Македонија
Андоновски – Стојменова-Дух: Македонија и Словенија ќе соработуваат на полето на дигитализацијата

Министерот за дигитална трансформација, Стефан Андоновски, денеска во Марибор, Словенија, оствари работна средба со својата словенечка колешка, министерката за дигитална трансформација, Емилија Стојменова-Дух. Двајцата министри на средбата разговараа за можностите за соработка во областа на дигитализацијата. Андоновски изрази почит за словенечките достигнувања во дигитализацијата. Тој нагласи дека Македонија има амбиција не само да ги следи туѓите примери туку и да развие свои иновативни решенија.
Андоновски ги претстави целите и приоритетите на новоформираното Министерство за дигитална трансформација. Тој истакна дека Владата на Република Македонија ја смета дигиталната трансформација за клучен приоритет во развојот на земјата.
Новото министерство ќе работи на развој на дигитални вештини, подобрување на инфраструктурата и промовирање дигитални јавни услуги. Фокусот ќе биде на четири главни области: дигитална економија, образование, локален пристап и дигитална јавна администрација.
Министерот Андоновски нагласи дека дигиталната трансформација ќе придонесе за подобро владеење во насока на зголемување на ефикасноста и транспарентноста во јавниот сектор.
Стојменова-Дух изрази подготвеност Словенија да ја поддржи Македонија во овој процес и да ги пренесе позитивните искуства. Таа истакна дека ваквата поддршка е во согласност и со политиките на Европската Унија за земјите од Западен Балкан во забрзувањето на дигиталната трансформација, што е неопходно за унапредување на услугите што ги добиваат граѓаните.
„Целта на Македонија е да стане дигитален центар во регионот. Ова ќе им помогне на граѓаните, ќе ја зајакне економијата и ќе го подобри угледот на земјата на меѓународно ниво“, нагласи Андоновски на средбата.
Двајцата министри се договорија да ја зајакнат соработката во иднина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Почина Панчо Минов, поранешен пратеник и градоначалник на Кавадарци

На 67-годишна возраст денеска почина Панчо Минов, поранешен градоначалник на Кавадарци и поранешен пратеник во Собранието.
Панчо Минов беше дипломиран правник и политичка фигура со повеќедецениско искуство. Тој два пати беше избран за градоначалник на Општина Кавадарци – прво како кандидат на Либералната партија (2000–2005), а потоа како независен кандидат (2005–2009).
Минов имаше и пратеничка кариера, учествувајќи во повеќе состави на Собранието.
Првпат беше избран во првиот повеќепартиски состав (1990–1998), а подоцна повторно стана пратеник преку ГРОМ (2016–2020) и СДСМ (2020–2024).
Македонија
Уште колку луѓе треба да настрадаат за Панче Тошковски да почувствува одговорност, прашуваат од СДСМ

Министерот Панче Тошковски без око да му трепне јавно соопшти дека не чувствува никаква одговороност за колапсот на безбедносниот систем и фактот што на улиците се пука како да сме Див Запад, велат од СДСМ.
Според нив, последиците од партизацијата на полицијата и претоварењето во партиски сервис на ДПМНЕ скапо ги чини граѓаните.
„До кога мисли Тошковски да се криe зад политички реторики додека улиците стануваат небезбедни за граѓаните?
Не е само последното пукање во Куманово, непрекинатиот раст на вооружените и насилни инциденти во различни градови е сигнал за целосно системско потфрлање на безбедниот апарат, нема ниту превенција ниту соодветна реакција.
За тоа мора да има одговорност“, додаваат од оваа партија.
Македонија
Парични казни за три градинки и едно училиште по спроведени инспекциски контроли во кујните

Инспекциските служби на Агенција за храна и ветеринарство (АХВ), во септември годинава спроведоа инспекциски контроли во училишните и кујните во градинките на територијата на цела држава. Спроведени беа 91 контрола во градинки и 23 вонредни надзори во училишта.
За утврдените недоследности, издадени се 9 решенија со наредби за нивно отстранување. Во две градинки, хигиената не била задоволителна во кујните, а една градинка немала спроведено задолжителен здравствен преглед на вработениот персонал во кујните. Парични казни изречени се за 3 градинки, и поради несоодветно чување, уништени се 24 килограми храна.
Од спроведените контроли во училиштата, незадоволителни услови констатирани се само во една училишна кујна. Отстапки во однос на добрата производствена и добра хигиенска пракса утврдени се во две кујни. Поради погрешно декларирање, уништени се 59 килограми храна.
Инспекциските служби на АХВ за утврдените недоследности со контролите во училишните кујни изрекле 1 парична казна и донеле 5 решенија со наредба за нивно отстранување.