Градот Скопје во рамките на своите надлежности е целосно подготвен да ги преземе сите неопходни мерки за да се спречи ширење на вирусот Ковид 19. Во таа насока, уште пред една недела се преземени превентивни мерки за заштита на здравјето на средношколците и спречување на ширењето на корона вирусот во средните училишта, рече на денешната прес-конференција градоначалникот Шилегов.

Во 23 средни училишта на Град Скопје учат околу 21.600 ученици и заштитата на нивното здравје претставува сериозна обврска и одговорност за нас како надлежна институција и за директорите кои раководат со училиштата. Согласно со задолженијата добиени од Владата на Република Северна Македонија сите училишта своите планирани патувања и екскурзии во Република Италија ќе ги откажат или одложат на неопределено време. До крајот на оваа недела ќе биде одржан и едукативен час за превенција од вирусот согласно со препораките на Светската здравствена организација и Владата на РСМ – најави Шилегов.

Тој нагласи дека денеска до директорите на средните училишта издал наредба раководните органи во училиштата внимателно да ги следат и целосно да се придржуваат на препораките за превенција и справување со корона вирусот кои ги даваат надлежните институции.

„Понатаму, училишните раководства веднаш да ги откажат и одложат патувањата и училишните екскурзии во другите земји каде што е регистрирано поголемо присуство на корона вирусот. За сите преостанати патувања и екскурзии да прават дополнителни безбедносни проценки. Училишните раководства веднаш да почнат со организација и реализација на едукативни часови, работилници и дистрибуција на материјали за соодветно информирање, превенција и справување со корона вирусот. Во оваа насока укажуваме дека Градот Скопје ќе ја обезбеди потребната логистичка поддршка и координација со релевантните здравствени институции. Училишните раководства се задолжуваат да ги стават на користење средствата што ги обезбеди Градот, да одржуваат највисоко ниво на хигиена, применувајќи ги сите санитарни-хигиенски средства и активности кои им се на располагање. Во врска со оваа обврска, сакам уште еднаш да укажам дека Градот Скопје има обезбедено доволни количини на антибактериски сапуни за училиштата. Во изминатиот период во јавноста се шират разни гласини во врска со овој вирус. Апелирам да не се крева паника, апелирам на трезвено однесување и на институциите и на граѓаните. Нема простор за паника. Градот Скопје како основач и надлежна институција за средните училишта, непрекинато и одблизу ја следи состојбата во училиштата и ќе ги преземе сите неопходни мерки за заштита на здравјето на сите членови на училишните заедници“, нагласи Шилегов.

Тестирање за коронавирус кај жена што се вратила од Рим дало делумно позитивни резултати, извести денес министерот за здравство Венко Филипче. И се прави дополнително тестирање на Клиниката за инфективни болести.

„Жена којашто со сопругот била на кратка прошетка во Рим се јави на Инфективната клиника. Нејзиниот тест во една третина, само парцијално е позитивен што може да биде вкрстена реакција од други вируси и затоа сега се прави дополнително тестирање на широка палета на вируси, да не шпекулираме иако верувам дека и овој тест ќе биде негативен. За резултатите ќе известиме после два часа“ , рече министерот Филипче.

На клиниката се пријавил и возач на камион со знаци на грип кој патувал низ северна Италија, но неговиот тест бил негативен.

Пациентката кај којашто вчера беше потврден коронвирусот се чувствува добро, има лесна клиничка слика и нема знаци за компликации, рече министерот Филипче. Таа е сметена на Клиниката за инфективни болести во Скопје. Останатите патници од комбето се ставени во изолација во домашни услови, а изолација е во тек и за сите лица со коишто направиле контакт.

„Телефонски се исконтактирани сите и им е укажано дека треба да почекаат денеска во утринските часови да бидат контактирани како од екипите на епидемиеолози така и од припадниците на Министерството за внатрешни работи. Кај дел ова интервју е веќе завршено, дел се врши сега, во овие моменти. Добро е тоа што сите укажуваат на тоа дека немале контакт со голема маса на луѓе, пред се контактите се во рамките на семејствата и тоа во куќите во коишто живеат или во истите дворови. На сите нив, исто така, ќе им биде назанчена изолација“, вели министерот Филипче.

Претставници на Министерството за внатрешни работи прават проценки дали можат да ги обезбедуваат објектите во кои што се изолирани во домашни услови патниците и лицата со коишто контактирале. Доклку утврдат дека има тешки услови за обезбедување, лицата ќе бидат пренесени во некое од инфективните одделенија наменети за излоција на сомнителни пациенти на Инфективната клиника во Скопје, а доклку има потреба во одделенија во Штип и Гостивар.

Обвинетиот Фејзи Азири го испитуваше сведокот и ексдиректор на УБК Сашо Мијалков. Тој се интересираше дали била побарана помош од Американската амбасада за расчистување на случајот.

„По моето приведување на први мај, дали вие имате поднесено досие во врска со осомничените за петкратното убиство во американската амбасада и дали сте побарале помош за расветлување на овој случај”, го праша обвинетиот Фејзи Азири, а сведокот Сашо Мијалков рече: „Во добар дел одговорив на тие прашања. Како и за други случаи, и за овој имаше размена на информации. Не можам да се сетам дали сум однел досие  во амбасадата. Јас лично немам побарано помош од нив”.

Разговор меѓу Орце Камчев и новинарката Оливера Трајковска беше цитиран во судницата од страна на обвинетиот Фејзи Азири.

„Има разговор во кој Орце Камчев ја информира новинарката дека е однесено досие во американска амбасада и побарал четворица од Косово да бидат испратени од таму или тие да ги земат. Кои се тие четворица?”, праша Фејзи Азири.

„Јас не знам од каде Орце Камчев ги знае тие работи. Мислам дека се работи за Алир Демири и уште едно лице на кое не можам да се сетам и уште двајца на кои не можам да се сетам”, одговори Мијалков.

Азири го праша Мијалков дали пред и по настанот функционирале камерите од „Смарт сити”, а тој одговори тоа да го провери во МВР.

„Не можам да знам дали пред 8 години функционирале камерите или не”, рече Мијалков.

Азири поставуваше повеќе прашања, а меѓу нив имаше и констатации, што не е дозволено. На ова до судот бурно реагираа семејствата на убиените, па преговараа, по што судот го уважи приговорот.

„Овој сам си поставува прашања, сам си одговара”, рече родителот на убиеното момче, Горан Наќевски.

Обвинетиот Азири побара од Мијалков да каже дали имало барање од ДУИ да не се направи истрага за некое лице или група, односно дали трпел притисоци.

„УБК никогаш не барала поддршка во работењето од политичка партија”, рече Мијалков.

Прашањата од Азири кон Мијалков траеа речиси еден час. Тој следно го праша „Како ви дојде идеја да го истражувате случајот само од една страна, само за инволвираност на Албанците?”

„Јас како директор на УБК, од информациите кои добивав од моите потчинети, можам да ви кажам дека на почетокот е немавме никакви информации. Така што тоа што го кажавте е неточно. Истрагата беше во многу насоки. Материјалните докази нè насочија, но и други докази, како ПИ-мерките итн. Од првиот ден немаше никакви информации за која група се работи, а се најдоа како резултат на 20-дневното перманентно работење на МВР”, одговори Мијалков.

Ексдиректорот на УБК беше прашан од обвинетиот за автомобилот „опел омега”.

„Возилото беше од Швајцарија, преку Косово влезено во Македонија”, рече Мијалков.

Азири праша дали Мијалков пред убиството на Смилковско Езеро добивал информации од Љупчо Тодоровски, Синиша Алексовски, што, пак, ексдиректорот на УБК, веднаш го негираше.