Од опозициската ВМРО-ДПМНЕ велат дека доколку договорот со Грција е навистина добар и го гарантира македонскиот идентитет, тогаш, како што оценуваат, Зоран Заев немаше да се двоуми и ќе го ставеше истиот на референдум без дополнителни прашања кои може да ги доведат во заблуда граѓаните. Според нив, ако договорот беше историски успех за Македонија, Зоран Заев немаше да има дилеми да ги додава во референдумското прашање и ЕУ и НАТО, злоупотребувајќи ја довербата на граѓаните кон нашите меѓународни партнери.

„Договорот е штетен! Со него се бришat името Република Македонија, македонската историја, традиција и култура. Затоа Заев измислува трикови како да го измами народот за да ги оправда антидржавните политики со кои ги  покрива неспособноста и расипништвото.

Зоран Заев и владејачкото мнозинство не бираат средства за да го реализираат штетниот и капитулантски договор. Тие сега го уценуваат сопствениот народ и манипулираат со јавноста со двосмислени и тросмислени прашања сакајќи да прикажат дека оној којшто е против штетниот и капитулантски договор е против евро-атланската интеграција на Република Македонија. Граѓаните ги поддржуваат европските и западни вредности, но не ги прифаќаат штетните и погрешни политики и договори од криминалниот картел на чело со Зоран Заев.

Вистинските европски вредности и принципи се реалните реформи и работата која треба оваа неспособна власт да ја направи на тој пат. Тоа впрочем и беше сугерирано од страна на ЕУ во извештаите кои ги презентираше за нашата земја, во кои се нотира неработењето и немањето капацитет на владата на Заев да направи суштински промени во низа општествени области.

Токму затоа Заев се обидува погазувајќи устав, закони, политички принципи да дојде до својата цел, а тоа е да го згази во целост достоинството на Македонија и македонските граѓани. Последен доказ за тоа е срамниот обид да се измени Изборниот законик со мнозинство од 61 пратеник без каква било консултација со експертите и опозицијата. Тоа само говори за апсолутистичкото лице на Заев, кој со години вешто и лицемерно го криеше од граѓаните.

Никој не може да го заобиколува демократскиот принцип базиран на правниот поредок на една земја, но и принципите кои се изградени низ годините.
Оттука ВМРО-ДПМНЕ принципиелно стои на ставот дека условите кои еднаш важеле за избори треба да важат и сега. Почитување на пржинскиот концепт на техничка влада пред избори е единствен начин  граѓаните непречено да ја искажат својата волја. ВМРО-ДПМНЕ бара почитување на концептот за финансирање на политичките партии кој веќе беше договорен.

Картелот на власт не може и не смее да биде пречка за демократијата во Македонија и јасното изразување на волјата на граѓаните. Секој нивен ваков апсолутистички потег само ќе го забрза нивното паѓање од власт и враќање на демократијата во земјата каде што интересот и волјата на граѓаните ќе бидат врвен приоритет“, се вели во соопштението на партијата.