Како држава сме мултиетничка средина и повеќе заедници живеат и на тој начин го збогатуваат практично ова наше заедничко семејство наречено Македонија. Денеска е празник на турската заедница, би сакал во оваа пригода да го честитам и да изразам задоволство што можеме да го чествуваме заедно, истакна премиерот Христијан Мицкоски.

„На овој начин практично покажуваме дека ние воопшто немаме фрустрации и стереотипи, туку, напротив, сакаме да бидеме едно семејство, без разлика на нашите различности, да бидеме обединети и тоа наше заедничко семејство, кое го составуваат сите овие наши различности, заедно да го штитиме бидејќи семејството се сака, но и се штити.

Сите ние, граѓаните на нашата Македонија, без разлика на нашата етничка припадност, верска припадност, сме дел од ова, ќе повторам, наше заедничко семејство и сакам да верувам дека сите ние еднакво заедно си го сакаме и како такво ќе го штитиме.

Така што уште еднаш ми претставува чест поканата на Иван што денеска сум дел од овој преубав настан и уште еднаш да го честитам овој ден на турската заедница и да посакам уште многу вакви чествувања за сите заедници во нашата татковина, потенцира Мицкоски.

Одделот за внатрешна контрола, криминалистички истраги и професионални стандарди при Министерството за внатрешни работи до надлежното Основно јавно обвинителство за гонење на организиран криминал и корупција – Специјализирано одделение за гонење на кривични дела сторени од лица со полициски овластувања и припадници на затворска полиција, поднесе кривична пријава против Б.Ј. поради постоење основи на сомнение за сторено кривично дело „злоупотреба на службената положба и овластувања“ по член 353-в од Кривичниот законик.

На 15.12.2024 во 09.06 часот, извршувајќи работни задачи на работно место полициски службеник во Полициската станица за граничен премин Долно Блаце, во кабина на излез од државата, со пропуштање на должен надзор, пријавениот дозволил излез на патничко возило џип „мерцедес“ со конзуларни регистарски ознаки, управувано од А.П. од Скопје, а сопатник бил А.Г. од Скопје, за кого постоела активна мерка „задржи и веднаш извести“, согласно распишана телеграма од Одделот за криминалистичка полиција при МВР.

Со ваквото дејствие, полицискиот службеник Б.Ј. му овозможил на А.Г. да оствари излез од државата и покрај внесената мерка „задржи и веднаш извести“, а исто така, со дејствието нанел штета на угледот на МВР.

Имено, полицискиот службеник Б.Ј. не извршил адекватни проверки за возилото „мерцедес“ при премин на државната граница, не го евидентирал за остварување на излез и патниците од возилото ги завел дека пешки ја поминале границата. Исто така, при граничната проверка не почекал системот да утврди дали за лицата има активна мерка, туку веднаш им ги дал патните исправи, по што тие го напуштиле граничниот премин.

Одделот за внатрешна контрола, криминалистички истраги и професионални стандарди поднесе предлог за поведување на постапка за утврдување на дисциплинска одговорност и изрече задолжителни мерки полицискиот службеник да биде суспендиран од своето работно место до завршување на дисциплинската постапка.

Се проверува начинот на кој Реџеп Мемеди раководи со Детската клиника по неколкуте смртни случаи на деца и бебиња изминативе месеци откако тој е директор. Министерот за здравство Арбен Таравари на прашањето дали ќе го смени директорот откога вчера Државниот санитарен и здравствен инспекторат утврди дека имало пропусти во лекувањето на починатото седуммесечно бебе, одговори резервирано.

„Секако дека како Министерство за неколку директори веќе правиме евалуација за тоа како ги водат клиниките, колку стручно и колку компетентно и според тоа и ќе одговориме. Не ни требаат емоции во именување и разрешување, ни требаат податоци. Да видиме и онаму каде што има незадоволство, не се функционира како што треба, секако ќе се преземаат чекори. Ги евалуираме повеќето директори. Ни требаат повеќе индикатори, не сакаме емоционално да постапиме. Ни требаат сигурни докази онаму каде што гледаме дека директорите не раководат баш како што треба да се заменат со подобри“, рече министерот Таравари.

Тој нагласи дека е забележливо незадоволство не само во Детската клиника туку и во клиниката во Козле. Ги прифатил незадоволните, разговарал со нив, но на разговор ја повикал и директорката за да може да донесе, како што нагласи, коректна и прагматична одлука.

Последниот смртен случај за кој вчера Санитарниот инспекторат утврди пропусти во лекувањето беше во неделата кога почина седуммесечно бебе за кое Детската клиника првин одбила хоспитализација, а откога му се влошила состојбата, два дена подоцна, го примиле на болничко лекување.

На почетокот на минатиот месец, на истата клиника, по две недели лекување од мозочен удар, почина петгодишно девојче примено со силна главоболка.