергорн, која ја запозна делегацијата со активностите на Агенцијата.

Во организација на Министерството за здравство на Државата Израел, Делегацијата имаше средба со втората група доктори и медицински персонал кои беа испратени на ургентна мисија во справувањето со здравствените последици на преживеаните македонски граѓани од пожарот во дискотеката во Кочани. Претседателката на Групата, Рашела Мизрахи и сите членови на делегацијата изразија длабока благодарност за драгоцената помош дадена уште во првите часови по несреќата, при што на целиот медицински тим им беа врачени подароци како израз на благодарноста од сите македонски граѓани во спасување на голем број млади животи. Во име на Претседателот на Собранието, Африм Гаши и во име на сите пратеници беше врачена посебна благодарност до Министерството за здравство на Државата Израел.