Македонија
Апасиев смета дека со Гаши парламентот ќе биде косоваризиран, Мицкоски коментира дека се однесува како џанак

Првиот човек на политичката партија Левица, Димитар Апасиев, пред конститутивната седница денес ја отфрли можноста да го поддржат изборот на Африм Гаши за претседател на Собранието.
„Ние би дале поддршка од нашите шест пратеници да не биде Албанец претседател на Собранието. Отворено го повикуваме Мицкоски, бланко-поддршка, на невидено, само да не биде повторно косоваризиран македонскиот парламент“, рече Апасиев.
Прашан од новинарите зошто му пречи Албанец да дојде на оваа функција, Апасиев рече дека е противуставно да се зборува на друг јазик, освен на македонскиот кога се преседава со седница.
„Си ги гласавте патриотите, тоа ќе ви биде реалноста“, додаде Апасиев.
Потоа од лидерот на ВМРО-ДПМНЕ, Христијан Мицкоски, беше побаран став за повикот на Апасиев, на што Мицкоски рече дека тој се однесува како џанак.
„Треба ли да го коментираме Димитар Апасиев? Тој пред изборите имаше бланко-понуда да се приклучи и да застане на страната на македонското национално единство, но одлучи повеќе да се посвети на правењето планови каде ова лето ќе ужива, дали во Хургада или на некоја друга грчка плажа. И како што еден од неговите поранешни сопартијци вика дека тие се една група џанаци, така и продолжува да се однесува“, рече Мицкоски.
Во Собранието почна конститутивната седница на новиот собраниски состав. На дневен ред се избор на верификациска комисија, верификација на мандатите на новите пратеници, избор на комисија за прашања на изборите и именувањата, како и избор на претседател на Собранието – функција што е превидено да ја извршува Африм Гаши од Алтернативата, која е дел од коалицијата „Вреди“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Голема акција на Финансиската полиција: уапсени седум лица за даночни измами и перење пари, го оштетиле буџетот за 430 милиони денари

По двегодишна опсежна предистражна постапка, во текот на денешниот, Управата за финансиска полиција спроведе акција во која беа извршени претреси на повеќе локации на подрачјето на општина Липково, Куманово и Желино.
Се работи за сложена предистрага која опфаќа повеќе правни и физички лица, а целта е целосно разоткривање на криминална група која дејстувала подолг временски период и имала за цел вршење на кривичните дела злосторничко здружување, даночно затајување, даночна измама и перење пари и други приноси од казниво дело, со намера организаторите и припадниците на групата да се стекнат со противправна имотна корист во висина од над четиристотини триесет милиони денари, со што е предизвикана огромна штета на буџетот на Република Македонија.
По налог на јавен обвинител од Основно јавно обвинителство за гонење на организиран криминал и корупција, во акцијата со асистенција на САЕ “Тигар”од слобода се лишени седум лица и истите се изведени пред судија на претходна постапка при Основниот кривичен суд, а едно лице не е достапно на органите на прогонот.
Македонија
Утре сончево време, со температура до 34 степени

Времето утре ќе биде сончево со мала до умерена облачност. Попладне во источните делови ќе има услови за локален краткотраен дожд. Ќе дува слаб до умерен ветер претежно од јужен правец, информира УХМР.
Минималната температура ќе биде во интервал од 9 до 18, а максималната ќе достигне од 27 до 34 степени.
Во Скопје, сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 14, а максималната ќе достигне до 32 степена.
До петок времето ќе се задржи претежно сончево и топло со постепен пораст на дневните температури. Ќе дува слаб до умерен ветер од јужен правец.
За време на викендот времето ќе биде променливо облачно и нестабилно со локален пороен дожд и грмежи. Во сабота ќе дува умерен до засилен југозападен, а во недела ветерот ќе го смени правецот во северен.
Македонија
Меџити: Почна акцијата за чистење на депонијата во Никуштак, ќе бидат потрошени пет милиони денари

Министерството за животна средина и просторно планирање денес ја започна акцијата за санација на дивата депонија во селото Никуштак, општина Липково.
Оваа депонија, идентификувана како една од најопасните во Националниот план за управување со отпад, претставува сериозна закана за здравјето и животната средина, како за жителите на Липково, така и за соседните општини. Честите пожари и постојаното загадување се голема загриженост за граѓаните од регионот.
Од Буџетот за 2025 година за овој проект се обезбедени околу 5 милиони денари, како и механичка опрема за безбедно управување со отпад. По завршувањето на техничките подготовки, денес започнаа градежните работи на терен.
Меџити рече дека санацијата на оваа депонија е голем чекор кон заштита на здравјето на граѓаните и подобрување на условите за живот во општина Ликове и околниот регион. Тој нагласи дека нема повеќе време за чекање и дека институциите имаат обврска конкретно да дејствуваат на терен.