Македонија
Аеродромите во Скопје и Охрид со 2,4 милиона патници за девет месеци

Меѓународниот аеродром „Скопје“ и аеродромот „Св. апостол Павле“ во Охрид бележат пораст од 30 отсто на патничкиот сообраќај за периодот јануари – септември 2023 година во однос на 2022 година и пораст од 15 % во однос на 2019 година.
„ТАВ Македонија“, подружница на „ТАВ аеродроми“, членка на Групацијата АДП, известува за силен пораст на бројот на патници за периодот јануари – септември 2023 година кога вкупно 2,4 милиона (2.357.712) патувале преку Меѓународниот аеродром „Скопје“ и аеродромот „Св. апостол Павле“ во Охрид, што претставува годишен пораст од 30 проценти во однос на 2022 година.
Во споредба со 2019, која се смета за референтна година во воздухопловството, како најдобрата година во однос на патничкиот сообраќај пред Ковид-19, двата аеродрома бележат 15 % повеќе патници во периодот јануари – септември 2023 година.
Во однос на бројот на летови за истиот период, годишниот пораст е 19, односно 5 % во споредба со 2022 и 2019 соодветно, или на аеродромите во Скопје и Охрид се реализирани и опслужени вкупно 17.683 лета.
„Ние како ТАВ навистина сме среќни што забележуваме зголемување на бројот на патници за 30 % на аеродромите во Скопје и Охрид во споредба со статистиката од 2022 година. Особено ни е драго што за 9 месеци од 2023 година, со 2,4 милиона патници, речиси го достигнавме бројот на опслужени патници во целата 2022 година. Ова претставува продолжување на позитивниот тренд на закрепнување, а она што нè прави особено горди е што статистиката на воздушниот сообраќај за двата македонски аеродрома не само што ја надминува референтната 2019 година за 15 % туку ги надминува прогнозите на ACI* за обем на патници на глобално ниво во 2023 година, што е 94,2 % од нивото од 2019 година. Очекуваме до крајот на оваа година со новите линии и новите авиокомпании што влегоа на македонскиот пазар, заедно со извонредноста во нашите услуги што ги даваат нашите посветени и ориентирани кон клиентите колеги, ќе ја заокружиме 2023 година како година на соборување нови рекорди“, изјави Неџат Курт, генерален директор на „ТАВ Македонија“.
Во 2023 година, досега, две нови авиокомпании влегоа на македонскиот авијациски пазар, „Луфтханза“ и „„Норвежијан“, со редовни или сезонски летови до Франкфурт, односно Осло.
Во меѓувреме, од скопскиот аеродром „Сан експрес“ најави дека чартер-летовите до Измир и Анталија ќе продолжат да сообраќаат како редовни летови од претстојната зимска сезона, а „Визер“ почна со редовни летови до Љубљана. Дополнително, „Ејџијан“ од 2 октомври 2023 година почна да лета до Сараево.
Охридскиот аеродром беше сведок на одлична летна сезона засилена со сезонските и чартер-летовите до Белград на „Ер Србија“ и до Манчестер и Лондон („Гетвик“) на TUI.
Најчести дестинации од Меѓународниот аеродром „Скопје“, според статистиката на патничкиот сообраќај на „ТАВ Македонија“, за периодот јануари – септември 2023 година, биле Истанбул (двата аеродрома, IGA и Sabiha Gokcen со 10,8 % пазарен удел), Базел Милуз (6,1 %), Цирих (5,5 %), Виена (4,7 %), Дортмунд (4,5 %), потоа Франкфурт (4,2 %), Минхен Меминген (4,1 %), Анталија (4 %), Малме (2,6 %) и Келн (2,6 %).
Топ-5 земји со директни летови за јануари – септември 2023 година беа Германија (27,3 % удел на пазарот); Турција (16,9 %); Швајцарија (13,4 %); Шведска (6,7 %); и Италија (6,5 %).
Што се однесува до учеството на авиокомпаниите во патничкиот сообраќај за првите девет месеци од 2023 година на скопскиот аеродром, „Визер“ превезе најголем број патници (60,2 % удел на пазарот), потоа „Туркиш ерлајнс“ (7,4 %), „Пегасус ерлајнс“ (6,1 %), „Аустријан ерлајнс (4,7 %), „Чеар ерлајнс (3,7 %).
Најчеста дестинација за патување за трите квартали од 2023 година, јануари – септември, од охридскиот аеродром е Базел (21,5 % удел на пазарот), потоа Виена (21 %), Дортмунд (16,4 %), Меминген (11,9 %), Малме (9,4 %), Цирих (9,3 %), Амстердам (8,8 %), а другите дестинации имаат 0,5 %.
Во моментот, според распоредот на летови, од Меѓународниот аеродром „Скопје“ летаат 14 авиокомпании до 41 дестинација, а од аеродромот „Св. апостол Павле“ во Охрид две авиокомпании летаат до 6 дестинации.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Тошковски за тендерот за униформите: Се фокусиравме на квалитетот и цената, нема неправилности

Министерот за внатрешни работи, Панче Тошковски, реагира на обвинувањата за тендерот за униформите за припадниците на полицијата, велејќи дека постапката била предмет на задолжителна управна контрола од Бирото за јавни набавки, при што не биле најдени никакви неправилности.
По обвинувањата од опозициската СДСМ дека тендерот го добиле две фирми, од кои едната со двајца вработени, а другата отворена 20 дена пред постапката, Тошковски образложи дека нивната логика е поттикнување на конкуренцијата и фер пристап.
Премногу строги критериуми, вели Тошковски, често ги елиминираат малите и средни претпријатија, кои во Македонија се најконкурентни и често можат да понудат најдобри цени. Наша цел, додава министерот, е да добиеме најдобар квалитет по најповолна цена, а тоа го постигнуваме со овозможување на поширок круг на понудувачи.
„Законот за јавни набавки не предвидува исклучување на фирма само поради тоа што е новорегистрирана или има помал број вработени и ние целосно постапуваме согласно неговите одредби“, дециден е Тошковски.
Министерот појасни и дека МВР нема склучено договор за директна, еднократна исплата на наведената сума одеднаш, туку склучена е рамковна спогодба која претставува максимална вредност за набавки во наредните три години. Самата рамковна спогодба, вели тој, не предизвикува директна финансиска обврска за Министерството, односно финансиски обврски се преземаат само кога ќе има реална потреба и се склучуваат посебни, поединечни договори за конкретни нарачки, со динамика на испорака според потребите.
„Наместо само на историјат на понудувачите, ние се фокусиравме на она што е најважно, реалниот квалитет на производот. Затоа, клучните услови беа задолжителна достава на мостри и лабораториски анализи. Секој понудувач мораше да достави примероци од униформите и делови од униформа, а мострите беа предмет на лабораториски анализи и испитувања од независни акредитирани лаборатории. Важно е да се нагласи и дека техничките спецификации за униформите и нивните делови се уредени со Правилник кој е јавно објавен во Службен весник. Тоа значи дека тие се стандардизирани и нема можност за какво било влијание врз нивната содржина, што обезбедува еднаков пристап за сите економски оператори“, се вели во реакцијата.
Покрај квалитетот, како што се додава, клучен фактор е и цената. Анализата покажала дека разликата помеѓу највисоката и најниската понудена цена во постапката е 14,4 отсто за дел 1 и 27,9 отсто за дел 2 од набавката, што ја потврдува конкурентноста на тендерот и добиените поволни цени.
Во врска со тоа дека обвинувањата доаѓаат од СДСМ, Тошковски рече дека токму тие што ги оставија полицајците без униформи, принудени сами да си крпат, шијат или позајмуваат делови од пензионирани колеги имаат образ да зборуваат за наводни криминални тендери.
Македонија
Таравари контра Фетаи: Неговата група брои помалку од 40 луѓе кои чувствуваат вознемиреност и вина

Претседателот на Алијансата за Албанците, Арбен Таравари ја коментираше прес-конференцијата на неговите поранешни партиски соборци кои јавно денес излегоа со став дека остануваат во Влен, и не се согласуваат со неговите политики.
Таравари вели дека тоа е група од помалку од 40 луѓе на Арбен Фетаи (претходно го разреши од партиската функција), а чувствуваат мешавина од вознемиреност и вина.
„Анксиозноста е најлошото чувство кое човек го доживува…особено кога е измешано со чувство на вина! Продолжуваме помирно и посигурно од кога било кон Октомвриската победа која е блиску…многу блиску!“, пишува Арбен Таравари, претседател на Алијансата за Албанците.
Ставот на неговите поранешни сопартијци е дека Албанците сакаат да продолжи промената, а не враќање на старото, по најавите на Таравари за соработка и со ДУИ на претстојните локални избори.
Македонија
Албанците сакаат продолжување на промената, а не враќање на старото, велат неистомислениците на Таравари од Алијансата

Го слушнавме нашето членство. Се сретнавме со нашите активисти во секој град – од Липково до Струга. И пораката е јасна: Албанците сакаат продолжување на промената, а не враќање на старото. Ова беше истакнато на денешната прес-конференција на некогашните соработници на Арбен Тараври од Алијансата за Албанците, кои не се согласија со одлуката да ја напушти Владата.
На прес-конференцијата зборуваше ексминистерот од Алијансата, Азир Алиу, а присутен беше и Арбен Фетаи, којшто Таравари вчера го разреши од партиските структури.
Тие не се согласуваат со поличкиот правец кој го зазема Таравари, најавувајќи соработка и со ДУИ за претстојните локални избори.
„Во овој турбулентен политички период, кога стариот режим ги прави последните обиди да ја затемни надежта за промени, ние избравме да не реагираме брзо. Слеговме на терен, ги слушавме нашите активисти, разговаравме со партнерите и размислувавме – со смиреност и одговорност“, рече Алиу.
Оваа група од веќе поделената Алијанса, смета дека земјата има потреба од стабилност, развој, одговорно владеење и од Алијанса која нема да ja предаде довербата добиена од граѓаните. Тврди дека се залага за одговорност, а не поради лични интереси и целта е да не ја напуштат битката на половина пат.
Велат дека Алијансата не е создадена да биде ничија алатка. Таа е создадена да биде глас на граѓаните, промените, и еднаквоста.
На пресот беше истакнато дека денешната влада е постабилна од кога било, посветена на реформите и решена за интеграција. Алијансата за Албанците, како што додадоа, има клучна улога во овој процес, и тие нема да се откажат од таа мисија.
„Во однос на половичните состаноци на ограноците што се нарекуваат „партиски конгреси“ и кои шират поделби и етикетирања – тие не го претставуваат духот, ниту пак статутот на Алијансата. Изразуваме разочарување за навредите упатени кон албанската младина и жената во име на Алијансата, но нашата одговорност е да не го изгубиме правецот дури и кога другите се деградираат“, беше истаканато.
Додаваат дека ќе продолжат како рамноправен партнер во коалицијата ВЛЕН, со иста професионалност и посветеност – служејќи им на граѓаните со чест и решителност.
Крилото на Арбен Таравари во Алијансата за Албанците, претходно го разреши Арбен Фетаи од функцијата претседател на партиското собрание. Таравари изјави дека се исклучени и некои членови на Претседателството кои јавно се изјаснуваат против Алијансата за Албанците. Се работи за 8 од 46 членови. За Мимоза Муса, Таравари рече дека не е донесена одлука оти не е јасно дефинирано дали останува со Алијансата за Албанците, или со Влен.