Синоќа, лидерот на ВМРО-ДПМНЕ, Христијан Мицкоски, пред целата јавност јасно ја откри суштината на својата политика: „Целта на овие избори е ДУИ да исчезне од политичката сцена“. Со Ова Мицкоски ја потврди веродостојноста на сè она што ДУИ го зборува со месеци, Мицкоски сака да биде тој што одлучува за и во име на Албанците, истакна на прес-конференција потпретседателот на ДУИ, Арбер Адеми.

Како што вели, идејата на Мицкоски, кој е маша во рацете на српскиот свет, е да спречи обединување и моќно претставување на Албанците. Само така, додава Адеми, ќе може тој и неговите патрони од северот да продолжат да го понижуваат албанскиот народ, а во власта да имаат понижени и слаби албански политичари како „Вреди“, кои ќе молчат само за да ги зачуваат своите фотелји.

„Мицкоски не сака да победи на избори, туку да избрише цела една политичка идеја за рамноправност, цел еден народ од јавниот и од политичкиот живот на Македонија.

Кога Мицкоски вели „ДУИ да исчезне“, тој вели дека Албанците немаат право сами да одлучуваат кој ќе ги претставува. Тој вели дека е време некој друг – поточно тој – да одлучи кој е прифатлив Албанец, кој може да седи на масата, а кој не. Тоа е обид за политичко чистење, кое опасно ќе му се удри од глава.

Мицкоски треба да знае дека Албанците сами избираат кој ги претставува и дека со овие изјави ја отвори вратата на пеколот, кој му следува на 19 октомври. На 19 октомври неговите пудлици од „Вреди“ ќе претрпат стравотен пораз. На 19 октомври Мицкоски ќе ги дознае моќта и поривот на Албанците да не трпат наметнати решенија. Еднаш вака згреши Заев, истата грешка ја прави и Мицкоски“, порачува Адеми.

ДУИ, додава тој, можеби не била совршена, но ДУИ, како што вели, отсекогаш била изборот на Албанците.

„’Не’ на Мицкоски. ‘Не’ на централните штабови на ВМРО. ‘Не’ на структури што сакаат покорни Албанци, кои ќе креваат рака кога ќе им се каже.

Токму затоа на 19 октомври Албанците јасно ќе кажат: Никој, апсолутно никој, нема право да го избира политичкиот претставник на Албанците, освен самите Албанци.

Најтрагично е што ‘Вреди’ е неговата алатка. ‘Вреди’ е неговиот проект за контролирана албанска политичка сцена. ‘Вреди’ е неговиот тројански коњ во Чаир, во Тетово, во Струга. Граѓаните тоа го гледаат, чувствуваат и знаат.

Нашата порака е јасна: Ние нема да исчезнеме, нема да се поклониме, нема да дозволиме некој друг да го избере нашиот пат“.