Македонија
Ана Петровска кандидат за градоначалник на Скопје

Разрешената директорка на Инспекторатот за животна средина, Ана Петровска, ќе биде кандидат за градоначалник на Град Скопје. Таа ќе биде независен кандидат од „Зелен хуман град“. Петровска посочи дека сака да ги расчистува депониите, да ги направи енергетски ефикасни сите објекти, но и да донесе нов урбанистички план за да се сочува зеленилото.
„Ние имаме заедничка визија. Мислам дека заедно можеме да ги направиме промените кои граѓаните желно ги посакуваат. Сакаме градот да го отвориме кон јавноста, да биде поотчетни, да зборуваме за начинот како се програмираат и трошат парите на граѓаните. Услугите на граѓаните се пред сè, тие треба да бидат достапни, ќе работиме и на дигитализација. Ќе ги носиме младите, маргинализирани и луѓето со хендикеп во носењето на одлуките. Ќе работиме на нов урбанистички план кој ќе ја запре бетонизацијата, ќе го заштити постојното зеленило и ќе воспостави урбана мобилност. Загадувањето на воздухот е многу важна тема. Како град нема многу надлежности, но ќе работиме на краткорочен акциски план, согласно новиот Закон за амбиетен воздух“, рече Петровска.
Според неа, има многу можности да се работи на локално ниво и да се направат големи промени.
„Имам познавања од тоа што значи урбан развој, планирање на градот, но имам осет и за локален развој бидејќи имам работено со многу мали и средни претпријатија. Треба многу да работиме со отпадот, но не на традиционален начин. Да ги санираме последиците од долгогодишните последици од Вардариште. Загадувањето на воздухот е исто така тема“, додаде Петровска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Завршен првиот дел од санацијата на хидросистемот Ѓавато, кој повеќе од 4 години беше со пробиени цевки

Заврши првата фаза на санирање на хидросистемот Ѓавато. Бунарскиот дел е комплетно завршен, пуштена е водата и нема никаде протекување, објави премиерот, Христијан Мицкоски.
Тој додаде дека останува уште една интервенција на цевката за испуст и со тоа ќе бидат дуплирани количините вода кои ќе се влеваат во Дојранското езеро.
„Каква беше состојбата пред интервенцијата? Повеќе од четири години пробиени цевки на двата функционални бунари. Потрошени повеќе од половина милион евра за електрична енерија, а ефектот минимален или никаков. Два функционални од десет направени бунари. Негрижа и срам. Во втората фаза ќе обезбедиме најмалку уште две бунарски пумпи за зголемен капацитет и побрзо полнење на Дојранското езеро. Владата во втората фаза ќе го задолжи ФОД при ЕСМ (поранешно ЕЛЕМ) да ги репарира постојните потисни пумпи. Конечно во последната трета фаза ќе инсталираме сончеви панели со батерии за акумулирање на електричната енергија и сопствено производство на електрична енергија. Нема трошење милиони евра од буџетот за електрична енергија“, напиша Мицкоски.
Македонија
СДСМ ги објави имињата на уште 11 кандидати за градоначалници

Попладнево се одржа седница на Извршниот одбор на СДСМ. Членовите донесоа одлука со која е дадена согласност за кандидатури за градоначалници во уште 11 општини низ државата:
1. Бутел – Оливера Ливриниќ
2. Велес – Маја Хеско
3. Гевгелија – Миле Атанасов
4. Делчево – Дејан Глинџарски
5. Демир Капија – Лазар Петров
6. Конче – Благој Илиев
7. Кратово – Влатко Спировски
8. Кривогаштани – Игор Каравиловски
9. Македонски брод – Ивица Стојковски
10. Ранковце – Даниел Крстевски
11. Старо Нагоричане – Далибор Трајковски
„СДСМ јасно ја потврдува својата подготвеност да понуди силни, чесни, квалитетни и докажани кандидати за претстојните локални избори кои ќе работат во интерес на граѓаните и напредок на општините’“, соопштија од партијата.
Македонија
Гужва на границите: на Богородица и Табановце се чека по 40 минути

Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, информира АМСМ.
На ГП Богородица времето на чекање за влез е околу 40 минути, на ГП Дојран времето на чекање за влез е околу 20 минути, на ГП Табановце времето на чекање за излез е околу 30 минути, додека пак на останатите граничните премини од македонска страна нема подолги задржувања за влез и излез од државата.
Од денеска од 05:00 часот регионалниот пат Р-1106 Нова Брезница – Македонски Брод преку националниот парк Јасен ќе биде пуштен за сообраќај во термините од министерство за внатрешни работи. Се препорачува внимателно возење, почитување на сигнализацијата и прилагодување на брзината поради можни одрони на патот.