Македонија
„Ако еден фудбалски тим загуби, не значи дека треба да се откаже од фудбал“, ја коментира Ковачевски изјавата на Бектеши дека тој што ќе ги загуби изборите, треба да се повлече од политиката

Во СДСМ тече постапката согласно правилникот за кандидирање на кандидати за парламентарни избори, според она што е усвоено на Централниот одбор, и носителите и кандидатите за пратеници ќе бидат познати на јавноста преку одржување на Конгрес, на почетокот на последната недела од овој месец, информираше лидерот на СДСМ, Димитар Ковачевски.
„Носители ќе бидат искусни партиски кадри и членови, коишто и во минатото извршувале високи позиции во партијата и во државата. Сметам дека тоа ќе се однесува и на кандидатите за пратеници во сите изборни единици, но не би сакал сега да шпекулирам пред да се носат одлуките на Централниот и Извршниот одбор, рече Ковачевски.
Во однос на законот за игрите на среќа, претседателот на СДСМ кажа дека сите негови изјави се јавно достапни и објасни дека при второто гласање тој закон доби 51 глас, а тоа е недоволно согласно со нашиот Устав, бидејќи при суспезивно вето треба да има 61 глас, а во однос на гласањето, Ковачевски ги упати новинарите кон пратениците и сите партии кои учествуваат во Парламентот.
„Не сугерирам како да гласаат пратениците, тие имаат суверено право како треба да гласа во однос на интересите на граѓаните и ставот што тие го застапуваат во нивно име во Парламентот“, рече Ковачевски.
За коментарот на Крешник Бектеши дека тој што ќе ги изгуби изборите треба да се повлече од политиката, Ковачевски кажа дека тоа е исто како кога еден фудбалски тим ќе загуби натпревар, па треба сите тие фудбалери да не се занимаваат со фудбал.
„Јас сум во СДСМ од 1994, и од тогаш СДСМ победувал на избори и имал помалку успешни резултати. Ако фудбалски тим изгуби натпревар, тогаш треба сите тие фудбалери и тренери никогаш веќе да не се занимаваат со фудбал. Политичарите се занимаваат со политика, тие нудат решенија, граѓаните проценуваат што е во нивни интерес, поддржуваат една или друга политичка партија, често пати и независни кандидати“, одговори Ковачевски на новинарското прашање дали ако изгуби ќе се повлече од СДСМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Предлог – законот за Судски совет е во владина процедура

Предлог – законот за Судски совет е прикачен на е-Влада, а Министерството за правда го доби и мислењето од Венецијанската комисија.
„Станува збор за конструктивен и содржаен документ што содржи јасни насоки и препораки, особено за деловите на кои ние како Министерство вложивме сериозен фокус. Тие забелешки веќе се разгледани. Особено значајно за нас е што Комисијата го препозна транспарентниот и инклузивен процес при изработката на законот – преку јавни расправи, експертски консултации и вклучување на сите клучни чинители. Тоа е потврда дека одиме во вистински правец и дека нашите реформи се усогласени со европските стандарди. Овој пристап директно придонесува за зајакнување на довербата во законодавниот процес и во правосудството во целина“, велат од Министерството за правда.
Според нив, ова е клучен чекор за зајакнување на независноста и транспарентноста во судството.
Клучни новини кои се предвидени со Законот: се предвидува јавност во постапкатата за разрешување на претседател/заменик на Советот, постапката мора секогаш да биде транспарентна, прецизирање на критериумите за избор на „истакнат правник“, воведување јавна расправа за кандидатите за не-судски членови со цел поголема транспарентност и одговорност, зајакнување на критериумите за избор, одговорност и разрешување на членови на Советот од редот на судиите и унапредување на целокупната правна рамка согласно препораките на ЕУ.
„За првпат, ќе има објективно оценување на нивната работа, транспарентност во носењето одлуки и механизми за одговорност и на самите членови на Советот. Ова е клучна точка што ја нотираше и Оценската мисија на ЕУ – и сега директно одговараме на таа препорака. Очекуваме предлог – законот за Судски совет наскоро да биде усвоен во Собрание, како што и беше предвидено“, велат од Министерството за правда.
Македонија
Филмска музика со Тарабунов и камерен оркестар на Плочник во Центар

Градоначалникот на Општина Центар, Горан Герасимовски, ги поканува сите скопјани на незаборавен музички настан „Центарска симфонија“, што ќе се одржи утре вечер, на зајдисонце во ритамот на македонската и светска филмска музика.
Музичката ѕвезда Александар Тарабунов, заедно со камерен оркестар, ќе интерпретира познати филмски композиции, со ново симфониско руво.
„Вчера отидов на проба да ги видам нашите музичари и звучеа светски, уживав во безвременската музика од култниот македонски филм „Исправи се Делфина“ од композиторот Славе Димитров, но и во музиката од филмот „До Балчак“. За првпат пред публиката ќе биде изведена и новата песна на Тарабунов „Заедно“ адаптирана специјално за камерна оркестрација. Ги повикувам скопјани да дојдат и да уживаат во една вечер посветена на култната филмска музика. Ќе се сплотиме ‘Заедно’ со емоции и музика, во Центар, во срцето на нашето Скопје. Ваквите настани се потсетник дека Центар е и ќе остане културното срце на Скопје. Ве очекуваме на едно магично музичко патување низ времето и сеќавањата“, вели Герасимовски.
Настанот е во организација на Општина Центар, а во соработка со МГ Мјузик продукција. Влезот е слободен.
Македонија
Се очекува Македонија годинава да ја посетат 1,5 милиони туристи, најбројни се гостите од Турција

Македонија веќе бележи двоцифрен годишен пораст во бројот на странски посетители, најновите податоци покажуваат 21.6 % раст во првата половина од 2025, во однос на истиот период од минатата година, соопшти Министерството за култура и туризам.
Од таму велат дека ако се задржи ваквиот тренд, се очекува дека бројот ќе достигне околу 1,5 милиони странски туристи до крајот на годинава, според пресметки на локалните туристички работници.
Туристите од Турција и понатаму се најбројни, со учество до 42% меѓу странските гости и постојан раст. Србија покажува исто така забележителен подем, односно раст од 20–30%, особено во Скопје и Охрид. Раст бележат и Германија, Грција, Хрватска и Романија, кои остануваат меѓу првите 10 пазари. Пазарите како Бугарија, Албанија и Словенија се стабилни, додека кај држави како Косово, САД, Италија и Холандија не се забележани значајни промени.
„Ова би можело да донесе приходи до 500 милиони евра и важно е државата и бизнисите да инвестираат во инфраструктурата, зајакнување на туристичките капацитети, развој на одржлив туризам и рамномерен регионален развој за да го одржат темпото и да извлечат максимум корист“, велат од Министерството.
Во услови на зголемен развој на туризмот, според Министерството, се наметнува потреба од реформски мерки во насока на градење ефективен систем на туризмот и создавање поврзана функционална целина која има за задача да одговори на потребите на туристичката дејност и туризмот.
„За таа цел Министерството за култура и туризам презема низа реформски и организациони мерки, за што во моментов се одвива процес на преземање на Агенцијата за промоција и поддршка на туризмот и екипирање на секторот во рамки на министерството со што Министерството за култура и туризмот станува адреса за обраќање за туристичкото стопанство“, се наведува во соопштението.