Денеска, во Центарот за селекција на отпадот во Карпош, беше потпишан договорот за донација на 60 сада за одлагање стаклена амбалажа меѓу ЈП „Комунална хигиена“ – Скопје, Град Скопје и Германското друштво за интернационална соработка – ГИЗ. Донацијата е реализирана преку ЗЕЛС и ГИЗ и се спроведува во рамките на проектот „Управување со отпад од стаклена амбалажа на Западен Балкан”.

Трипартитниот договор за донација беше потпишан од страна на директорот на ЈП „Комунална хигиена“ – Скопје, Абдусамед Шабани, градоначалникот на град Скопје, Петре Шилегов, и проектниот менаџер на ГИЗ, Зорица Билиќ.

„ЈП ‘Комунална хигиена’ – Скопје веќе има поставено 238 сада за одлагање стаклена амбалажа во сите скопски општини, кои граѓаните ги употребуваат за примарна селекција на својот отпад. Планираме 35 контејнери од садовите што денеска ни беа донирани преку ЗЕЛС и ГИЗ да бидат поставени во општината Гази Баба, а 25 од контејнерите да бидат лоцирани во општината Аеродром.

Во текот на 2020 година во центрите за селекција на ЈП „Комунална хигиена“ – Скопје беа транспортирани над 465 тони стакло и се надеваме дека годинава овој тренд уште повеќе ќе се подобри.

Примарната селекција резултира со зголемена ефикасност при собирањето и транспортот на отпадот, односно повисок степен на рециклирање и негова понатамошна реупотреба, но она што е најзначајно е дека придонесува значително да се намали количеството комунален отпад што завршува на депониите. Апелираме до жителите на град Скопје примарно да го селектираат својот комунален отпад и на тој начин да придонесат за одржувањето почиста и поздрава животна околина“, изјави директорот на ЈП „Комунална хигиена“ – Скопје, Абдусамед Шабани.