Македонија
Шахпаска: Се подготвува ново законско решение за вработување на лицата со различна попреченост
Министерката за труд и социјална политика, Јагода Шахпаска, по повод одбележувањето на 23 септември – Меѓународниот ден на знаковниот јазик, учествуваше на тркалезна маса на тема „Социјалната положба и невработеноста кај глувите и наглуви лица, застапеноста на знаковниот јазик во нашата држава и процесот на негова стандардизација“, во организација на Националниот сојуз на глуви и наглуви на Република Северна Македонија.
Taa истакна дека концептот „Едно општество за сите“ значи вклучување на сите граѓани во редовните секојдневни текови во нашата земја.Таа додаде дека Националниот сојуз на глуви лица ја добива поддршката од Министерството за труд и социјална политика, преку годишната програма за поддршка на невладини организации и национални сојузи за подигање на свеста, како и за подобрување на нивниот стандард.
„Министерството за труд и социјална политика изготвува ново законско решение за вработување на лицата со различна попреченост, вклучувајќи ги и глувите и наглуви лица“, рече Шахпаска.
Министерката истакна дека се разговара и за различни модели и на кој начин глувите лица ќе бидат вклучени во работниот процес, со цел да можат да заработуваат за сопствена егзистенција и да бидат независни во системот.
„Тоа што го испорачавме во социјалната реформа е посебниот додаток што го примаат овие граѓани во државата. Вкупно на број ги има околу 7.000, но тоа што исто така како новина го работиме во Министерството е да правиме инклузија на децата на предучилишна возраст. Во моментов работиме на анализата на вкупниот број дечиња, до шест години кои имаат или сериозно оштетување на звукот или се глуви, за да можат секојдневно да бидат присутни во градинките. При тоа правиме анализа на бројот на достапни толкувачи на знаковен јазик, за да може нивната инклузија во предучилишни образовни установи да биде на ист начин како и за останатите деца“, појасни таа.
Министерката Шахпаска упати честитка по повод Меѓународниот ден на знаковниот јазик до глувите и наглувите лица, како и сите оние кои го користат знаковниот јазик, им посака добро здравје и заедничка и плодна соработка во интерес на глувите лица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Делови од Илинден и Ѓорче Петров денеска без струја
Од ЕВН Македонија АД известуваат дека денеска без електрична енергија ќе останат:
– во периодот од 09:00 до 13:00 часот, улица Бунарџик. (Општина Илинден)
– во периот од 09-00 до 15-00 часот, дел од корисниците на улиците: Мице Козар и Ѓуро Салај. (Општина Ѓорче Петров)
Македонија
Сончево и релативно топло со мала до умерена облачност
Сончево и релативно топло со мала до умерена облачност. Во утринските часови наместа ќе има зголемена облачност која во текот на денот ќе се намали. Ќе дува слаб ветер од северен правец. Минималната температура ќе биде во интервал од -2 до 3, а максималната ќе достигне од 12 до 17 степени.
Во Скопје, претпладне во делови од котлината ќе има услови за појава на слаба магла. Во текот на денот времето ќе биде сончево со мала до умерена облачност и претежно тивко. Минималната температура ќе се спушти до 1, а максималната ќе достигне до 14 степени.
Времето во наредниот период
Продолжува период на стабилно и релативно топло време. Во текот на ноќите и во утринските часови ќе има појава на магла на одредени места и зголемена облачност која во текот на денот ќе се намалува.
Македонија
Сообраќајот на граничниот премин Евзони (ГП Богородица) се одвива нормално
Сообраќајот на ГП Евзони (ГП Богородица) се одвива нормално, извести АМСМ.
Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

