Македонија
Јаневска: Министер за образование што не може да обезбеди средства за да испечати книга треба веднаш да си даде оставка
„Крахот на македонското образование започна од онаа несреќна концепција на министерката Мила Царовска, која беше претставувана како реформа во образованието“, истакна Весна Јаневска, претседател на Комисија за образование и наука на ВМРО-ДПМНЕ на денешната дебата „Важно е да имаме квалитетно образование“.
Јаневска додаде дека таа концепција била претставувана како реформа, но во суштина има позадина.
„Обидувајќи се некако да ја избрише историјата, таа министерка направи катастрофална грешка затоа што интегрира предмети за кои Македонија нема кадар да ги предава. Јас ова сто пати сум го кажала, и ќе го повторам, не можеме да планираме реформа ако немаме кадар да ја спроведе таа реформа“, нагласи Јаневска.
Потсети дека Мила Царовска првата година ги укина учебниците.
„Зошто ги укинаа книгите? Затоа што беа свесни дека ниту ќе можат да се креираат книги според нивната концепција, ниту имаа желба да направат нешто за да го подобрат образованието во Македонија. И затоа што немаа де факто пари бидејќи ги потрошија парите на се и сешто, и тоа го призна следниот министер за образование и наука, Јетон Шаќири“, појасни таа.
„Нормално е да немаат пари за учебници бидејќи ги потрошија на корумпирани зделки како што е „Бехтел и Енка“, на купување и изнајмување на возила итн. Министер за образование кој што не може да обезбеди средства за да испечати книга треба веднаш да си даде оставка“, нагласи Јаневска.
Таа рече дека понижувањето на професијата наставник беше кога власта ги примора наставниците да штрајкуваат за да можат да опстанат. Тоа не беше штрајк за луксуз, тоа беше штрајк за едно нормално живеење. И при тој штрајк власта ги измами, изманипулира наставниците бидејќи на дел од наставниците дури и не им исплатија плата.
„Наставниците наместо 18% добија само 15% покачување на плата, а 3% кои требаше да ги добијат се уште не ги добија. И уште една голема една лага, а тоа е дека ќе се потпише Колективен договор во месец мај оваа година, што не се случи за да тие да можат да примаат соодветна плата“, потсети Јаневска.
Јаневска укажа дека оваа Влада кон наставниците се однесува како кон послушници и тоа особено е видливо во нивната комуникација со директорите кои тие ги поставиле.
„Нашите градоначалници се соочуваат со толкав голем недостаток на средства во однос на образованието што во одредени месеци имаат само плата да исплатат, а камо ли нешто друго да вложат во образованието. Секако дека треба да се реновираат училиштата, секако дека треба да се доградуваат училишта. Самите инфраструктурни проекти кои што СДСМ ги вети пред изборите не ги спроведува денес. Ваквото однесување на власта е недозволиво, и поради вакво однесување страдаат учениците, наставниците, па и родителите“, рече Јаневска.
Таа нагласи дека идната Влада на ВМРО-ДПМНЕ ќе направи се што треба за да образованието во Македонија се подобри и стане поквалитетно.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сончево време со температура до 25 степени
Времето утрово е студено со појава на магла по одделни котлини и речни долини. Преку денот, ќе биде сончево со мала локална облачност. Ќе дува слаб ветер претежно од југоисточен правец. Минималната температура ќе биде во интервал од -3 до 5, а максималната ќе достигне од 18 до 25 степени.
Во Скопје минималната температура ќе се спушти до 2, а максималната ќе достигне до 23 степени, јавува УХМР.
Во наредните денови продолжува периодот на стабилно и претежно тивко време со студени утра и температури кои наместа ќе се спуштаат под нула степени. По одделни котлини ќе има услови за појава на утринска магла или ниска облачност. Дневната температура ќе биде без значителни промени.
Македонија
Не е за пиење водата во тетовските села Мерово, Луковица и Седларево, како и во прилепското село Ропотово
Регионалниот центар за управување со кризи Тетово, извести дека од Центарот за јавно здравје ЈЗУ – Тетово добиле информација дека испитаните примероци на вода за пиење од селата Мерово, Луковица и Седларево (Општина Желино) не одговара на законските и стручни прописи за бактериолошка анализа.
„Потребно е да се врши редовна дезинфекција на водата за да може да се употребува за пиење“, велат од ЦУК.
РЦУК Битола, информира дека од Центар за јавно здравје ЈЗУ – Прилеп е докажана здравствена микробиолошка неисправност на водата за пиење од регионалниот водовод (Општина Долнени) во с. Ропотово и во основното училиште на с. Ропотово.
Македонија
Се’ уште забранета водата за пиење во Струмица
Изречената забрана за пиење на водата од струмичкиот водоснабдителен систем останува на сила, соопшти Агенција за храна и ветеринарство (АХВ) по резулатите од анализираните мостри земени на 18 октомври годинава во рамки на спроведениот вонреден инспекциски надзор во водоснабдителниот објект – фабрика за вода на ЈКП „Комуналец” Струмица.
Од АХВ информираа дека кај сите мостри претходно зголеменото ниво на манган е во рамки на дозволените вредности, но микробиолошки, четири од земените мостри не ги исполнуваат безбедносните критериуми поради детектирано зголемено присуство на колиформни бактерии во водата.
Целта на контролата беше увид во досегашните активности спроведени од страна на ЈКПД Комуналец од Струмица во однос на спроведувањето добра производствена и добра хигиенска пракса, како и други технички зафати во водоснабдителниот систем.
Во рамки на надзорот, земени се 6 мостри за анализа на водата од водоводната мрежа на ЈПКД Комуналец Струмица и тоа: една мостра од сирова вода која доаѓа од браната, сирова вода од чешма во фабриката, втора мостра на хлорирана/третирана вода за пиење од чешма во фабриката за вода, три мостри вода за пиење од мерните места одредени од ЈПКД Комуналец во нивниот мониторинг план за земање мостри вода за анализа и една мостра вода за пиење земена по случаен избор на инспекторот од водоводната мрежа на ЈПКД Комуналец.