Македонија
Апелација му ja намали казната на Владимир Талевски за една година за предметот „Транспортер“

Апелација му ја намали казната на ексградоначалникот на Битола, Владимир Талевски, за една година за предметот „Транспортер“.
Пресудата е донесена по две години од првостепената пресуда донесена од судијката Добрила Кацарска. Поранешниот секретар на Општина Битола, Слободан Бончановски, исто така доби намалување на казната, па од шест години, сега треба да издржи 5 години и шест месеци.
На обвинетите им се судеше за злоупотреба на службената положба и овластувањето поради организирањето превоз на ученици во Битола, со што се гонеа дека направиле проневера на речиси 360.000 евра. Укината е и ослободителната пресуда за еден од обвинетите.
На дел од управителите на фирми, кои добија казни од 2 до 3 години затвор, Апелација им изрече условни осуди.
„На обвинетите Ј. И., С. М., А. Ш., Д. Г., А. С., О. С., Р. Ј., Н. Д., Џ. М. за кривично дело злоупотреба на службената положба и овластувањето од чл. 353 ст. 5, в. в. со ст. 1, а в. в. со чл. 24 и чл. 45 од Кривичниот законик, им изрече алтернативна мерка – УСЛОВНА ОСУДА, така што им се утврдува казна затвор во траење по 2 години и истовремено се определува дека утврдената казна затвор нема да се изврши ако обвинетите во временски период од 5 години по правосилноста на пресудата, не сторат ново кривично дело“, велат од Апелација.
Од фирмата „Д и А-Хера транс“ ДООЕЛ државата ќе конфискува 857.637 денари.
„Во другиот дел, како и во однос на кривичните санкции кон другите обвинетите и во однос на мерката конфискација на имотната корист, која е прибавена со кривичните дела, во вкупен износ од 34.224.179,00 денари, првостепената пресуда ја потврди“, велат од Апелација.
Апелација објаснува и зошто ја донела оваа пресуда.
„Постапувајќи по изјавените жалби, оцени дека првостепениот суд не сторил суштествени повреди на одредбите на кривичната постапка на кој се укажува во изјавените жалби и на кои судот внимава по службена должност, во пресудата се утврдени сите решителни факти во врска со времето и начинот на извршување на кривичните дела, дадени се причините за решителните факти, извршена е правилна анализа на сите изведени докази и донесената пресуда е јасна, разбирлива и може во целост да се испита. Воедно, како неосновани ги оцени жалбените наводи за погрешно утврдена фактичка состојба, а со тоа и за погрешна примена на материјалното право, од причина што првостепениот суд утврдил правилна фактичка состојба, а врз основа на сите изведени докази во текот на постапката правилно ги утврдил сите решителни факти за кои дал доволно образложени причини во образложението на обжалената пресуда и со еднакво внимание ги испитувал и утврдил како фактите што ги товарат обвинетите така и оние што им одат во корист, при што правилно постапил судот кога им дал верба на доказите што се поклопуваат помеѓу себе и даваат целосна слика за настанот, а притоа имајќи ја предвид и одбраната на обвинетите, со што донел јасна и разбирлива пресуда во врска со кривичните дела и кривичната одговорност на обвинетите“, велат од Апелација.
Тие додаваат дека при донесување на пресудата ги ценеле сите околности.
„По однос на жалбените наводи за одлуките за кривичните санкции, советот на овој суд ги имаше предвид сите околности што се од влијание при определувањето на видот на кривичната санкција и одмерувањето на нејзината висина, а особено степенот на противправноста на кривичните дела, степенот на кривичната одговорност на обвинетите, јачината на повредата на заштитеното добро, општествената опасност од извршување на овој вид кривични дела, тежината и начинот на извршување на кривичните дела и во таа смисла поединечните дејства на извршување на секој од обвинетите, опишани во изреката на првостепената пресуда, нивната улога во криминалниот потфат како извршител, односно соучесник, нивното својство, и во таа насока прибавената противправна имотна корист, а особено фактот дека е изречена конфискација на целокупната имотна корист, ценети во корелација со околностите што постојат на страна на секој од обвинетите, а кои се однесуваат на личните, семејните и на материјалните услови на обвинетите и нивниот поранешен живот, детаљно елаборирани во образложението на првостепената пресуда применувајќи го принципот на пропорционалност, а на кој укажува Европскиот суд за човекови права, па оцени дека и со поблаги казни затвор, односно со изречените алтернативни мерки – условни осуди кон обвинетите наведени во одлуката на Апелациониот суд Скопје, за кои е преиначена првостепената пресуда во делот на одлуката за кривичната санкција, како и со изречените кривични санкции кон другите обвинети со првостепената пресуда, доволно воспитно ќе се влијае во иднина да не се јавуваат како сторители на вакви и други кривични дела, а со тоа да се остварат и целите на казнувањето предвидените во чл. 32 од Кривичниот законик како на планот на специјалната така и на планот на генералната превенција“, додаваат оттаму.
Од судот, ја укинале и ослободителната пресуда што ја донела Кацарска.
По повод жалбите и по службена должност, а заради правилна примена на законот, овој совет одлучи првостепената пресуда во ослободителниот дел под II само да се укине од причина што обвинетиот Д. Г. се обвинува за едно кривично дело злоупотреба на службената положба и овластувањето од чл. 353 ст. 5 в. в. со ст. 1 в. в. со чл. 24 и чл. 45 од КЗ, за кое е огласен виновен, но за опишаните дејства под точка 3 алинеја 14, со оглед што првостепениот суд оценил дека не се докажало оти обвинетиот ги извршил дејствата опишани под точка 3 алинеја 14 од обвинението, требало да ги испушти од описот на дејствата содржани во изреката, а во образложението на пресудата да ги образложи причините за тоа, а не да донесе ослободителна пресуда“, додаваат од Апелација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Кирков: ЈСП е пример за тоа како е да се работи недомаќински

На денешната седница на Советот на Град Скопје, се обрати советникот од редовите на ВМРО-ДПМНЕ, Стефан Кирков.
Кирков истакна дека по посета на Јавното сообраќајно претпријатие, сликата била застрашувачка со што повеќе од 200 автобуси стојат нефункционални и неупотребливи без притоа истите да се поправат.
„Заедно со колегата Тони Бојковски од Советот на Град Скопје направивме посета во ова јавно претпријатие, и она што го видовме навистина не запрепасти. Повеќе од 200 расипани автобуси стојат подолго време на паркинзите на ова јавно претпријатие и покрај тоа што во ова јавно претпријатие се случува тотален хаос“, рече Кирков.
Кирков додава дека ова јавно претпријатие работи недомаќински и ги повика институциите да направат целосна ревизија со цел да се утврди кој е причинител за ваквата катастрофална ситуација на ова ЈСП.
„Оттука се прашувам иако се е изгласано од страна на советниците, ова јавно претпријатие апсолутно во последниве три и пол години работи недомаќински, и јас алармирам од оваа позиција овдека ги повикувам сите јавни и државни институции да направат целосно ревизија и да се утврди одговорноста кој допринесе ова јавно претпријатие да се наоѓа во ваква ситуација. Скопјани треба да бидат мирни, јавниот превоз и целиот град Скопје ќе доживее една поубава слика“.
Македонија
Филипче од лежалка меѓу две јахти пишува статуси за економијата или телефонот му е кај Фрчкоски, велат од ВМРО-ДПМНЕ

Класична СДС матрица на лаги и дефокус. Последниот човек кој може да зборува за економија е Венко Филипче. Под него, Заев, Артан, Бујар и Али, Македонија ја виде најголемата сиромаштија најскапата струја, најскапото гориво и најголемите корупциски афери, велат од ВМРО-ДПМНЕ откако на социјалните мрежи се огласи лидерот на СДСМ Венко Филипче.
Народот, додаваат од партијата на власт, плаќаше со живот и празни џебови, а тие си полнеа сметки и договараа политики на јахти.
Според ВМРО-ДПМНЕ, денес Филипче зборува за „достоинство“, а токму тој и неговиот ментор, како што велат, ја понижија државата и ја симнаа СДС од втора на четврта партија.
Го прашуваат Филипче: „кога толку глуми загриженост за државата, зошто не им каже на своите 6% поддржувачи колку чини еден ден возење на јахтата? Тука зборуваме за материјалната цена во евра, не за фактот кој одамна е познат, дека тоа возење е само симбол на неговата заложеност кон менторот и сопственикот на јахтата.
За да му ги скратиме маките, еве ја сметката: Гориво: 1800 €; Екипаж: 500 €; Одржување: 250 €;
Марина / сидрење: 200 €; Вкупно: околу 2750 € на ден.
Без да ги пресметаме и скапите ручеци и „ужинки“, какви што има дводецот што го води СДС. Со храна и пијалоци, сумата оди и до 6–7000 € дневно.
За десетина дена тоа преку 70000 евра луксуз.
А за 30 дена, колку што летово поминуваат на јахтата и по грчките плажи и острови, а и по други земји, нека пресмета кој сака сам, колку чини сето тоа“.
Затоа, додаваат од партијата на Мицкоски, пред да глуми дека се грижи за народот, Филипче нека објасни како е можно да се трошат толку пари на јахти и дали мирно спие кога сите во државата знаат дека токму тој хедонистички двоец е одговорен за сиромаштијата, галопирачката инфлација и разурнатата економија.
„Додека народот преживуваше, тие купуваа јахти и си планираа луксузен живот со украденото од народот богатство.
Затоа, Филипче прекини!
Засрами се! Ако воопшто знаеш што е срам“.
Македонија
Шукова: ВМРО-ДПМНЕ брутално ги осквернави идентитетот и архитектурата на Скопје, време е да му го вратиме ликот на вистинска метропола

„Време е на Скопје да му го вратиме ликот на вистинска метропола, град кој ќе биде пристапен и функционален“, порача денеска кандидатката за градоначалник на Град Скопје од СДСМ Каја Шукова. Според нејзината визија за центарот на градот, се предвидува затворање на сообраќајот и ставање на јавниот простор во функција на пешаците, туристите, велосипедистите, не на автомобилите.
„Време е на Скопје да му го вратиме ликот на вистинска метропола – град кој ќе биде пристапен и функционален. Мојата визија за „Мал ринг“ е суштинска промена на центарот на градот. Проект кој подразбира затворање на мал ринг за сообраќај, адаптиран за пешаците и велосипедистите. На Рекорд ќе има дозвола за превоз само за ЈСП и специјални возила. Ќе го заживееме јавниот простор со урбана опрема и ќе воведеме посебни содржини. Центарот многу брзо ќе го добие ликот како што заслужува нашето Скопје и ќе го врати сјајот на метропола“, рече Шукова.
Порача дека Скопје сега е задушен град поради неуспешните импровизации на ВМРО-ДПМНЕ и нивната градоначалничка Данела Арсовска.
„Централното градско подрачје, познатиот „Мал ринг“ кој е срцето на Скопје, сега е задушен, поради деструктивните импровизации на ВМРО ДПМНЕ и незаинтересираноста на нивната менаџерка Данела Арсовска. ВМРО ДПМНЕ брутално го осквернави идентитетот и архитектурата на Скопје – скапо платен со народни пари, а со трајни последици по јавниот простор. Денес, строгиот центар на Градот е задушен од објекти, прекумерен сообраќај и без соодветна инфраструктура за пешаците и велосипедистите. Тоа време мора да остане зад нас! “, изјави Шукова.