И официјално е блокиран буџетот на Град Скопје, обелодени на прес-конференција градоначалничката Данела Арсовска. Со ова скопјани се оставени на милост и немилост, не може да се рерализира ниту еден од планираните проекти. Ниту ФК Вардар ќе добие помош ниту граѓаните ќе ги добијат планираните субвенциите поради економската криза, вели Арсовска.

„На седницата за ребаланс на буџетот советници на ВМРО-ДПМНЕ го блокираа градскиот буџет со поднесување нестручни амандмани. Дека буџетот е блокиран, официјално нѐ извести и Mинистерството за финансии. Тој не може да се вчита во Министерството за финансии. ВМРО има една цел, а тоа е блокирање на Град Скопје бидејќи се инаетат и иако беа предупредени од страна на стручните служби дека во оваа форма амандманите ќе го блокираат буџетот и Град Скопје, тие одбија да ги преработат амандманите. Славески и советниците на ВМРО-ДПМНЕ ги исполнуваат само желбите на нивниот лидер Мицкоски и не се грижат за граѓаните“, изјави градоначалничката Арсовска.

Таа информира дека поднеле преставка, бараат свикување итна седница, на која ќе се изнајде решение за блокадата на буџетот на Град Скопје, а штетата ќе се обидат да ја надминат, без да прецизира како.

„Лично, ќе се заложам да се надмине оваа состојба. Но, со блокирањето на буџетот сите проекти е невозможно да се реализираат“, изјави Арсовска.

Во однос на прекинот на превозот на приватните превозници, Арсовска децидна дека долг нема.

„Од 1.06 2022 до сега исплатени се 11 милиони од 120 милиони денари фактурирани од страна на ‘Слобода превоз’. За ‘Макекспрес’ за последните 6 месеци има фактурирани 44 милиони денари и сите се платени. Ги повикувам преставниците на овие два превозника овие протести што ги најавуваат да ги префрлат пред седиштата на СДСМ и ВМРО-ДПМНЕ, кои и ги предизвикале долговите од изминативе години“, изјави Арсовска.

Според неа, приватните превозници не си ги исполнуваат обврските.

„Жал ми е што во повеќе јавни претпријатија се политизираат работите на штета на граѓаните. Со договорот за соработка со ЈСП, кои го имаат, тие имаат обврска да ја фискализираат наплатата на билети и апелирам до УЈП да излезе и да контролира дали е тоа така зашто граѓани се жалат дека не добиваат фискални сметки. Исто така доцнат, а не одржуваат и соодветно ниво на хигиена“, вели Арсовска.

Приватните автобуси на „Слобода превоз“, на линиите 9, 12, 22, 23 и 45, денеска не возат поради немање пари за нафта затоа што ЈСП „Скопје“, односно Град Скопје, не им го исплатил долгот, а линиите 11, 11а, 47, 55, 61, 63 и 73 продолжија да сообраќаат.

Од друга страна, приватните превозници од компанијата „Макекспрес“ исто така, поради неисплатени долгови од страна на ЈСП, односно Град Скопје, прекинаа со превоз на своите линии.

По најавата дека ќе ѝ бидат одземени ингеренциите за реконструкција на Универзалната сала и предадени на Министерството за култура, Арсовска вели дека не се работите како што се претставуваат и директно му се обрати на премиерот Димитар Ковачевски. Таа му посочи да си гледа што треба да сработи тој како премиер на Владата.

„Сметам дека неговата несмасна изјава е дел од неговото политичко неисксутво и нема да ја земам за зло. Сметам дека ќе има време пред себе да покаже и да демонстрира дека не мислел ништо лошо. Сакам да прашам кој ќе му ги одземе ингеренциите за нереализирањето на неговите ветувања? Кој ќе го доврши автопатот Кичево – Охрид, проектот за клинички центар, ингеренциите за автопатот кон Крива Паланка, кој ќе ги одзеде ингеренциите за неспроведување на антикризните мерки. Првин реализирајте ги вашите ингеренции“, му порача Арсовска.

Сепак, Владата ја разгледува можноста да го преземе и реализирањето и на другите големи проекти почнати од Град Скопје.

Станува збор за брзиот автобуски превоз во градот Скопје, кој е одобрен проект со финансирање од меѓународни финансиски институции и кој, едноставно, не се реализира, клучката кај Момин Поток, патот до Визбегово, исклучително важна сообраќајница, што треба да ја поврзе индустриската зона Визбегово, но и Чучер Сандево, подвозниот под зградите на „Лимак“, кој е речиси готов, пречистителната станица, како и кружните текови кај поранешна „Нова Македонија“.

Анита Петровска-Рајковиќ