Македонија
Адеми на средба со УСАИД: Продолжува проектот за поддршка на учениците со оштетен вид

Министерот за образование и наука, Арбер Адеми, се сретна со претставници на Канцеларијата на УСАИД во Македонија на која во фокус на разговорот беа досега постигнатите резултати во рамки на проектот за поддршка на учениците со оштетен вид.
Целта на проектот кој се имплементира веќе неколку години наназад, а ќе продолжи до крајот на 2019 година е да го подобри квалитетот, но и да ја зголеми достапноста на образованието на учениците со оштетен вид, да се подобрат социјалните и здравствените услуги, мобилноста и достапноста на информации за лицата со оштетен вид и нивните семејства, како и да се зголеми подготвеноста за работа на младите со оштетен вид.
Министерот Адеми изрази благодарност до УСАИД што долги години оваа организација дава поддршка за унапредување на квалитетот на образованието, преку учество во креирањето на образовните политики и во реализацијата на бројни проекти, од кои, особен значајни се оние кои ги тангираат учениците со извесни посебни образовни потреби, посочувајќи го токму проектот за поддршка на учениците со оштетен вид. Очекува, како што рече, овој проект да продолжи да дава исклучително позитивни резултати како и во досегашниот период од неговата имплементација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Од денес пуштен во употреба магистралниот пат Охрид-Св.Наум, најави Владата

Македонија се гради. Денес официјално ќе биде пуштен во употреба магистралниот пат Охрид-Св.Наум во должина од 24,3 километри, најавуваат од Владата.
Вредноста на проектот за реконструкција на овој патен правец, како што е појаснето во официјалното соопштение изнесуваше 11,7 милиони евра.
„Ова значи дека по речиси 4 децении, не само охриѓани, туку голем број на граѓани ширум државата, но и туристи ќе можат да патуваат од Охрид до манастирскиот комплекс Св. Наум, но и до соседна Република Албанија, по нов патен правец.
Овие капитални проекти го подобруваат не само туристичкиот, туку и економскиот напредок и развој во Македонија.
Владата работи и создава дела за просперитет на Македонија“.
Македонија
Без вода дел од Кисела Вода

Регионалниот центар за управување со кризи на Град Скопје, по добиеното известување од ЈП Водовод и канализација, информира дека денеска поради изведување на водоводен приклучок на водоводна мрежа со пречник од Ф-150 мм на улицата Христо Татарчев бр. 47, прекинато водоснабдување ќе имаат корисниците од истата улица и кулите – Расдник, oпштина Кисела Вода.
Водоснабдувањето ќе биде прекинато од 09:00 часот до завршување на работните активности.
Македонија
Сончево и топло, максималната температура ќе достигне до 34 степени

Времето денеска ќе биде сончево и топло со мала локална облачност. Ќе дува слаб до умерен, а наместа долж Повардарието повремено засилен ветер од северен правец. Минималната температура ќе биде во интервал од 9 до 19, а максималната ќе достигне од 27 до 34 степени.
Во Скопје, сончево и топло. Ќе дува умерен, во делови од котлината повремено засилен ветер од северен правец. Минималната температура ќе се спушти до 17, а максималната ќе достигне до 34 степени.
Времето во наредните денови
Во следните денови времето ќе биде стабилно, претежно сончево и топло. Ќе дува умерен, во сабота наместа долж Повардарието повремено засилен северен ветер.