Пратеникот од ВМРО-ДПМНЕ, Бојан Стојаноски, на денешната Комисија за финансирање и буџет во Собранието изнесе обвинувања поврзани со амандман поднесен од Венко Филипче и со процесот за линеарното зголемување на пензиите.

Според Стојаноски, амандманот е потпишан од Филипче поради бизнис-интереси поврзани со компанија за алтернативно производство на електрична енергија.

„Подносител на овој амандман е Венко Филипче, зошто е потпишан Венко Филипче? Заради тоа што неговиот брат Никола Филипче, има компанија којашто произведува алтернативни извори на електрична енергија. 2025 година менување на детален урбанистички план во општина Дојран, каде што тие имаа градоначалник и инсталирање од фотонапонска централа од 23.000 м2, за да се купи 130.000 евра струја, знаете ли кој е сопственик на таа централа? Никола Филипче и Вице Заев. Некој треба да даде, за некој да земе“, рече Стојаноски.

Тој исто така изнесе обвинувања дека СДСМ преку уставната судијка Добрила Кацарска го блокира процесот на линеарното зголемување на пензиите.

„СДСМ во минатиот мандат ја постави Добрила Кацарска во Уставниот суд, продолжената рака на СДСМ во Уставниот суд, уставната судијка поднела претставка до Уставниот суд за оценување на уставноста за линеарното зголемување на пензиите. Сега кога некој дојде и им ја покачи пензијата на сите пензионери за 7.000 денари, Добрила Кацарска сега сама си поднесува претставка и сака да им ги земе на пензионерите овие покачувања. СДСМ преку Добрила Кацарска сака да ви го земе покачувањето на пензиите“, изјави Стојаноски.

Оспорувањето на линеарното зголемување на пензиите беше тема на јавна дебата и претходно, откако повеќе субјекти упатија забелешки дека ваквиот модел може да создаде нееднаквост меѓу пензионерите. Уставниот суд веќе разгледуваше иницијативи поврзани со измените во пензискиот закон, а дел од претходно оспорените одредби беа отфрлени поради нивниот темпорален карактер. Со отворањето на новата постапка, судот повторно ги става во фокус уставните принципи за правичност и еднаквост во пензискиот систем.

Коалицијата ВЛЕН изрази длабока загриженост поради турбуленциите во албанскиот опозициски блок, оценувајќи дека актуелните случувања не ѝ служат ниту на демократијата, ниту на политичката стабилност, ниту на интересите на граѓаните.

Претставникот на ВЛЕН, Дритон Сулејмани, истакна дека демократските процеси се темелат на отворена дебата и силна опозиција, но дека актуелните настани „не наликуваат ниту на опозиција ниту на стабилност, туку на тивок распад и целосно губење на политичкиот компас“.

Тој потсети дека во краток период НАИ се соочи со последователни заминувања на клучни имиња, како Мендух Тачи, Арјанит Хоџа и најново — Зијадин Села, кој беше еден од столбовите на опозицискиот камп.

„Ова не се случајни движења, туку знаци на политичка структура што се распаѓа и ја губи својата ориентација“, наведе Сулејмани.

Тој додаде дека ВЛЕН не се радува на оваа состојба, бидејќи „на системот му е потребна силна, одговорна и кохерентна опозиција — не опозиција на парчиња што се дели секоја недела и се плаши од дебата и транспарентност“.

Сулејмани посочи дека слабата опозиција не му штети на ВЛЕН, туку на политичкиот систем, нарушувајќи ја демократската рамнотежа и оставајќи ги граѓаните без вистинска алтернатива.

„Ги повикуваме сите политички субјекти што се нарекуваат опозиција да ја вратат разумноста, сериозноста и одговорноста што ги бара моментот“, рече тој.

Сулејмани порача дека ВЛЕН е подготвен да соработува со секоја политичка сила што е насочена кон реформи, ги почитува институциите и работи во интерес на граѓаните.

„ВЛЕН ќе продолжи по патот на промените, но овој пат е поправеден и подемократски кога ќе се соочи со функционална опозиција, а не со опозиција што се распаѓа пред очите на народот“, заклучи Сулејмани.

Претходно, Алијансата за Албанците, крилото на Зијадин Села, ја напушти коалицијата „Национална алијанса за интеграција“. Одлуката беше донесена на состанокот на Претседателството, каде што се дискутираше и за резултатите на локалните избори. Тие изразија задоволство од бројот на гласови и мандати на советниците, но незадоволство од резултатите за градоначалници. Според партијата, изборната трка била под влијание на државен инжинеринг и соработка на владејачките албански партии со македонските партии, со цел реализирање на платформата на ВМРО-ДПМНЕ за, како што велат, маргинализирање на Албанците. Иако се повлекуваат од НАИ, од Алијанса за Албанците на Села, велат дека ќе останат во опозиција во заштита на националната кауза на Албанците во Македонија.

Министерот за одбрана Владо Мисајловски денеска (20 ноември) се обрати на промоцијата на регионалната платформа за соработка помеѓу националните друштва на Црвениот крст и Црвената полумесечина за земјите од регионот каде што истакна дека „хуманоста и човечноста се нашите водилки за побезбедно општество, за побезбедни граѓани“.

„Само со меѓусебна соработка и меѓусебна поддршка можеме да придонесеме за сигурен, стабилен и безбеден регион, но и во остварувањето на заедничките цели, раст и развој на државите“, истакна министерот.

Мисајловски додаде дека се почестите кризни состојби и природни катастрофи ги надминуваат националните граници и имаат регионални последици и затоа од исклучително значење е потребата од регионална координација, партнерство и заеднички одговор.

„Сите ние и како институции и како поединци сме силни толку колку што можеме да им помогнеме на граѓаните, при елементарни непогоди и други несреќи. Токму затоа секоја соработка со соседите, но и со останатите земји, партнери и сојузници е особено важна за континуирано унапредување на механизмите за превенција, рано предупредување и справување со кризи“ рече тој и уште еднаш упати благодарност во име на Владата и македонските граѓани до сите земји кои во овие изминати години беа тука да ни помогнат како со справувањето на последиците, така и во градењето на капацитетите за превенција и одговор.

Мисајловски во своето обраќање нагласи дека е горд на припадниците на Армијата, но и на сите останати чинители вклучувајќи го и Црвениот крст, кои со свој личен придонес даваат вистински пример како се сака сопствената држава, со максимална посветеност и интегритет во служба на граѓаните.

На настанот на кој присуствуваа претставници од регионот, од академската заедница, од Армијата и од останатите институции, Мисајловски заклучи дека само на овој начин преку градење на мостови за соработка дополнително ќе го зајакнеме системот на подготвеност и брза реакција.