Секторот за инспекциски работи на Општина Центар во текот изминатите денови спроведува акција на терен за контрола на разни правни субјекти во однос на контрола на градилиштата. Поделени се известувања со обврски во согласност со Законот за јавната чистота, со кои се информираат изведувачите на градежни објекти да не вклучуваат во сообраќај моторни возила со валкани тркала, да не оставаат градежен шут, отпад и градежен материјал, освен на места определени за таа намена, да не се пали и уништува смет. Да не се палат огнови на отворено за греење на работниците. Дополнително, сите возила што излегуваат од градилиштата мора да имаат измиени тркала и да се покриени со церади поради контрола на прашината.

Извршена е контрола на јавните површини на целата територија на општината во однос на палење и уништување садови за собирање смет, како и палење, закопување и уништување смет.

Направен е интензивен инспекциски надзор на инсталации во надлежност на Општината, кои подлежат на елаборат за животна средина и користат разни енергенти за греење или подготовка на храна: ресторани, сендвичарници, сервиси за миење возила, а извршена е и контрола на оставање отпад на приватен имот  во согласност со Законот за управување со отпадот како потенцијална опасност од палење, предизвикување пожар и опасност за животот и здравјето на граѓаните.

При надзорот поминати се 12 градилишта во населбите: Водно, Пролет и Ново Маало, каде што се оставени известувања во однос на почитување на мерките за јавна чистота и превентивно намалување на загадувањето на воздухот, а изречена е 1 казна за сообраќај со возило со валкани тркала. Поминати се 2 напуштени локации, со присутен отпад на приватен имот, за кои ќе се спроведат инспекциски постапки во согласност со Законот за управување со отпадот. По пријава од граѓани за палење пластика и кабли, извршен е увид на Калето, на потегот од Француските гробишта кон американската амбасада, при што не се затекнати сторители на самото место.

Општина Центар и градоначалникот Горан Герасимовски упатуваат апел до граѓаните да го намалат користењето на возилата, да не се користат отпадни материјали за затоплување на домовите, да се користи суво и чисто дрво, без примеси од земја и отпадоци, печките на дрво да се користат и одржуваат според упатствата на производителот и редовно да се чистат оџаците.