Сите државни патишта во земјата се проодни и безбедни за сообраќај, соопшти Министерството за транспорт. Сообраќајот се одвива непречено, но поради актуелните врнежи од снег надлежните препорачуваат внимателно и прилагодено возење.

Јавното претпријатие „Македонија пат“ информира дека нивните екипи се целосно мобилизирани, со располагање на потребната механизација и работна сила, и во континуитет вршат расчистување на снегот на терен. Активностите се координираат со ЈП за државни патишта и Министерството за транспорт со цел да се обезбеди безбедно и непречено одвивање на сообраќајот низ целата држава.

Од Министерството апелираат возачите задолжително да користат зимска опрема, да ја почитуваат поставената сообраќајна сигнализација и да ја прилагодат брзината на условите на патиштата. Дополнително, се препорачува навремено информирање преку сите достапни информативни центри за состојбата на државните патишта.

Координираните активности на надлежните институции ќе продолжат и во наредниот период.

По снежните врнежи кои го зафатија цело Скопје, општина Кисела Вода од раните утрински часови спроведува интензивни активности за чистење и одржување на патната инфраструктура со цел обезбедување безбедно и непречено одвивање на сообраќајот, извести Општината.

„Активиран е Кризниот штаб на општина Кисела Вода, кој е во постојана комуникација со сите надлежни служби и ја координира работата на терен, овозможувајќи ефикасно справување со зимските услови.

Со целосно ангажирана и расположлива механизација, камиони и екипи, континуирано се работи на расчистување на снегот и посипување сол на критичните точки каде што е евидентирана појава на мраз. Во моментов, активностите се одвиваат во населбите Припор, Пинтија и Драчево, како и пред градинките, училиштата и автобуските постојки.

Ангажирани се сите сезонски работници, а екипите се постојано присутни на терен за навремено да одговорат на сите пријави и состојби кои би можеле да го отежнат сообраќајот и секојдневното функционирање“, велат од Општината.

Општина Кисела Вода апелира до граѓаните за зголемена внимателност при движењето и почитување на сообраќајните правила, додека општинските служби продолжуваат со активностите сè до целосна стабилизација на состојбата.

За пријавување на проблеми поврзани со снег, замрзнати улици или отежнат пристап, граѓаните можат да се обратат на следните телефонски броеви:

Димитар – +389 72 443 500

Дарко – +389 78 383 746

Здружението на судиите искажа поддршка на институциите во борбата против организираниот криминал и корупцијата, по притворaњето на судија од Апелациониот суд во Скопје.

Во соопштението, Здружението нагласува дека очекува темeлна, прецизна и транспарентна истрага за да се утврдат сите факти и евентуалната инволвираност на други лица, без селективност и со почит кон законските процедури.

Во случај на докажана корупција, Здружението јасно се оградува од секој корумпиран судија или носител на судска функција кој го нарушува интегритетот на судскиот систем, но истакнува дека таквите појави не треба да се поврзуваат со огромното мнозинство судии кои чесно ја извршуваат функцијата.

Организацијата бара целосно почитување на угледот на чесните судии и воздржаност од генерализации кои ја поткопуваат довербата на граѓаните во правосудниот систем.

Здружението на судиите нагласува дека секоја постапка мора да се спроведе со почит на принципот на пресумпција на невиност и без сензационализам, покажувајќи достоинство, неселективен пристап и почитување на човековите права.