Премиерот Талат Џафери, денеска, присуствуваше и го означи почетокот на изградбата на обиколницата на Тетово преку клучката Требош до Непроштено.

Денеска, почнуваме со решение на еден горлив проблем не само за тетовци, туку и за целиот Полошки Регион и пошироко. Со децении стоеше само како идеја изградбата на обиколницата околу Тетово, која создаваше невиден сообраќаен хаос за граѓаните од западниот дел на Северна Македонија и тешкотии во нивното секојдневно функционирање. Со обиколницата од улиците на централното градско подрачје ќе ги тргнеме камионите, тешките товарни возила, превозниците и транспортерите, односно ќе имаат можност да возат по современ и безбеден пат, а со тоа ќе ги заштитиме и граѓаните што живеат во овој регион.

Обиколницата околу Тетово е голем проект, кој ќе се протега од клучката Требош до Непроштено. Средствата за овој проект се обезбедени од буџетот на Јавното претпријатие за државни патишта во износ од над 12,2 милиони евра“, рече Џафери.

Инвестирањето во патната инфраструктура, како што рече, е приоритет на Владата на Република Северна Македонија.

„Реализираме рекордни инвестиции во патиштата. Почнавме со реализација на најголемата капитална инвестиција во историјата на нашата земја, изградбата на Коридорот 8 и Коридорот 10-д, европски коридори што ќе нè поврзат со исток и запад, со што Северна Македонија станува клучен транзитен центар.

Кога велам исток, мислам на Црното Море, да не има недоразбирања во смисла на идеолошките поврзувања.

Со изградбата на овие два коридора ги зајакнуваме врските со соседите, отвораме работни места, создаваме можности за нови бизниси, ги вклучуваме во работа и домашните компании и стимулираме економски раст и зголемување на трговската размена.

Северна Македонија го менува својот лик и станува уште подостапна за инвеститорите, кои сè повеќе ги препознаваат нашите можности и потенцијали.

Нема да дозволиме граѓаните да бидат изолирани и исклучени од цивилизација во сопствената држава. Наш приоритет е забрзан развој на Северна Македонија, отворање нови пазари, нови инвестиции, европска иднина овде во нашата држава. Граѓаните го заслужуваат тоа и наша обврска е тоа да го исполниме“, рече Џафери.

Додаде дека минатата година се реализирани околу 400 милиони евра во капитални проекти.

„Секој километар изграден пат во земјата е влог за сите нас, за идните генерации, за економски развој и просперитет на целата држава“, истакна Џафери.