По речиси половина година, поранешниот директор на Агенцијата за поддршка и промоција на туризмот, Александар Донев, вели дека ги вратил парите што ги потрошил во октомври минатата година за лет до Аргентина со бизнис-класа. Средствата за службени патувања ги надоместил од свој џеб, вели Донев за „Макфакс“. Тој неколкупати повторуваше дека парите ќе ги донира за изградба на сензорна соба за лица со посебни потреби, со образложение дека чека Министерството за труд и социјална политика да ја заврши постапката, но сега вели дека не излегло ништо од тоа.

-Дел од трошоците за службени патувања ги покрив приватно, изјави Донев за „Макфакс“, без да прецизира точен износ на пари и за кои службени патувања станува збор.

За потврда на оваа информација, од Агенцијата за поддршка и промоција на туризмот нè упатија да се обратиме со барање за слободен пристап до информации од јавен карактер.

Александар Донев ја налути јавноста која дозна дека тој во октомври 2017 службено патувал до Буенос Аирес во бизнис-класа со авионски билет за 220 000 денари, а летот со економска чинел 180 000 денари. Донев тогаш се извини и вети дека ќе ја надомести разликата од 40.000 денари од свој џеб. Но, според податоците до кои дојде „Макфакс“ од Агенцијата за туризам, вкупната сума патни трошоци за патувањето во Аргентина за авиобилети и патничко возило  изнесува 433.950 денари или 7.056 евра. Донев тогаш се правдаше дека се работи за трошоци и за локален превоз, како и за уште еден авиобилет од Буенос Аирес до Салта, во економска класа, и дека во оваа сума се внесени и трошоците за сместување, иако во одговорот што го доби „Макфакс“ од Агенцијата стои дека сумата се однесува за авиобилети и патнички трошоци.

Донев беше разрешен со одлука на Владата во јануари, поради несовесно и невнимателно работење.