Македонија
Албанскиот опозициски фронт: Груби ја претвора зоната во Визбегово во коцкарски центар, еснафите ја изградија со многу труд

Индустриската зона Визбегово, која еснафите макотрпно ја развиваа со децении, Артан Груби преку ноќ ја претвора во центар на валкани бизниси, реагираат од албанскиот опозициски фронт: Алтернатива – Движење Беса – Демократско движење.
„Лотаријата на Северна Македонија, која ја водат најблиските луѓе на Артан Груби, набргу се очекува да се пресели во индустриската зона Визбегово во Скопје. Лотаријата на Северна Македонија ќе се позиционира покрај патот Скопје – Блаце, каде што веќе функционираат неколку казина, чиј број од ден на ден се зголемува.
Индустриската зона Визбегово, најверојатно, ќе се претвори во Лас Вегас, а овој план го спроведуваат Артан Груби и ДУИ“, реагираат од опозицискиот фронт.
Ако до вчера имаше дилеми зошто барањата на албанските бизниси од оваа зона беа тотално игнорирани од ДУИ и нејзините функционери, сега се станува јасно, велат од овие партии.
„Тие имаа друг план на ум за оваа зона. Да го направат центар за коцкање. Оваа зона, која чесниот албански бизнисмен, еснафите, ја градеа со децении, Артан Груби и ДУИ преку ноќ решија да ја претворат во зона на казина, брзи кредити, хотели и мотели. Оваа зона, која досега се слушаше само за позитивни вести, за успешни приказни, Артан Груби реши да ја направи зона на проблеми, убиства и валкани работи бидејќи казината носат такви последици. Не зборуваме за шпекулации. Зборуваме за факти. Алчноста на Артан Груби и ДУИ за пари нема крај. Ова зло мора да заврши, а за ова ни треба помошта од граѓаните“, потенцираат од албанскиот опозициски фронт.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муцунски ќе учествува на Бледскиот стратешки форум 2025

Министерот за надворешни работи и надворешна трговија, Тимчо Муцунски, денес и утре ќе престојува во Република Словенија, каде што ќе учествува на Бледскиот стратешки форум, кој се одржува во градот Блед.
Во рамките на форумот, министерот ќе се обрати на панел-дискусијата на тема „Нема регион за младите – време е за промени“. Сесијата ќе ги обедини министрите за надворешни работи и младите експерти од регионот, нудејќи уникатна можност за соочување со предизвиците и разгледување на вистинските потреби за суштинска трансформација.
Покрај учеството во официјалната програма, тој ќе присуствува и на работен појадок со министрите за надворешни работи од регионот, каде што ќе се направи пресек на актуелните состојби и предизвици на Западен Балкан.
На маргините на форумот, предвидени се и повеќе билатерални средби со министри и претставници на меѓународни организации.
Македонија
МОН: Учениците со љубопитност да чекорат по патот на знаењето, а наставниците да продолжат да им го трасираат патот кон успехот

Министерството за образование и наука на сите наставници и стручни соработници, на учениците и нивните семејства им посакува успешна учебна година. „Со добро здравје и силна посветеност кон учењето и работата, да ги остварат личните обврски и цели“.
„Ги охрабруваме учениците со љубопитност да чекорат по патот на знаењето, кое е најмоќната алатка за успех што секој може да ја понесе со себе низ животот. Да бидат истрајни во справувањето со предизвиците и на нив да гледаат како нови можности за лична надградба и просперитет.
До наставниците и сите вработени во училиштата изразуваме искрена благодарност и почит. Тие се столбот на образованието и заедно со родителите/старателите треба да продолжат да им го трасираат патот кон успехот на новите генерации“, велат од МОН.
Министерството за образование и наука соопштува дека и натаму ќе се заложува за квалитетно, современо и инклузивно образование за сите.
„Потребна е соработка и поддршка. Повикуваме на обединетост во градењето на училишта исполнети со знаење и почит, во градењето на средина во која младите ќе сакаат да останат и да го вложат својот потенцијал“, се додава во соопштението од МОН.
Македонија
ВМРО-ДПМНЕ: Македонија инфраструктурно се трансформира, изградени и пуштени во употреба над 70 километри експресни патишта и автопат

„Македонија интензивно и засилено се гради во сите делови на државата. За една година ВМРО-ДПМНЕ покажа како се работи посветено и како се реализираат крупни капитални инфраструктурни проекти кои ја трансформираат Македонија. Изградбата на големите патни решенија значително го подобрија и забрзаа патниот сообраќај, граѓаните побрзо и побезбедно стигнуваат до посакуваната дестинација, а позитивно влијаат и на економијата“, велат од ВМРО-ДПМНЕ.
„Така, за една година се завршија и пуштија во употреба над 70 километри експресни патишта и автопат. Владата предводена од ВМРО-ДПМНЕ, за една година ги заврши и пушти во употреба двете делници од експресниот пат Градско-Фариш, во должина од 25,7 километри, како и 25,5 километарската делница Страцин-Крива Паланка која е дел од експресниот Куманово-Крива Паланка.
Со интензивирање на градежните активности, се изгради и пушти во употреба делницата Врбјани-Ботун долга 20 километри, дел од автопатот Кичево-Охрид, а многу наскоро во употреба ќе биде пуштена уште една делница.
Додека пак, до крајот на 2026 година, во употреба ќе биде пуштен целиот автопат.
Паралелно со изградбата на овие значајни патишта, засилено се гради и на автопатиштата Тетово-Гостивар и Прилеп-Битола, кои се очекува да завршат и да се пуштат во употреба во 2027 година.
Со ова темпо на градење на патишта, во следните неколку години, државата ќе биде поврзана со експресни патишта, а и целосно ќе се заврши и стави во функција автопатската мрежа.
Македонија се трансформира и развива, а промените ги гледаат и чувствуваат граѓаните на дело“, соопшти ВМРО-ДПМНЕ.