Македонија
Активисти на средба со Пендаровски: Над 25.000 луѓе починаа досега поради загадениот воздух

Над 25.000 наши граѓани починале прерано изминативе осум години поради загадениот воздух што го дишеме, институциите не ни функционираат, живееме со затворени прозорци поради токсичниот чад што се шири и ни го зема здивот, порачаа претставници на здружени граѓански организации и иницијативи на средбата со претседателот Пендаровски.
Како што велат од таму, претседателот е последната надеж во долгиот синџир институции до кои се обратиле во својата долгогодишна борба за правото на здрава животна средина.
„Се соочивме со некоординираноста и недоволна активност на централната власт како во повикувањето на локалната самоуправа да ги спроведе активностите доделени со децентрализацијата така и во исполнување и спроведување на законските одредби на централно ниво. Немањето поддршка од МВР ја поткопа довербата дека е сојузник во решавањето на проблемот“, се наведува во соопштението на „О2 иницијатива“.
На средбата со претседателот претставниците на здруженијата изнеле неколку барања и очекувања:
– официјализирање на кризaта со загадениот воздух и прогласување вонредна состојба;
– загадувањето и климатските промени да се третираат и класифицираат како закана и ризик за националната безбедност и да преминат од еколошки во безбедносен проблем;
– претседателот како адвокат на граѓаните и потписник на буџетот да влијае врз значително зголемување на расходите за заштита на животната средина и намалување на загадувањето;
– решавање на проблемот со увозот на отпад и немањето потребна контрола при влезот во нашата држава;
– Шар Планина да се прогласи за национален парк во најитен можен рок бидејќи процесoт трае повеќе од 20 години, а уништувањето продолжува;
– да престане изградбата на мини хидроцентрали, кои имаат негативно влијание врз реките;
– РЕК „Битола“, најголемиот индустриски загадувач, да добие А-дозвола за усогласување со оперативен план до крајот на годинава;
– формирање фонд за животна средина, како предизборно ветување на СДСМ во владината програма;
– носење на законот за комунална полиција и утврдување на причините за застојот;
– утврдување дали постои недозволена продажба на старите хемикалии од кругот на ОХИС.
Здруженијата информираат дека претседателот Пендаровски покажал отвореност за нивните барања, но велат дека доколку во најкраток рок нема конкретни резултати, како граѓански активисти ќе ги искористат сите демократски права во борбата за заштита на уставно загарантираното право на здрава животна средина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Партиите од ВЛЕН отсега ќе делуваат како еден политички субјект

Коалицијата ВЛЕН известува дека „денес е направен првиот чекор кон целосно политичко обединување, со заедничка визија и обединета структура, како единствена сила што ја претставува надежта, достоинството и иднината на Албанците во оваа земја“.
„На денешниот состанок беше формирано Заедничкото Претседателство на ВЛЕН, како прв орган што ќе ги координира сите политички и организациски активности на коалициско ниво.
Од денес стапува во сила мораториум на јавните активности на политичките партии учеснички во ВЛЕН, при што сите активности и настапи ќе се реализираат исклучиво под името, логото и единственото претставување на ВЛЕН.
Во наредниот период ќе се формираат и другите заеднички органи, вклучително и Раководството на ВЛЕН и Шефот на Изборниот штаб, кој ќе ја води подготовката за претстојните избори.
Пратеничката група на ВЛЕН ќе продолжи да функционира со актуелните пратеници кои го поддржуваат процесот на обединување и се посветени на јакнење на заедничкиот глас на Албанците“, велат од ВЛЕН.
Македонија
(Видео) Запален домот на Александар Пандов: Нема да не запрат и нема да не поколебаат

Директорот на Управата за извршување на санкции, Александар Пандов на социјалните мрежи објави дека му бил запален домот.
„Ова е данокот за нашата борба за владеење на правото без калкулации? Ова е цената за удирањето по мафијата! Домот ми беше запален, и имам основано сомневање дека станува збор за смислен атак на криминалците!
Нема да не запрат и нема да не поколебаат. Никој не е над законот! Нема враќање назад кога се бориш за правдата. И кога ќе тргнеш против криминалот, тој се брани со насилство. Но ова нема да ме запре — напротив, само не зајакнува!“, напиша Пандов.
Тој додаде дека очекува институциите да го најдат и казнат сторителот.
Македонија
Милошоски: Не помина интерпелацијата на Левица и СДСМ за Тошковски, целта им беше лична дискредирација и злоупотреба на трагедијата

„Не помина интерпелацијата на Левица и СДСМ против МВР, Панче Тошковски. Целта им беше провидна“, напиша на социјалните мрежи Антонио Милошоски.
„Прво лична дискредитација на Тошковски, а потоа злоупотреба на семејните емоции од големата трагедија во Кочани. Манипулативни намери, наместо реални предлози и поддршка“, додаде тој.