Македонија
Арсовска: По пат на приоритетност ќе се решаваат проблемите во Општина Ѓорче Петров

„Скопје стагнира, обвиено е во сивило и е премногу загадено. Проблемите во Скопје можат да се решат со ефикасни и брзи решенија. За реализација на проектите од мојата програма не е потребен цел градоначалнички мандат, сукцесивно и со внимателно креиран план, можат да се решат сите проблеми. Цели заборавени населби има во моментов во Општина Ѓорче Петров, без основни услови за живот како што се чиста вода за пиење, атмосферска канализација и неасфалтирани улици. Потребно е итно делување во населените места Волково, Кучково, Даме Груев, Ново Село, Орман и Никиштани и Кисела Јабука“ – им порача на вечерашната средба на жителите од Ѓорче Петров, Данела Арсовска, кандидатката за градоначалник на Скопје.
Таа пред нив се обврза на сообраќаен ред наместо хаос, како што рече, каков што има во моментов, паркови и зеленило наместо бетон и згради на секој ќош, чистење на дивите депонии, наместо отпад на секоја страна.
„Уште за време на предизборната кампања во првиот круг од изборот за градоначалник на Град Скопје, заедно со мојот тим детектиравме проблеми од секоја скопска населба и се обврзуваме дека ќе работиме на принцип на нивен приоритет со цел да започнеме еден по еден да ги решаваме. Како дел од проектите од мојата програма за општина Ѓорче Петров е проширување на кракот на булевар Теодосиј Гологанов до раскрсница со бул. Ѓорче Петров и изградба на сообраќајница со четири ленти, инфраструктурни проекти значајни за општина Ѓорче Петров, два нови кружни тека, еден на влезот во Ѓорче Петров од Сарај и друг на улица Македонска војска. Еден од петте мега паркови ќе никне токму во оваа општина, а исто така ќе направиме и нови велосипедски патеки со што ќе се овозможи подобро поврзување со останатите општини“, истакна Арсовска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Шукова и Мојсова на пазарот во Тафталиџе: Ги слушнавме од прва рака проблемите на пазарџиите

Кандидатката за градоначалничка на Скопје од СДСМ, Каја Шукова, денес го посети пазарот во Тафталиџе заедно со Маја Мојосова, кандидатка за градоначалничка на општина Карпош.
„Денес бевме на пазарот во Тафталиџе заедно со Маја Мојосова, нашата кандидатка за Карпош. Ги слушнавме од прва рака проблемите на пазарџиите,“ изјави Шукова.
Таа посочи дека условите за работа се лоши, особено при екстремно високи температури.
„На вакви пеколни температури тешко се седи цел ден на тезга, немаат услови, но мораат да бидат таму. Работат напорно, чесно, и заслужуваат подобри услови за работа.“
Клучното барање кое било истакнато од страна на продавачите е јасно:
„Најчестото барање што го слушнавме беше едноставно – затворен пазар со нормални услови за работа.“
Во таа насока, Шукова истакна дека решението е веќе дел од нејзината програма.
„Во мојата програма имам конкретни проекти за затворање и модернизација на градските пазари. Пазарите ќе бидат живи, безбедни и функционални простори и за продавачите и за купувачите.“ – изјави Шукова.
Македонија
Муцунски во Истанбул се сретна со турскиот министер за надворешни работи

На маргините на состанокот на Балканската платформа за мир, министерот за надворешни работи и надворешна трговија, Тимчо Муцунски, денеска во Истанбул оствари средба со својот турски колега, министерот за надворешни работи, Хакан Фидан.
На средбата се разговараше за унапредување на билатералните политички односи, зајакнување на економската соработка и искористување на инвестициските можности. Соговорниците се осврнаа и на продлабочување на соработката во други области од заемен интерес.
Двајцата министри го потврдија силното пријателство меѓу двете држави, тесната соработка во рамките на НАТО, како и заемната поддршка во мултилатералните организации. Разговорите опфатија и актуелни регионални и геополитички прашања, со акцент на важноста од стабилен и просперитетен Балкан.
Средбата се одржа во рамки на првиот состанок на Балканската платформа за мир, иницирана од министерот за надворешни работи на Република Турција, Хакан Фидан.
Македонија
Големиот пожар кој избувна попладнево во близина на Струмица е под контрола

Големиот пожар кој избувна попладнево во близина на Струмица меѓу Градските гробишта и селото Баница и зафати огромна површина и со голема брзина се ширеше кон месноста Софилар и куќите во тој дел на градот е ставен под контрола, објави директорот на Дирекцијата за заштита и спасување (ДСЗ), Стојанче Ангелов.
Според него, големиот и црн чад излегува од склад во чиј двор од пожарот се зафатени гуми, а пожарникарите не дозволуваат пожарот да се шири кон селото Баница, градот и викендички во овој простор.
-Пожарот се движи во неколку насоки и има големи шанси да биде ставен под целосна контрола. На едно место навлезе делумно во Гробиштата во Струмица, зафати неколку квадратни метри и тука е запрен. Нема потреба од вознимереност и паника. Струмичките пожарникари побараа помош од соседните противпожарни единици, а доаѓаат и два „пинцгауери“ на ДЗС, а во случај на лош развој на настаните ќе упатиме и „ер трактори“. Во овој момент нема таква потреба, иако едниот „ер трактор“ превентивно е упатен кон Струмица, рече Ангелов во изјавата за медиумите објавена од местото на пожарот.
Соред командирот на ТППЕ Струмица, Александар Гудев, се работи за пожар од големи размери, кој засега го гаснат 30 пожарникари и 10 возила, а побарана е помош од пожарникарите од Валандово и вклучување на хеликоптер.
Од СВР Струмица попладнево упатија апел до граѓаните да не се движат во делот зафатен со пожар, а лицата кои се затекнати таму веднаш да го напуштат подрачјето.