Македонија
ЈП „Лајка“: Напуштањето домашни миленици е чин што остава трајни последици врз целиот град

Напуштањето домашни миленици, особено кучиња, не е само лична или семејна одлука – тоа е чин што остава трајни последици врз целиот град и неговото функционирање. Она што за некого е „само едно куче“, за градот станува проблем со јавно здравје, безбедност, етика и јавна потрошувачка, велат од ЈП „Лајка“:
Од таму велат дека кога сопственик ќе напушти миленик, тоа животно завршува на улица, но таа не е природна средина за него. Градските улици полека се претвораат во несоодветни прибежишта, полни со гладни, болни и често уплашени животни, кои се борат за преживување. Овие услови не се одржливи ниту за животните ниту за луѓето.
Напуштањето миленици има и општествени последици: слика за вредностите на заедницата.
„Кога едно општество дозволува масовно и неказнето напуштање миленици, тоа испраќа поразителна порака: дека грижата е привремена, а одговорноста – изборна. Децата растат гледајќи дека животно може да се фрли кога ќе стане непрактично. На тој начин се пренесуваат погрешни вредности – дека животот е заменлив, дека посветеноста има рок на траење. Таквото однесување го разјадува ткивото на општествената солидарност зашто, ако не се грижиме за најранливите, што кажува тоа за нас како луѓе?“, велат од претпријатието.
Исто така, напуштањето има и економски последици: јавни средства за лична неодговорност.
„Секое напуштено животно станува товар на општинските ресурси. Стационарите се преполни, а капацитетите за удомување и стерилизација се ограничени. Локалните власти мора да вложуваат средства во заловување, хуман третман, ветеринарна грижа, стерилизација, вакцинација… А сите тие трошоци произлегуваат од нечие лично – и неодговорно – однесување“, се наведува во соопштението.
Во него се потсетува дека напуштањето е казниво, но ретко санкционирано.
„Според Законот за заштита и благосостојба на животните во Македонија, напуштањето миленик е казниво дело. Но во пракса ретко кој се соочува со санкции. Без контрола на регистрација на миленици и без системска едукација, законот останува само на хартија“, велат од „Лајка“.
Според нив, решението е едукација, регистрација, стерилизација, санкции.
„Напуштањето може да се спречи, но не преку осуда, туку преку масовна едукација за одговорно сопствеништво, задолжителна регистрација и микрочипирање, достапни програми за стерилизација, јасни и применливи казни за напуштање. Кога некој ќе го напушти својот миленик, последиците ги сноси целото општество – институциите, граѓаните, децата, а најмногу самото животно. Затоа секој чин на напуштање треба да се третира како сериозен проблем, а секој чин на грижа како чекор напред кон подобар, похуман и покултурен град“, велат од ЈП „Лајка“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Лефков до Апасиев: Димче не е тоа што беше, го расипаа кешот и квадратите деловен простор

И Димче не е тоа што беше. Разбирам дека вистината боли, па затоа Апасиев наместо да одговори на фактите – бега во навреди, напиша на социјалните мрежи пратеникот на ВМРО-ДПМНЕ, Миле Лефков, обраќајќи се до лидерот на Левица, Димитар Апасиев.
Суштината е јасна, додава Лефков.
„Не може да си политичар кој јавно е против ЕУ, кој секојдневно зборува дека ‘глобалистите и амбасадите’ ја корумпираат македонската политика, да држиш анти ЕУ став, а истовремено твојата најблиска фамилија да користи европски пари од Еразмус програмите.
Јас сум член на Комисијата за европски прашања и цел претходен мандат активно се спротивставував на злоупотребите на СДСМ и ДУИ со европските фондови. Ама сега ми е јасно зошто еден цел мандат додека Таљо преку Арбер ја злоупотребуваше комисијата Димче го немаше на ниту една комисија-во тоа време активно си користеле ЕУ финансии по дома!
Денес по веста за ЕУ финансирањето, со цел да ме омаловажи, самопрогласениот Енвер Хоџа на интернет подземјето, ја мобилизираше својата троловска армија со лаги и клевети. Но вистината е една – разобличен е до даска.
И нема лутење јавноста има право да праша:
– Кој му го среди станот по цена што обичен граѓанин никогаш не може да ја добие?
– Кој му ги плаќа одморите низ Европа додека глуми анти-ЕУ револуционер?
– Кој друг, освен тој и Артан Груби, успеа да добие дуќан по таква цена во центар“, прашува Лефков.
Такви двојни стандарди, како што оценува, не се политика, туку како што вели, тоа е лицемерие на квадрат.
Не можеш, додава лефков, да ја плукаш Европа да кажуваш приказни за имеријалистички сили, а да живееш од европски пари.
„Не можеш да проповедаш морал, а да бидеш шеф на троловско подземје што фабрикува лаги за политички противници.
Разобличен си лажго кој нарачува најдолни клевети ама нема лутење, толку ти е силна желбата да ме наклеветиш што изгледаш очајно, порано беше по креативен, те расипаа квадратите деловен простор и кешот другар“, пишува Лефков.
Македонија
(Видео) Герасимовски на советничката листа ќе стави претставник од граѓанските организации, побара тие да предложат име

Градоначалникот Горан Герасимовски, на средбата со претставници од граѓанските организации, побара од нив да предложат кандидат за советник кој ќе ги застапува нивните права и интереси во идниот општински совет.
„Одиме чекор напред, од вас, но и од други групи на граѓани да побараме предлози за да направиме една советничка листа којашто нема да биде само партиска, туку ќе биде и граѓанска. Сакаме да вклучиме што повеќе луѓе од различни позиции, од невладини организации, од здруженија, за да дадат свој допринос во начинот на функционирање и креирање на политиките на општината, се со цел подобрување на условите за живот на нашите граѓани“, рече Герасимовски.
Герасимовски истакнува дека Општината покажала треба да биде на граѓаните, а не на политичките партии.
Тој потенцира дека Советот функционира одлично и се прифаќаат сите предлози и идеи кои се во интерес на центарци.
„Покажавме дека општината треба да биде на граѓаните, а не на политичките партии. Во советот функционираме одлично без разлика на советничките групи, од која политичка партија доаѓаат. Сите оние добри проекти без разлика од кого потекнуваат, преку буџетските форуми преку анкетите, преку многуте дискусии и состаноци кои ги имаме ги прифаќаме без разлика од кого доаѓаат“, вели Герасимовски.
Македонија
Муцунски за „Политико“: Државата не е подготвена за уставните измени што ги бара Бугарија без цврсти гаранции од ЕУ, дека тоа ќе биде последното такво барање

Во рамки на работната посета на Брисел, министерот за надворешни работи и надворешна трговија, Тимчо Муцунски, даде интервју за политичкиот магазин „Политико“.
Говорејќи за процесот на европска интеграција, министерот истакна дека државата во моментов не е подготвена да ги направи уставните измени што ги бара Бугарија, освен ако не добие цврсти гаранции од Европската Унија дека тоа ќе биде последното вакво барање. „Нашиот страв е: ако ги направиме уставните измени, што ќе се случи ако за шест месеци Бугарија повторно дојде со барања поврзани со историјата, идентитетот или јазикот?“, рече Муцунски.
Тој нагласи дека Северна Македонија е подготвена и веќе работи на сите други неопходни реформи, бидејќи тие не се само барање на Унијата, туку и потреба на општеството. „Ако утре земјите членки ни кажат дека треба да направиме повеќе во областа на владеењето на правото или доброто управување – тоа го разбираме. И не само што го разбираме, туку го чувствуваме како наша обврска“, додаде министерот.
Во интервјуто тој се осврна и на геополитичкиот контекст, нагласувајќи дека иако ја разбира итноста за интеграција на Украина, тоа не смее да биде на сметка на Западен Балкан. „Најбрзата, а веројатно и најевтината инвестиција во европската стабилност е ЕУ што побргу да ги отвори вратите за целиот регион. Не мислам дека селективното проширување е најдобрата опција“, изјави Муцунски.
Тој потсети дека Северна Македонија го започна европскиот пат заедно со Хрватска, но додека Хрватска денес е членка на Шенген и користи евро, нашата држава сè уште нема отпочнато преговори за членство.
Министерот изрази увереност дека проширувањето сè уште е возможно. „Слушаме за скептицизам кон проширувањето. Но, Северна Македонија – културно, социјално и политички – е европско општество. Доколку ги направиме реформите како што треба, не верувам дека ќе има силен отпор за проширувањето на нашиот регион.“
Покрај темите поврзани со ЕУ-членството, Муцунски зборуваше и за поддршката што Северна Македонија ја дава за Украина, придонесот во НАТО Алијансата, како и целосната усогласеност со Заедничката надворешна и безбедносна политика на ЕУ. Тој посочи и дека Северна Македонија беше првата земја од регионот што потпиша безбедносно-одбранбено партнерство со Европската Унија – дури пред Велика Британија и Канада.