Во првите 82 дена од мојот мандат, преку програмата за модерно Скопје со сите 15+1 проекти и мојот 82 акциски план, ќе ги исчистиме дивите депонии во градот. Ќе го промениме линискиот ред на градскиот сообраќај, при што ќе се обезбедат помали временски интервали за автобусите и продолжување на линиите до заборавените места, а редовни ноќни линии ќе бидат воведени, ообено за време на викендот, изјави кандидатката за градоначалник на Скопје, Данела Арсовска.

Додаде дека следно е отворање телефонска линија за барања и помош на граѓаните, а ќе се формира и зелениот градски совет во соработка со невладиниот сектор.

„Водно преку иницирање предлог-закон ќе биде прогласено за заштитена парк-шума. За граѓаните, ќе биде воведена 24-часовна канцелариска служба и служба за брза реакција на нивен повик. Одбројувачите на секундите и зелените бранови на семафорите во градот ќе бидат вратени во функција. За лицата со попреченост, ќе бидат обезбедени пристапни рампи во сите градски институции. Во соработка со антикорупциска комисија, ќе спроведеме процес на ветинг (проверка) на директорите на јавните институции што се под Градот и на раководителите на секторите. Ќе се ревидира и приспособи процената на данок на имот. Предвидено е и формирање совет за поддршка на жените претприемачи. Цените за паркинзите што се под надлежност на Град Скопје ќе бидат намалени до 25 %. Тимови од Градот ќе направат процена на состојбата со заборавените населби во градот и ќе биде изготвен акциски план за спроведување проекти за овие населби. И ова не е само изборно ветување, ова е моја обврска кон вас“, рече Арсовска.

Таа исто така посочи дека времето за промени е дојдено со оглед на многуте недостатоци и проблеми со кои се соочува Скопје.

„Кога ги гледаме несредените улици, поплавите, дури и во центарот на градот, нефункционалноста или на некои места немањето атмосферска канализација, стотиците диви депонии насекаде во Скопје, недостигот на вода за пиење во делови од градот, знаеме дека време е за промени. Штом младите луѓе не се чувствуваат среќно и не ја гледаат својата перспектива овде, знаеме дека време е за промени. Кога гледате дека ви ги ветуваат истите работи за кои ја добија вашата поддршка пред четири години, а ништо не реализираа и сега повторно истите работи ги ветуваат, време е за промени. И кога во борбата со загадувањето, единствено што направија е отстранување на мерните станици, време е за промени“, истакна Арсовска.

Како независен кандидат, Арсовска рече дека е благодарна за поддршката од партиите ВМРО-ДПМНЕ, Алијансата на Албанците, Алтернативата и сите други партии, движења, невладини организации, но најмногу од сѐ е благодарна за поддршката од скопјани. Затоа ги повика граѓаните в недела да бидат уште пообединети за една цел – современо и модерно Скопје.

„Ве повикувам сите што сте разочарани од политиката, кои никогаш не сте излегле на гласање, вие што сте изгубиле надеж, што сте гласале за власта што ве разочарала, да се обединиме, да се бориме за модерно Скопје и да ме поддржите мене во оваа битка. На чекор сме до успех за Скопје да не е повеќе политика, туку да биде град со кој ќе се гордееме. В недела вие ќе одлучите за иднината на Скопје“, упати Арсовска порака до сите граѓани на Скопје.

За Арсовска, четири години се доволно време за да се оцени дали некој знае да работи и да го оствари своето предизборно ветување и, според неа, досега скопјани се сведоци само на политиканство, празни ветувања, спотови и нереални 3Д-анимации.

„Ние, граѓаните, заслужуваме модерно, европско Скопје, чист незагаден град и сигурни решенија за нашите проблеми. Слушавме доволно празни ветувања од политичарите, потребни ни се реални проекти, кои ќе го подобрат животот во нашиот град. На нашето Скопје му треба менаџер, а не политичар. Затоа, ве повикувам да гласате за мене, за бројот 82, за да ја направиме разликата уште во првиот круг. Најмногу од сѐ – за да го направиме нашиот град чист, со функционална инфраструктура, Скопје со кое ќе може да се гордееме сите“, рече Арсовска.