Македонија
Аеродромите во Скопје и Охрид со 2,4 милиона патници за девет месеци

Меѓународниот аеродром „Скопје“ и аеродромот „Св. апостол Павле“ во Охрид бележат пораст од 30 отсто на патничкиот сообраќај за периодот јануари – септември 2023 година во однос на 2022 година и пораст од 15 % во однос на 2019 година.
„ТАВ Македонија“, подружница на „ТАВ аеродроми“, членка на Групацијата АДП, известува за силен пораст на бројот на патници за периодот јануари – септември 2023 година кога вкупно 2,4 милиона (2.357.712) патувале преку Меѓународниот аеродром „Скопје“ и аеродромот „Св. апостол Павле“ во Охрид, што претставува годишен пораст од 30 проценти во однос на 2022 година.
Во споредба со 2019, која се смета за референтна година во воздухопловството, како најдобрата година во однос на патничкиот сообраќај пред Ковид-19, двата аеродрома бележат 15 % повеќе патници во периодот јануари – септември 2023 година.
Во однос на бројот на летови за истиот период, годишниот пораст е 19, односно 5 % во споредба со 2022 и 2019 соодветно, или на аеродромите во Скопје и Охрид се реализирани и опслужени вкупно 17.683 лета.
„Ние како ТАВ навистина сме среќни што забележуваме зголемување на бројот на патници за 30 % на аеродромите во Скопје и Охрид во споредба со статистиката од 2022 година. Особено ни е драго што за 9 месеци од 2023 година, со 2,4 милиона патници, речиси го достигнавме бројот на опслужени патници во целата 2022 година. Ова претставува продолжување на позитивниот тренд на закрепнување, а она што нè прави особено горди е што статистиката на воздушниот сообраќај за двата македонски аеродрома не само што ја надминува референтната 2019 година за 15 % туку ги надминува прогнозите на ACI* за обем на патници на глобално ниво во 2023 година, што е 94,2 % од нивото од 2019 година. Очекуваме до крајот на оваа година со новите линии и новите авиокомпании што влегоа на македонскиот пазар, заедно со извонредноста во нашите услуги што ги даваат нашите посветени и ориентирани кон клиентите колеги, ќе ја заокружиме 2023 година како година на соборување нови рекорди“, изјави Неџат Курт, генерален директор на „ТАВ Македонија“.
Во 2023 година, досега, две нови авиокомпании влегоа на македонскиот авијациски пазар, „Луфтханза“ и „„Норвежијан“, со редовни или сезонски летови до Франкфурт, односно Осло.
Во меѓувреме, од скопскиот аеродром „Сан експрес“ најави дека чартер-летовите до Измир и Анталија ќе продолжат да сообраќаат како редовни летови од претстојната зимска сезона, а „Визер“ почна со редовни летови до Љубљана. Дополнително, „Ејџијан“ од 2 октомври 2023 година почна да лета до Сараево.
Охридскиот аеродром беше сведок на одлична летна сезона засилена со сезонските и чартер-летовите до Белград на „Ер Србија“ и до Манчестер и Лондон („Гетвик“) на TUI.
Најчести дестинации од Меѓународниот аеродром „Скопје“, според статистиката на патничкиот сообраќај на „ТАВ Македонија“, за периодот јануари – септември 2023 година, биле Истанбул (двата аеродрома, IGA и Sabiha Gokcen со 10,8 % пазарен удел), Базел Милуз (6,1 %), Цирих (5,5 %), Виена (4,7 %), Дортмунд (4,5 %), потоа Франкфурт (4,2 %), Минхен Меминген (4,1 %), Анталија (4 %), Малме (2,6 %) и Келн (2,6 %).
Топ-5 земји со директни летови за јануари – септември 2023 година беа Германија (27,3 % удел на пазарот); Турција (16,9 %); Швајцарија (13,4 %); Шведска (6,7 %); и Италија (6,5 %).
Што се однесува до учеството на авиокомпаниите во патничкиот сообраќај за првите девет месеци од 2023 година на скопскиот аеродром, „Визер“ превезе најголем број патници (60,2 % удел на пазарот), потоа „Туркиш ерлајнс“ (7,4 %), „Пегасус ерлајнс“ (6,1 %), „Аустријан ерлајнс (4,7 %), „Чеар ерлајнс (3,7 %).
Најчеста дестинација за патување за трите квартали од 2023 година, јануари – септември, од охридскиот аеродром е Базел (21,5 % удел на пазарот), потоа Виена (21 %), Дортмунд (16,4 %), Меминген (11,9 %), Малме (9,4 %), Цирих (9,3 %), Амстердам (8,8 %), а другите дестинации имаат 0,5 %.
Во моментот, според распоредот на летови, од Меѓународниот аеродром „Скопје“ летаат 14 авиокомпании до 41 дестинација, а од аеродромот „Св. апостол Павле“ во Охрид две авиокомпании летаат до 6 дестинации.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Филипче до Мицкоски: Прочитан си како буквар, не направи ниедна реформа во судството, не те интересира правдата

„Јавно ги прашувам ВМРО-ДПМНЕ и Мицкоски, до кога Венко Филипче и СДСМ ќе им бидат криви што не можат да спроведат ништо, ниту една реформа, ВМРО-ДПМНЕ веќе е очајно кога зборува за судството“, рече претседателот на Социјалдемократскиот сојуз на Македонија, Венко Филипче.
„Година и пол наназад поставуваат свои судии, свои обвинители и само го партизираат судството. Нема ништо суштински од спроведувањето на реформите. Јас бев тој којшто понудив рака бев на состанок кај примерот да направиме заеднички работни групи да се спроведе реформската агенда досега не е донесен ниту еден реформски закон од сферата на правосудството“, рече Филипче.
Во изјавата тој додаде дека од вкупно 12 закони кои што требаше да се донесат оваа година, седум од нив до јуни 2025 година и уште пет до крај на годинава – ниту еден, не само што не е донесен, не е ниту поднесен од страна на министерството за правда во Собранието, додаде Филипче.
Очигледно е како што кажа Филипче дека ВМРО-ДПМНЕ сака да го контролира судството.
„Не може партиски портпароли да кажуваат кој треба да биде зад решетки, тоа треба да го каже независно и целосно функционално судство. Тоа го бараат граѓаните.
Сакам да им порачам дека се прочитани како буквар. Еднаш граѓаните тој филм го гледаа со партизирано судство кога го користеа да се закануваат да го користат политички, да го користат како инструмент за политички прогон. Репризата во филмот ниту некој сака да ја гледа, ниту пак поминува и сметам дека граѓаните треба да ги казнат на изборите за ова однесување“, изјави Филипче.
Македонија
За формирање многудетно семејство потребен е достоинствен приход, Мицкоски ги уништи приходите, велат од СДСМ

Додека Мицкоски продолжува да ги убедува граѓаните дека треба да имаме многудетни семејства, неговата Влада прави сè за да не им го овозможи тоа. Мицкоски, кој доаѓа од високата класа и има часовници од 60.000 евра и бизнис од 10 милиони евра, не може да разбере дека за одгледување на повеќе деца се потребни пари и услови, реагираат од СДСМ откако премиерот Христијан Мицкоски кажа дека формирањето многудетно семејство е највисок патриотски чин.
Од СДСМ прашуваат, знае ли Мицкоски дека според последните статистики дури 22% од децата живеат во сиромаштија?
„Наместо да работи на политики за зајакнување на стандардот, покачување на платите, обезбедување поддршка за мајките и жените, наместо да се бори со конкретни механизми за да ги мотивира младите брачни парови да имаат деца, тој им беседи за патриотизам.
На Мицкоски треба да му е јасно дека сите сакаат деца, но за да се имаат повеќе деца потребно е родителите да се чувствуваат сигурни, со стабилни приходи и да живеат во перспективна држава. Ништо од тоа не е Македонија на Мицкоски во овој момент.
Граѓаните се иселуваат, перспективата не постои, платите не растат, економијата тоне. Владее несигурност како никогаш досега. Улиците не се безбедни, има убиства секој ден. Во ваква држава, џабе се пораките на Мицкоски за патриотизам“.
Патриотизам, како што оценуваат од опозициската партија, е да се бориш за луѓето, за секое семејство, да ги покачуваш платите, а не да ја штитиш олигархијата.
Македонија
Шукова: „Вардариште“ ќе стане современа претоварна станица, а не дива депонија

Кандидатката за градоначалник на Скопје од СДСМ, Каја Шукова, денеска изјави дека Вардариште ќе добие конечно и трајно решение како дел од планот за Скопје без диви депонии.
„Вардариште мора да се затвори како дива депонија и да се уреди како претоварна станица по европски стандарди,“ истакна Шукова.
Таа нагласи дека изминатите четири години на оваа локација не биле преземени никакви интервенции, што резултирало со сериозни еколошки и здравствени последици за граѓаните.
Во нејзината програма е предвидено Вардариште да се огради и обезбеди со 24/7 чуварска служба, да се исчисти и уреди, да функционира како регуларна претоварна станица со селекција на отпад и да биде дел од интегриран систем за управување со отпадот во Скопје.