Раководството од СДС на Клиниката за дерматологија наплаќало услуги од пациенти без да поднесе извештај до Министерството за здравство, истакна на прес-конференција Петар Марков, пратеник на ВМРО-ДПМНЕ.

„Клиниката за дерматологија има право да дава услуги на пациенти кои плаќаат со лични средства и странци во делот на козметологија за што е потребно на секои шест месеци да доставува Извештај до Министерството за обемот и видот на извршените здравствени услуги.

Дополнително за да извршува таков тип на работа, Клиниката морала да има согласност од Министерството за здравство, која што ја немало“, вели Марков.

Ова, како што дополни, е констатација на Извештајот на Државниот завод за ревизија изготвен во 2024 година, за периодот од 2023.

„ДЗР констатира дека Клиниката морала да има одобрен ценовник од Министерството за здравство, на база на кој ќе дава и наплаќа услуги, а го немала, со тоа, дадените услуги платени од парите на граѓаните ги наплаќала незаконски.

ЈО да постапи по Извештајот на ДЗР и да ги истражи овие наоди. ЈО да отвори постапка и да утврди како се наплаќани парите, колку се наплаќало и дали дел завршувале и во приватни џебови“, според Марков.

Министерот за внатрешни работи излезе со став во јавноста по смртта на 22-годишната Фросина Кулакова која беше усмртена на „Партизанска“ од 20-годишниот Васил Јованов кој бил во алкохолизирана состојба и без возачка дозвола, а улицата ја поминал на црвено светло. Тој има и проблематично минато со дрога поради кое завршил само во поправна установа со одлука на судија, а и претходно предизвикал сообраќајна  незгода без возачка за која поминал со исплатени 18.000 денари.

Министерот Тошковски изрази сочувство до семејство на девојката и констатира дека јавноста, во случајот, со право прашува, како е можно лице со криминално досие, без возачка дозвола, со голем број на претходни прекршувања на сообраќајните правила, повторно да биде зад воланот.  Ова не се само дилеми за дискусија, вели министерот, туку реален и сериозен проблем што бара конкретни и неодложни решенија.

Тој соопшти дека возачот е приведен, направени се анализи на крв и урина, обезбедени се сите релевантни докази, но тоа не ја враќа Фросина и не го менува фактот дека системот дозволил ваков рецидивизам.

„Ова е точката каде што мора да се преиспита дали постојните законски решенија се доволни? Дали воспитните мерки за сторители на сериозни дела носат резултати или само создаваат нови жртви? Дали висината на кривичните санкции за најтешките кривични дела во областа на сообраќајот е соодветна или е премногу блага за да има реален превентивен ефект?“, вели Топковски.

Најави дека ставање во функција на системот „Безбеден град“, ќе се овозможи автоматско санкционирање на сообраќајните прекршувања, без селективна правда, без оправдувања, без влијание на човечки фактор. Контролата ќе биде построга, казните неизбежни. Но, ниту едно техничко решение нема да биде доволно ако правосудниот систем не гарантира соодветно санкционирање, особено за оние кои веќе еднаш покажале дека се опасност за другите, вели Тошковски.

Според него, гневот е разбирлив, а недовербата во институциите е оправдана, но ова не смее да заврши само со пишување на гневни статуси по социјалните мрежи и протести што ќе траат неколку дена. Промените мора да бидат реални. Секој во системот мора да ја понесе својата одговорност.

СДСМ бара итно разрешување на Каролина Симовска – директорка на Клиниката за респираторни заболувања кај децата – „Козле“.

„Целото функционирање на единствениот Оддел за бронхоскопија во државата, кој се наоѓа на Клиниката во „Козле“, е доведено во прашање после 40 години поради Симовска а штетата е и за децата и за вработените.

Последен е случајот со докторката Јосифова. Со 27 годиишно искуство оваа врвна докторка дрско е избркана од работа и оставена на улица, само затоа што се борела за детски живот.

Посветена, искусна лекарка, која што загрижена за здравје на дете присуствувала при успешна лекарска интервенција Симовска ја брка“, велат од опозициската партија.

Тоа според нив е мобинг од невидени размери и класична неправда озоможена од ДПМНЕ.

„Кој ќе ги лечи децата, имате ли грам осет вие дека децата ќе нема кој да лечи? Или партијата ви е пред детските животи“, прашуваат од СДСМ.

Како што информираат, врвни специјализирани доктори за бронхоскопија, водејќи се од морална и етичка свест, веќе си дадоа оставки поради скандалозното однесување на Симовска.

„На клиниката има и проблеми со неопходни „баскет“ апарати и други материјали. Своеволието на Симовска уништува многу животи а загрозува детски животи.

Здравјето на децата нема цена и нема партиска припадност. Симовска мора веднаш да биде разрешена“, потенцираат од СДСМ.