Македонија
Алтернатива почува кампања за спречување на иселувањето

Централното претседателство на Алтернатива донесе одлука која синоќа беше прифатена и од Централното собрание на партијата, за прогласување на новата политичка платформа под наслов „Наше огниште – наша Алтернатива“.
Синоќа по неколкучасовна дебата во двата органи на партија, беше донесена одлука од денес Алтернатива да започне со промоција на кампањата за сензибилизација, која е артикулирана преку платформата за спречување на иселувањето „Наше огниште – наша Алтернатива“
Алтернатива смета дека во време кога интеграциониот процес на земјата е на добар пат и нема враќање од тоа, не е тешко да се констатира дека, покрај низа незатворени проблеми, како што се меѓуетничките односи, но и високата корупција и недоволно присуство на правната држава, најголем проблем за Северна Македонија, следствено и за Албанците во ова држава, е масовното иселување на младите и испразнувањето на нашите населени места.
Алтернатива, како десничарска партија која се ангажира за зачувување на населението во овие краишта и не сака да остане рамнодушна кон овој проблем, смета дека спречувањето на иселувањето е наша историска, етничка, културна и религиозна должност, информира партијата.
За таа цел, Алтернатива подготви документ, во кој се идентификувани причините на иселувањето, но и мерките кои треба да се преземаат за спречување на таа појава. Тука е почетокот на кампањата за сензибилизација, но и синтетизираниот програмски идентитет на Алтернатива.
„Идејата на нашиот политички субјект е ова кампања да се реализира низ три фази: 1) во првата фаза ќе се спроведе акција за сензибилизација против иселувањето, но и комуникација со граѓаните за да се слушнат непосредно од нив причините за оваа појава, како и нивните предлози за спречување на истата: 2) втората фаза предвидува трибини, панели и дебати со експерти од различни области, во кои ќе се дискутира за причините на иселувањето, како и за мерките за спречување на оваа појава: и 3) во последната фаза, откако ќе се резимираат сите податоци од првите две фази, Алтернатива ќе ѝ предложи на Владата на Северна Македонија една „Национална стратегија за спречување на иселувањето на населението“, која откако ќе биде усвоена, ќе почне со имплементација на предложените мерки.
Затоа од денес челниците, функционерите и другите претставници на партијата ќе бидат на терен, да поразговараат со граѓаните и да го слушаат нивниот глас за овој проблем. Како политичка партија која секогаш е покрај граѓаните, сметаме дека единствениот начин за автентично претставување на граѓаните е преку непосредно слушање на нивниот глас и при директен контакт со нив. Нашите огништа се аманет за нас“, велат од партијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Пин петрол: Сета документација е доставена до надлежните органи

Сета документација во врска со нашето правно лице се доставени до надлежните органи за кои имаме одговор дека немаме никаква поврзаност со овој настан, велат од компанијата Пин петрол по кривичната пријава од финансиската полиција за проневера на околу 22 милиони денари.
Од таму испратија демант за поврзаност со уапсено лице и велат дека немаат никаква поврзаност со кривичноправниот настан.
Демантот го пренесуваме во целост:
„Како компанија “Пин Петрол” во целост демантираме и се оградуваме од наводите на некои медиуми кои пренесоа информација за некаква поврзаност со уапсената Габриела Крстевска. Ние како компанија немаме никаква сопственичка ,правна и родбинска поврзаност со осомничената. Ние како правно лице имаме склучено договор со АД Пошта Македонија (подружница Пин Петрол) за кое осомниченото лице Габриела Крстевска има работено. Како компанија најостро ги осудуваме ваквите наслови на некои медиуми и за било какви информации во врска со осомничената одговорите треба да ги барате во АД Пошта Македонија. Сета документација во врска со нашето правно лице се доставени до надлежните органи за кои имаме одговор дека немаме никаква поврзаност со овој настан“.
Македонија
Тимска игра на хуманост – Андријана Јовановска типуваше, а Mozzart донираше

Хуманоста е секогаш на прво место, мото по кое се води компанијата Mozzart. Една од наjпознатите и редовни хуманитарни акции е хуманитарниот тикет за викенд кој по втор пат оваа година е добитен. Овојпат типувач беше новинарката Андријана Јовановска која одлучи добивката да ја донира на семејството од Петровец чија куќа изгоре во пожар.
„Многу се израдував кога ми јавивте дека хуманитарниот тикет е добитен и дека ќе може заедно да донираме пари на едно прекрасно семејство на кое му е потребна помош. Станува збор за дедо Трајан Трпковски од с. Петровец, кој на 82 години неодамна го изгуби својот дом во пожар. Верувам дека семејството наскоро ќе ги собере потребните средства и дека ќе имаат нов, топол дом. Да не звучам клише, но фала ви и вам за можноста да типувам преку хуманитарниот тикет, па заедно да им дадеме малку надеж на оние на кои им е потребна“, изјави Андијана Јовановска новинар во CRNOBELO.com.
Куќата на семејството Трпковски изгоре во пожар пред два месеци по што е причинета голема штета. Потребна е итна санација, бидејќи во моментов во неа нема услови за живот. Донацијата од Mozzart ќе биде од исклучително значење за семејството.
„ Драго ми е што по втор пат годинава имаме добитен хуманитарен тикет. Преку ова акција до сега помош стигна на голем број адреси. Се надеваме дека со нашата донација ќе успееме да помогнеме за санација на куќата. Реализацијата на хуманитарниот тикет за викенд продолжува и натаму” , изјави Ивана Стефановска Крстевска од Mozzart.
ПР
Македонија
Финансиска полиција во Пин петрол, сомнеж за проневера на 22 милиони денари

Управата за финансиска полиција до Основното јавно обвинителство Куманово поднесе кривична пријава против управителот на фирмата Пин Петрол, против вработена во АД за поштенски сообраќај Пошта на Северна Македонија и против вработена во Јавното претпријатие за државни патишта за злоупотреба на службена положба и овластување, проневера во службата и несовесно работење во службата.
Управителот е осомничен дека не уплаќал пари на Јавното претпријатие за државни патишта за период од 01.08.2019 до 30.09.2024 година.
„Првопријавениот Д.П. во својство на управител и одговорно лице во правно лице Пин Петрол ДОО Куманово, кое врши работи од јавен интерес согласно Законот за возила на РСМ, иако бил свесен дека од страна на правниот субјект Пин Петрол ДОО Куманово не се врши редовна и перманентна уплата на парични средства по основ на надоместок за јавни патишта кон Јавното претпријатие за државни патишта согласно месечните извештаи за ставки од Регистрација според вид и подкатегорија на возила од надоместокот за Јавни патишта, ја злоупотребил својата службена положба и овластување доверена од Јавното претпријатие за државни патишта со Договор за извршување работи за наплата на надоместокот за употреба на јавните патишта (патна такса) а за кој претходно правното лице Пин Петрол ДОО Куманово има добиено овластување од Министерството за внатрешни работи на РСМ да врши технички преглед на возила, на начин што спротивно на обврските од Договорот не извршил контрола и не преземал никакви мерки и дејствија за реална уплата кон Јавното претпријатие за период од 01.08.2019 до 30.09.2024 година“, соопшти финсиската полиција.
Второпријавената Г.С.П. во својство на службено лице, во АД за поштенски сообраќај Пошта на Северна Македонија во државна сопственост – Скопје, Договорна пошта Куманово со правниот субјект ПИН ПЕТРОЛ ДОО Куманово, со намера да прибави противправна имотна корист за себе, наплатените парични средства од правни и физички лица на име надоместок за јавни патишта, ги присвоила за себе, наместо истите да ги уплати на сметката на Јавното претпријатие за државни патишта.
Третопријавената Н.С. во својство на службено лице во Јавното претпријатие за државни патишта, постапила несовесно при вршењето на своите овластувања и должности на начин што пропуштила должна контрола и надзор на разликата помеѓу приливите од станицата за технички преглед Пин Петрол Куманово по основ Патна такса и покрај тоа што на увид ги имала месечните извештаи од станицата за технички преглед каде е наведено колкав износ по горенаведениот основ е наплатен од нивна страна, со што предизвикала штета на Буџетот на Јавното претпријатие за државни патишта.
Со горенаведените дејствија, пријавените предизвикале штета на Буџетот на Јавното претпријатие за државни патишта во вкупен износ од 22.294.343,00 денари.