Адвокатите на Бојан Јовановски и на ексшефицата на СЈО Катица Јанева ги оспоруваат аудиоснимките што ги направил бизнисменот Орце Камчев, а кои служат како доказ на обвинителството за случајот „Рекет“ и изнудата на 1,5 милиони евра.

Во судницата се пуштаат голем број аудиозаписи направени од Камчев, каде што тој зборува со Бојан Јовановски – голем дел од снимките се нејасни и не може точно да се слушне за што разговараат двајцата.

Адвокатот на Јовановски, Сашо Дукоски, вели дека снимките не можат да се земат предвид затоа што немаат ниту датум ниту време.

„Снимките се дадени паушално, станува збор за самостојна интерпретација за тоа кој со кого разговара. Освен тоа, нема ниту датум ниту време на снимката”, рече Дукоски.

Во однос на снимката направена во куќата на Камчев, кога Јовановски и Зоран Милески Кичеец наводно излегуваат со еден милион евра во чанта „Луј Витон“, Јовановски рече дека „материјалите се лепени”.

„Ова се лепени материјали. Ова е груба аматерка монтажа. Освен тоа, има два типа на снимање, едното е со мобилен, другото е очигледно со камерите на Камчев”, рече Јовановски.

Во еден од разговорите во позадина се слуша и гласот на Јанева, а нејзините адвокати ја оспорија снимката велејќи дека не може да се докаже чиј е гласот.

На минатото рочиште беа презентирани докази кои произлегле од вештачењето на мобилниот телефон на обвинетиот Бојан Јовановски. Меѓу другото, беа прикажани и неколку фотографии и кратки видеа на кои се гледа како поранешната специјална обвинителка Катица Јанева седи во својот дом, а на масата пред неа стои снопче пари, со банкноти од по 500 евра. Според обвинителството, во снопчето имало вкупно 50.000 евра.