Македонија
Анкета на „Макфакс“ – „метла“ за Дураки, Филипче и Османи

Во онлајн-анкетата што ја спроведе истражувачкиот центар на „Макфакс“ на прашањето кои тројца министри треба да добијат „метла“ од Владата, на прво место се најде министерот за животна средина и просторно планирање Садула Дураки, на второ е министерот за здравство Венко Филипче, а на трето место е заменик претседателот на Владата задолжен за европски прашања Бујар Османи. Анкетата беше објавена вчера, на 14 веб страници и траеше 24 часа. Во овој период на анкетата гласале 5.750 лица.
На анкетата беше понудена листа од 11 министри во Владата, а најмал дел од нив, односно 3,2 проценти се изјасниле дека министерката за труд и социјална политика Мила Царовска треба да добие „метла“ од Владата на премиерот Зоран Заев. Меѓу последните се и министрите за надворешна политика и за транспорт и врски, Никола Димитров и Горан Сугарески. Високо на листата, освен Дураки, Филипче и Османи, се најдоа и вицепремиерот Кочо Анѓушев, министерот за економија Крешник Бектеши и министерот за внатрешни работи Оливер Спасовски.
Од анкетираните 5.750 испитаници, според податоците на истражувачкиот центар на „Макфакс“, над 70 отсто биле мажи на возраст од 35-44 години. Речиси 86 проценти гласале од Македонија, а останатите од Германија, Швајцарија, САД и други држави.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Петрушевски: Венко Филипче ти имаш фирми во Бугарија, на адреса со Заев каде се свртеа 9 милиони од јагленот од РЕК

„Вечерва Венко Филипче, пред 30-тина луѓе во мала сала во Кисела Вода, потрошил голем дел од својот говор за да ме навредува. Редно е да одговорам“, напиша на социјалните мрежи Бране Петрушевски од ВМРО-ДПМНЕ.
„Венко, најмалку ти имаш право кој било да го обвинуваш за „лажење“ и „бугаризација“. Јас немам бугарски пасош, немам фирми во Бугарија и немам тајни зделки зад грбот на народот. Ајде еднаш биди искрен и признај дека токму ти си синоним за милионски шеми со фирми во Петрич, заедно со браќата!
Не мора на мене, туку на јавноста дај и одговори: Каде завршија 9 милиони евра од јагленот за РЕК Битола? Зошто на иста адреса во Петрич се појавуваат фирми на твоето семејство и на Вице Заев? Дали тие пари завршуваа во ваши фотоволтаични централи, додека народот го оставивте да плаќа скапа струја? Дали преку бугарски фирми финансирате бизниси по светот, додека Македонија ја потонавте во сиромаштија?
Ова се вистинските прашања, Венко.
Не лажи дека јас или Христијан Мицкоски имаме такви врски. Ние немаме ниту бугарски пасоши, ниту скриени фирми. Ние имаме чесна и чиста биографија.
ВМРО-ДПМНЕ и Мицкоски се јасно определени за Македонија во ЕУ, но како достоинствена држава, без понижувања и без тргување со националните интереси.
Доста е од лицемерието Венко! На народот му е јасно дека додека си трупавте милиони преку Бугарија, граѓаните останаа со празни џебови“, вели Петрушевски.
Македонија
Забрана за тешки товарни возила на неколку патни правци

Од 19:45 часот на магистралниот пат Маврово – Дебар воведена е забрана за тешки товарни возила поради задржување на снег на коловоз, извести АМСМ.
Од 19.55 часот воведена е забрана за тешки товарни возила и за патниот правец Гостивар – Стража, додаваат од АМСМ.
Македонија
Посебен сообраќаен режим утре во Скопје

Од утре петок до сабота, во официјална посета на Р.С.Македонија ќе присуствува претседателот на Владата на Република Србија, Ѓуро Мацут.
Од тие причини Едницата за безбедност на патниот сообраќај ќе преземе мерки за посебен режим на сообраќај на подрачјето на град Скопје.
МВР апелира до граѓаните да се почитуваат наредбите што ќе ги даваат униформираните полициски службеници.