„Македонија е држава со младинска невработеност од над 50 проценти, држава во која ниту еден универзитет не е на Шангајската листа меѓу топ 1.000 универзитети во светот, држава каде студентите чекаат да бидат сместени во студентски домови 10 дена по почетокот на студентската година, во домови во кои се служи нискокалорична храна полна со бубачки и догорчиња“, изјави Јован Јаулески, претседател на Унијата на млади сили на ВМРО-ДПМНЕ.

Тој најави дека УМС на ВМРО-ДПМНЕ, водена од идејата за поголема младинска вклученост во општеството и политичките текови во државата, распишува оглас за пријавување  членови за телото „Тим млад“, тело кое активно ќе учествува како во креирањето и дооформувањето на програмата на ВМРО-ДПМНЕ во делот на младите, така и во претстојната кампања на ВМРО-ДПМНЕ за претстојните парламентарни избори.

„Ги поттикнуваме сите млади кои се во последната година на студии, дипломци, постдипломци и докторанти со просек од над 8,5, а немаат навршено над 29 години да се пријават на огласот и да дадат свој придонес во активното градење на Македонија во периодот што следи. Огласот е отворен од денес и ќе трае во наредните 15 дена. Време е на младиот, образован и напреден човек да му се даде можност да се вклучи во градењето на Македонија.
Да креираме проекти од младите за младите. Да создадеме општество во кое секој млад човек ќе сака да остане, работи и да основа семејство. Македонија може. Потребна е обнова. Обновата доаѓа. Вклучи се“, рече Јакулески.