Македонија
Рауфи: Обвинетите во „Монструм“ се невини, поранешните специјални обвинители се несериозни
Адвокатот Насер Рауфи, кој ги застапува обвинетите во случајот „Монструм“, во завршните зборови рече дека тие се невини, како и дека против нив нема докази. Рауфи рече дека обвинителите Фатиме Фетаи и Гаврил Бубевски се несериозни со обвинувањата, а на повтореното судење не извеле ништо ново. Адвокатот смета дека обвинителите не го знаат мотивот за петкратното убиство затоа што обвинетите не убивале кај Смилковското Езеро.
„’Монструм’ личи на аферата ‘Драјкус’ бидејќи шест невини лица беа осудени на доживотен казна затвор, и тоа од две судски инстанци. Поранешните специјални обвинители се несериозни и тие се тие што ја матат водата. Случајот ‘Монструм’ е инструиран. За обвинителите, мотивот е непознат, а тоа е секако бидејќи обвинуваат невини луѓе. Дека предметот е конструиран, не е став само на бранителите, туку и на американскиот Стејт департмент во своите извештаи во 2014 и 2015 година. Застапниците на обвинението не изведоа ништо ново, освен она што беше изведено во претходната постапката. Причина за укинување на пресудата беше недостиг на докази за некој да биде осуден. Одбраната успеа да ги разбие двата вербални доказа на Обвинителството, а тоа се двете изјави од фамозниот загрозениот сведок. Се докажа дека тој е буквално втурнат во настанот. Тој загрозен сведок беше пронајден 2-3 дена пред истекот на рокот за поднесување обвинение, тие немаа докази, па мораше да се засили. Немаа ништо, мораа да втурнат сведок. Не можеа ништо да докажат. Без него, сега Обвинителството има 50 отсто помалку докази“, рече Рауфи.
Тој им се обрати на судиите да ја откријат вистината за „Монстум“ потсетувајќи што, според него, се случувало по петкратното убиство.
„Да ве потсетам што се случуваше по овој грозоморен чин. Уште пред да биде известен ЦИК, населението во Радишани одржа протест и ја обвинија албанската популација. Од каде тие имале информации дека Албанци се извршители на овој чин? Тоа е за да се таргетираат лица од албанскиот етникум. Овие протести беа поддржани од разни медиуми за да ги подгреат атмосферата и оваа хајка. Беше организирана полициска акција со 800 полицајци, беа приведени повеќе лица, меѓу кои и баба. 30 притворени беа таргетирани како лица што го извршиле чинот, а биле членови на исламистичка банда. Убеден сум дека ваквиот редослед на настаните флагрантно ја кршеа пресумцијата на невиност и резултира со тоа постапката да биде диригирана од МВР. Осудени беа шест лица, обвинети дека се терористи, извршители на петкратното убиство“, додаде Рауфи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
АХВ спроведе засилени контоли кај операторите со храна во близина на училиштата
Во рамки на 445 инспекциски контроли спроведени во последните десетина дена, Агенцијата за храна и ветеринарство (АХВ) изрече 15 забрани за вршење на дејност на оператори со храна, додека 696 килограми небезбедна храна од непознати добавувачи беа запленети и уништени, соопшти АХВ.
Контролите биле насочени особено кон објектите во непосредна близина на основни и средни училишта, од каде учениците најчесто купуваат храна.
Инспекциските проверки откриле дека 19 оператори ставале во промет небезбедна храна, кај 30 се утврдиле незадоволителни хигиенски услови, а од вкупно контролираните, 26 оператори не биле регистрирани во АХВ.
„16 оператри немале имплементирано процедури за Добра хигиенска и Добра производствена пракса, а дури 32 немале спроведено задолжителен здравствено-саниратен преглед на вработените лица. Тројца оператори немале спроведено задолжителна дезинфекција, дезинсекција и дератизација во објектите, а 7 од контролираните објекти не ги задоволувале техничките услови за вршење на дејноста. Несоодветно означена храна со контролите била затекната кај седуммина оператори со храна“, стои во соопштението на АХВ.
За утврдените неправилности, АХВ изрече парични казни за 77 оператори во вкупна вредност од 36.470 евра. Издадени се 103 решенија за отстранување на недоследностите и 23 опомени.
Македонија
Денеска сончево, од утре голема промена на времето
Времето денеска ќе биде сончево со мала до умерена облачност. Ќе дува слаб, а во западните делови умерен ветер од југозападен правец. Минималните температури ќе бидат во интервал од -3 до 5, а максималните од 16 до 20 степени целзиусови.
Во Скопје, наутро во делови од котлината ќе има услови за појава на слаба магла. Во текот на денот времето ќе биде сончево и претежно тивко со мала до умерена облачност. Минималната температура ќе биде 1, а максималната 16 степени.
Управата за хидрометеоролошки работи информира дека утре облачноста ќе се зголеми, а од вторник ќе преовладува променливо облачно време со локални врнежи од дожд, наместа пообилни. Ќе дува умерен до засилен ветер од јужен правец (над 60 km/h).
Македонија
ЦУК: Пронајдени се двете женски лица кои се изгубија на патот кон Дрисла
Пронајдени се двете женски лица кои се изгубија на патот кон Дрисла, информираат од Центарот за управување со кризи.
„Добиена е повратна информација од Полициската станица Драчево дека двете женски лица се пронајдени на црн пат помеѓу Долно Количани и Батинци. Лицата се во добра здравствена состојба и со возило, во придружба на полицијата, веќе се движат кон Драчево. Појаснуваме дека, поради грешка во првичната комуникација, не станува збор за странски државјанки, туку за државјанки на Р.С.Македонија“, стои во известувањето од ЦУК.

