На 18-тото Генерално собрание на Американската стопанска комора во Македонија претставници на компаниите членки на „Амчам Македонија“ избраа 5 нови членови на Одборот на директори, соопштија од Американска стопанска комора во земјава.

„Оваа година на Собранието присуствуваа 120 претставници од компаниите членки на Комората. Настанот официјално го отвори тековниот претседател на Одборот на директори, Славко Пројкоски, кој посочи дека деловниот сектор треба да има можност континуирано да дава препораки и коментари за предложени измени во законодавството, како и да разговара со креторите на политики за идеи што би ја подобриле регулативата и би го зајакнале деловното опкружување. Амчам континуирано работи на подобрување на локалната деловна средина преку организирање настани за размена на знаења, како и преку директен ангажман со креаторите на политиките во насока на идентификување на клучните економски и општествени предизвици и можни решенија“, се наведува во сооопштението на Американска стопанска комора во Македонија.

Прашањата како што се јакнење на транспарентноста и предвидливоста на политиките и подобрување на квалитетот на образованието се дел од приоритетите на членовите на Одборот на директори на „Амчам“, извршната канцеларија и членовите на комитетите, посочи во својата изјава Пројкоски.

Официјално обраќање имаше и амбасадорот на САД во Република Македонија, Џес Бејли, кој нагласи дека „Амчам Македонија“ е најактивна странска и локална бизнис-асоцијација во делот на заземање за деловната заедница, укажувајќи ја важноста од учеството на бизнис-заедницата во демократските случувања и промени во земјата, како и можноста за напредок, проширување на пазарот, борба со корупцијата, зголемување на транспаретноста и предвидливоста на бизнис-политиките како неколку од многуте придобивки од членството на земјата во НАТО.