Венко Филипче во, како што ја оценуваат, празната беседа за отчет пред Конгресот на СДСМ не понудил одговори на клучните прашања за состојбата во партијата и нејзиниот пад, реагираат од ВМРО-ДПМНЕ по неговото обраќање на 31. Конгрес на СДСМ.

Од ВМРО-ДПМНЕ посочуваат дека Филипче не објаснил зошто СДСМ денес е петта политичка сила во Скопје и трета на државно ниво, ниту пак се оградил или упатил критика кон, како што наведуваат, неговиот ментор Зоран Заев.

„Филипче не се огради од криминалот на кланот Дубаи, чиј составен дел е и самиот тој, туку напротив – го штитеше“, велат од ВМРО-ДПМНЕ.

Во реакцијата се наведува и дека Филипче не дал одговор зошто СДСМ, како што тврдат, сервирал услуги кон Бугарија и Грција, го наметнал францускиот предлог и склучил штетен договор со Бугарија. Дополнително, од партијата прашуваат зошто СДСМ ги напаѓа САД и води, како што велат, политичка војна со Обединетото Кралство.

Од ВМРО-ДПМНЕ го проблематизираат и односот на Филипче кон поранешниот дипломат Андреј Жерновски, за кого наведуваат дека јавно говорел во прилог на бугарскиот наратив за Македонија, како и фактот што, според нив, СДСМ денес не претставува никаква политичка алтернатива.

„Филипче не гледа проблем во тоа што СДС стана помал чирак на ДУИ во криминалот и не се огради од Артан Груби и криминалот поврзан со Лотарија“, се наведува во реакцијата.

Во соопштението се посочува и дека Филипче, според ВМРО-ДПМНЕ, е дел од криминалниот синџир на тендери и не објаснил од каде му е службеното луксузно ауди, како и каква е неговата врска со Енис Колашинац, кој, како што тврдат, ЕСМ го снабдувал со јаглен за време на владеењето на СДСМ.

Од партијата додаваат дека Филипче не се оградил ниту од бегалецот Васко Ковачевски, кој, според нив, ја оштетил државата за 6,5 милиони евра во случајот „Адитив“, како ниту од, како што велат, антидржавното однесување на Зоран Верушевски.

„Заклучокот е дека за ВМРО-ДПМНЕ нема подобро решение од Венко Филипче. Проблемот е што тој е штетен за Македонија и нејзините интереси“, велат од ВМРО-ДПМНЕ.

Вратите на СДСМ се ширум отворени за секој чесен социјалдемократ, за секој работник, за секој интелектуалец кој ѝ мисли добро на државата, изјави претседателот на партијата, Венко Филипче, во неговото обраќање на почетокот од 31. Конгрес што денеска се одржува во Скопје.

– За да го победиме ова зло надвор, мора прво да бидеме челични внатре. Знам дека во минатото имавме турбуленции. Знам дека имаше разочарувања. Некои си заминаа, некои се вратија, а некои сè уште стојат на прагот и калкулираат. Сакам денес да бидам кристално јасен. Вратите на СДСМ се ширум отворени за секој чесен социјалдемократ, за секој работник, за секој интелектуалец кој ѝ мисли добро на државата. Но, дозволете ми да испратам една порака до оние, кои мислат дека можат да седат на две столчиња. До оние, кои мислат дека можат да бидат во СДСМ, а да работат за интересите на власта, или да формираат фракции, нови движења и сето тоа, само за нивни лични интереси. Тоа време заврши. Денес ставаме точка на разединувањето. СДСМ не е пазар за пазарење функции. СДСМ е армија на вредности. Кој сака да се бори рамо до рамо со нас – добредојден е вистински, искрено, братски. Но, кој планира да нè поткопува од внатре, кој планира да биде „Тројански коњ“ на ВМРО или на некои други интересни групи – нека си замине веднаш. Немаме време за предавства. Немаме луксуз за суети. Или сме заедно во оваа битка за живот или смрт на демократијата, или не сме ништо. Јас бирам да бидеме сè. Бирам борба, искрена, силна и чесна, подвлече Филипче пред присутните.

Тој рече дека нема пишување статуси на „Фејсбук“, партијата е на терен.

– Нема седење. Нема пишување статуси на Фејсбук од удобни фотелји. СДСМ е на терен. Одиме во секој град, во секое село, во секое маало. Ќе чукнеме на секоја една врата. Не да молиме за гласови, туку да ја разбудиме Македонија, додаде претседателот на СДСМ.

СДСМ, како што подвлече Филипче, е имунолошкиот одбранбен систем на оваа држава.

– Кога национализмот ќе почне да го јаде ткивото на општеството – ние сме лекот. Кога омразата ќе се обиде да нè скара сосед со сосед – ние сме врзивното ткиво. Кога режимот ќе се обиде да ја замолчи слободната мисла – ние сме гласот што грми. Низ историјата, кога и да се спуштел мрак, кога и да завладеел страв, СДСМ бил факелот што го покажувал патот кон излезот. Така беше во 90-тите, така беше во 2016-та, и ви ветувам – така ќе биде и сега, нагласи Филипче.

Тој праша што било донесено за овие речиси две години власт.

– Ни донесоа брутално отрезнување. Тие ветија гордост, а не донесоа до питачки стап. Ветија реформи, а донесоа грабеж од епски размери. Донесоа тендери за своите блиски луѓе, донесоа грабеж на европски пари од кои сите ние се срамиме. Да бидеме целосно искрени за тоа што ни го прават. Ова не е само неспособност. Кога не чистиш снег или ѓубре во Скопје – тоа е неспособност. Но, кога го креираш буџетот за 2026 година со дупка од две милијарди евра и за тоа треба да стигне ново задолжување – тоа почитувани присутни не е грешка, тоа е осмислен невооружен грабеж на оваа држава. Тоа е финансиско злосторство против иднината на децата. Тие пари не исчезнуваат во воздух. Тие пари се прелеваат во џебовите на нивната олигархија, додека граѓаните ќе ја плаќаат сметката преку инфлацијата која им го јаде лебот, додаде Филипче.

Претседателот на СДСМ посочи да се погледнат цените во маркет. „Потрошувачката кошничка“, нагласи тој, стана поскапа од злато.

– Замрзнуваа цени на хартија, а во реалноста цените дивеат. Зошто? Затоа што се штитат профитерите, а не граѓаните. Од 1 јануари, поскапе сè, и парното и струјата, а Мицкоски нè убедува дека сме четврта економија во Европа. Дали некој се чувствува како да живее во четвртата економија во Европа, денес јавно прашувам. Одговорот сите вие многу добро го знаете. И додека народот се бори за корка леб, каде е премиерот? Во Давос. Глуми светски лидер, прави селфија по ходници затоа што пет дена не направи ниедна средба. Човекот беше турист и ова не е хипербола. Додека дома државата пука по сите шавови, Мицкоски тераше скап туризам платен со народни пари. Македонија, почитувани присутни, почитувани граѓани е во дипломатска изолација. Европскиот патот е блокиран, а тие немаат план. Европа нè отпиша а Америка не нè запишува. Наместо во периметарот на САД, со Мицкоски завршивме надвор од кружницата наречена Европа. Вакво дипломатско лудило и конфузија не се оправдува. Ова е предавство на националните интереси. Вакво предавство ќе памтат многу следни генерации, смета Филипче.

Според Филипче, „нивниот единствен план е да нè држат во калта на Балканот, за да можат да владеат без правила, без европски судови, без контрола“.

– Кога беше СДСМ на власт, како велеше Мицкоски и ВМРО-ДПМНЕ, се сеќавате? Сме биле потчинети на Европа. Тој ќе ја враќаше гордоста. И што добивме? Добивме влада која е целосно потчинета, уценета и купена со кеш и проекти од Вучиќ и Орбан. Ја сведоа државата на последната дупка на Балканот со премиер кој не смее потпис да стави на ниедна одлука без одобрување од неговите газди, додаде тој.

Се осврна и на актуелната тема со мигранти.

– Но, има нешто уште пострашно што се подготвува во темнината. Слушаме, читаме, гледаме и пратиме. Се кројат планови, далеку од очите на јавноста, за прифаќање на мигранти од Западна Европа. За 10.000 веќе се донесе закон под превезот на странски работници. Сакаат да ја претворат Македонија во карантин зона, во тампон зона за туѓи проблеми, само за да добијат тапкање по рамо и кредит од 6 милијарди евра. Сакаат да ја продадат безбедноста на нашите домови и на нашите деца за ситни политички поени. Тоа е врвен чин на предавство на сопствениот народ. Нема да дозволиме Македонија да стане логор за туѓи геополитички поткусурувања додека децата ги пакуваат куферите да заминат од државата, рече Филипче.

Тој смета дека планот бил разоткриен.

– Планот е разоткриен, планот повеќе не може да го прикриваат. Прво, ја откривме оската со Србија и Унгарија. Сојузот со Орбан и Вучиќ каде што се застапуваат антиевропски и поддржуваат проруски ставови што нè доведоа до тоа да сме до листата на Америка со земји од третиот свет. Второ, намерно поради внатрешна кампања ги продлабочија врските со десничарските антиевропски лидери и се покренаа спорови со нашите соседи, ризикувајќи ја европската интеграција за домашна моќ и пари. Трето, таа оска ги штити интересите на Москва, на Балканот со инвестиции што нè врзуваат за авторитарните режими. Четврто, нивните планови за разбивање на Социјалдемократскиот сојуз на Македонија, ново здружение, ново движење, нова екипа, дури и нова партија со тројански коњи што ги започнаа наши другари, што седат на две столици и работат за интересите на власта, истакна Филипче.

СДСМ, нагласи претседателот на партијата, никогаш не била и нема да биде контролирана опозиција.

– Ние нудиме европска Македонија. Реформирано судство и судии кои судат по закон. Болници во кои се лекувате достоинствено. Училишта кои создаваат умови, а не послушници. Тоа е социјалдемократијата на 21. век – грижа, солидарност, човечност. Ние гарантираме вистински патриотизам, а не сиров национализам кој значи само лаги, лажна гордост и чукање во гради. Патриотизам кој значи чукање во гради на сите аспекти на живеењето, патриотизам кој сите аспекти на живеењето ги прави подобри, побогати и побезбедни. Патриотизам кој значи дека водиме сметка за секој еден, за помногу бројни, за послаби, без разлика дали станува збор за етничка, национална, верска, родова, полова или сексуална ориентација. Ние гарантираме општество без корупција во кое секој еден ќе живее и ќе напредува и ќе има еднакви шанси, а не само малата група околу центрите на моќ на власта, дециден беше претседателот на СДСМ на почетокот од 31. Конгрес во Скопје.

Отворениот дел од Конгресот на СДСМ заврши, сега е во тек делот што е затворен за јавноста.

Други ја гледаат Македонија како плен, како територија за владеење. Ние ја гледаме како дом, изјави претседателот на СДСМ, Венко Филипче, во неговото обраќање на почетокот од 31. Конгрес што денеска се одржува во Скопје.

– Ние нудиме нешто друго, ниво, поинаку. Мора да понудиме засолништето од ова лудило. Нашата платформа и програма е договор со секој граѓанин. Ние нудиме економија на достоинство, економски патриотизам, економски модел во кој централна фигура е човекот и неговите потреби. Економска стратегија која се фокусира на тоа како парите кои вие ги плаќате во буџетот да се вратат повторно кај вас, преку повисоки плати, подобро образование, подобро здравство, повисоки пензии, додаде претседателот на СДСМ.

Пред присутните, Филипче подвлече дека СДСМ се залага, не само за едноставна мала плата, туку за достоинствена плата за живот.

– Систем каде што профитот не е забранет, но, алчноста е одданочена. Враќањето на парите кај граѓаните – не преку лажни мерки, туку преку системски инвестиции во секој аспект на приходите и услугите кои вие како граѓани ги добивате од државата. За младите – држава дигитален центар, а не извозник на евтина работна сила или на наши креативни млади умови. Ако може да работат за странски компании, нека работат тука. Нека работат од дома, но, во европски услови за кои ние ќе гарантираме. За пензионерите, престанок на милостината пред избори, гарантиран раст на пензиите кој ја следи инфлацијата за да не мора да бираат помеѓу лекови и храна. За работниците ќе бидиме штитот кој ќе ги брани од самоволието на газдите кои оваа сегашна власт ги штити. Нас повеќе од кога било, потребна ни е социјална држава, а таква држава може да обезбеди само СДСМ, дециден беше Филипче.

Отворениот дел од Конгресот на СДСМ заврши, сега е во тек делот што е затворен за јавноста.